រាជធានីភ្នំពេញ៖ នៅថ្ងៃទី២៨ ខែសីហា ឆ្នាំ២០២១ ក្រសួងប្រៃសណីយ៍និងទូរគមនាគមន៍បានធ្វើជាម្ចាស់ផ្ទះរៀបចំកម្មវិធីបោះជំរុំកុមារសាយប័រអាស៊ាន ឆ្នាំ២០២១ (ASEAN CYBERKIDS CAMP 2021) តាមរយៈប្រព័ន្ធវីដេអូ (Zoom) ក្រោមអធិបតីភាព ឯកឧត្តម កែវ សុទ្ធិ អនុរដ្ឋលេខាធិការក្រសួងប្រៃសណីយ៍និងទូរគមនាគមន៍ និងថ្នាក់ដឹកនាំក្រសួង ព្រមទាំងចូលរួមពីគ្រូបង្វឹក និងកុមារនៃបណ្តាប្រទេសសមាជិកអាស៊ាន។
កម្មវិធីនេះរៀបចំឡើងក្នុងគោលបំណងដើម្បីផ្តល់ឱកាសដល់កុមារអាស៊ាន ដែលមានអាយុមិនលើសពី១២ឆ្នាំ ក្នុងការធ្វើការជាក្រុម ការវិភាគលើបញ្ហានិងស្វែងរកដំណោះស្រាយដោយប្រើប្រាស់បច្ចេកវិទ្យាឌីជីថល និងធ្វើការប្រកួតប្រជែងក្នុងការសរសេរកូដកម្មវិធីគំនូរជីវចលជាដើម។ ជាលទ្ធផលនៃការប្រកួតប្រជែង ប្រទេសកម្ពុជាដែលមាន កុមារា ជិន មុនីរាជ មកពីបឋមសិក្សានរោត្តម និងកុមារី រស់ អេនចល់ឡា មកពីបឋមសិក្សាដង្កោ ទទួលបានមេដាយប្រាក់។
