ក្រសួងប្រៃសណីយ៍ និងក្រុមហ៊ុន IDG បានបើក សិក្ខាសាលាស្តីពី “ការវិវឌ្ឍបច្ចេកវិទ្យា 4G LTEនៅកម្ពុជា”
![](https://asset.cambodia.gov.kh/mptc/2020/03/zv8jbroX-image-2017-6-30-171100.jpg)
រាជធានីភ្នំពេញ៖ ព្រឹកថ្ងៃទី៣០ ខែមិថុនា ឆ្នាំ២០១៧ លោកជំទាវ រស់ សូរក្ខា រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានអញ្ជើញជាអធិបតីបើក “សិក្ខាសាលាស្តីពីការវិវឌ្ឍបច្ចេកវិទ្យា 4G LTE” នៅសណ្ឋាគារសុខាភ្នំពេញ។
សិក្ខាសាលានេះបានរៀបចំដោយក្រសួងប្រៃសណីយ៍ និងទូរគមនាគមន៍ សហការជាមួយក្រុមហ៊ុន IDG ក្រោមប្រធានបទ “សក្តានុពលរបស់បច្ចេកវិទ្យា 4G LTE ជម្រុញឱ្យមានការរីកចម្រើនផ្នែក Internet of Things ឧស្សាហកម្មទាំងមូល” ដែលជាប្រធានបទមានសារៈសំខាន់មួយជាពិសេសសម្រាប់ស្ថានភាពបច្ចុប្បន្ននៃវិស័យឧស្សាហកម្មបច្ចេកវិទ្យាគមនាគន៍ និងព័ត៌មាននៅក្នុងព្រះរាជាណាចក្រកម្ពុជា។ ដោយមានការចូលរួមពីតំណាងបណ្តាក្រុមហ៊ុន ប្រតិបត្តិករ ក្រុមហ៊ុនផ្តល់សេវាកម្មខាងវិស័យបច្ចេកវិទ្យា និងធនាគារសរុបប្រមាណ៣០០នាក់។
សិក្ខាសាលាខាងលើនេះក៏នឹងផ្តោតទៅលើប្រធានបទមួយចំនួនរួមមាន ការប្រែក្លាយបច្ចេកវិទ្យាឌីជីថលដើម្បីអភិវឌ្ឍន៍សេវាទូរស័ព្ទចល័ត ការចូលរួមចំណែកជំរុញកំណើនសេដ្ឋកិច្ចផ្អែកលើបច្ចេកវិទ្យា 4G ការកសាង និងអភិវឌ្ឍហេដ្ឋារចនាសម្ព័ន្ធក្នុងឧស្សាហកម្មបច្ចេកវិទ្យា 4G គុណសម្បត្តិ និងគុណវិបត្តិនៃបច្ចេកវិទ្យា 4G ក្នុងទីផ្សារនៃព្រះរាជាណាចក្រកម្ពុជា។
មានប្រសាសន៍នាឱកាសនេះ លោកជំទាវ រស់ សូរក្ខា បានថ្លែងថា៖ ព្រះរាជាណាចក្រកម្ពុជា ជាប្រទេសមានសក្តានុពលមួយក្នុងចំណោមប្រទេសដែលមានការអភិវឌ្ឍវិស័យ ICT ជាក់ស្តែងចំនួនអ្នកប្រើប្រាស់ទូរស័ព្ទចល័តកើនឡើងខ្ពស់ ក្នុងនោះការប្រើប្រាស់ Internet មានរហូតដល់ទៅជាង ៧ លាននាក់។ បច្ចុប្បន្នការធ្វើពាណិជ្ជកម្មតាមប្រព័ន្ធ Online និងការផ្ទេរសាច់ប្រាក់តាមប្រព័ន្ទទូរស័ព្ទចល័តមានការកើនឡើង ទាំងនេះបានចូលរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ចជាតិ។
តាមរយៈការវិវត្ដយ៉ាងលឿននៃបច្ចេកវិទ្យា និងឧស្សាហកម្មឌីជីថលនេះ ក្រសួងប្រៃសណីយ៍ និងទូរគមនាគមន៍ មានបំណងជំរុញល្បឿននៃនវានុវត្តន៍នៃបច្ចេកវិទ្យាគមនាគមន៍ និងព័ត៌មាននៅក្នុងប្រទេសឲ្យផ្សាភ្ជាប់ជាមួយនឹងតំរូវការរបស់សាធារណជន និងស្របទៅតាមនិន្នាការថ្នាក់តំបន់ និងសកលលោក៕