រាជធានីភ្នំពេញ៖ ព្រឹកថ្ងៃពុធ ៤រោច ខែចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី០៤ ខែមេសា ឆ្នាំ២០១៨ ឯកឧត្ដម ត្រាំ អុីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានអញ្ជើញជាអធិបតីដ៏ខ្ពង់ខ្ពស់ក្នុងពិធីបើកសន្និបាតបូកសរុបលទ្ធផលការងារឆ្នាំ២០១៧ និងទិសដៅការងារឆ្នាំ២០១៨ របស់ក្រសួងប្រៃសណីយ៍ និងទូរគមនាគមន៍ ដោយមានការអញ្ជើញចូលរួមពីថ្នាក់ដឹកនាំក្រសួង មន្រ្តីរាជការ និយោជិត ព្រមទាំងវត្តមានរបស់ ឯកឧត្តម លោកជំទាវ លោក លោកស្រី តំណាងក្រសួង-ស្ថាប័ន តំណាងប្រតិបត្តិករ និងភ្ញៀវកិត្តិយសជាតិ-អន្តរជាតិផងដែរ។
ក្នុងឱកាសនោះ ឯកឧត្ដមរដ្ឋមន្ត្រីបានផ្តាំផ្ញើនូវអំណរគុណ និងការកោតសរសើរដោយស្មោះចំពោះមន្រ្តីរាជការ និយោជិត របស់ក្រសួងដែលបានខិតខំប្រឹងប្រែង អំណត់ព្យាយាមបំពេញភារកិច្ចដោយស្មារតីទទួលខុសត្រូវខ្ពស់សម្រេចបានលទ្ធផលជាផ្លែផ្កាគួរជាទីមោទនៈ និងអំណរគុណចំពោះគ្រប់ប្រតិបត្តិករជាដៃគូទាំងអស់ ដែលបានរួមសហការជាមួយក្រសួងទាំងប្រភពទុន- បច្ចេកវិទ្យាទំនើប និងធនធានមនុស្សក្នុងការជំរុញបន្តការអភិវឌ្ឍន៍លើវិស័យទាំងបី និងការបណ្តុះបណ្តាលធនធានមនុស្ស។ ឯកឧត្ដមរដ្ឋមន្ត្រី បានចាត់ទុនសន្និបាតនាពេលនេះគឺជាវេទិកានៃការជួបជុំគ្នា ដើម្បីធ្វើការបូកសរុប ត្រួតពិនិត្យ វាយតម្លៃចំពោះលទ្ធផលការងារទូទៅដែលសម្រេចបានក្នុងឆ្នាំកន្លងទៅ និងពិគ្រោះពិភាក្សាគ្នាលើកជាគំនិត និងវិធានការរកដំណោះស្រាយ ដើម្បីកំណត់ឲ្យបាននូវទិសដៅ និងគោលដៅការងារសំខាន់ៗសម្រាប់អនុវត្តន៍បន្ត និងដំណើរឆ្ពោះទៅមុខរបស់ក្រសួង ពិសេសក្នុងបរិបទនៃការប្រែប្រួលយ៉ាងឆាប់រហ័សនៃវិស័យប្រៃសណីយ៍ ទូរគមនាគមន៍ និងបច្ចេកវិទ្យាគមនាគមន៍ និងព័ត៌មាន (ICT) ។ ចុងបញ្ចប់ ឯកឧត្ដមរដ្ឋមន្ត្រី បានប្រកាសបើកសន្និបាតបូកសរុបលទ្ធផលការងារឆ្នាំ២០១៧ និង ទិសដៅការងារឆ្នាំ២០១៨ របស់ក្រសួងប្រៃសណីយ៍ និងទូរគមនាគមន៍ ចាប់ពីពេលនេះតទៅក្រោមបរិយាយកាសសប្បាយរីករាយផងដែរ៕
