នៅថ្ងៃទី០២ ខែមិថុនា ឆ្នាំ២០១៥ ឯកឧត្តម ប្រាក់ សុខុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានដឹកនាំគណៈប្រតិភូកម្ពុជា ចូលរួមពិព័រណ៍ និងវេទិកាផ្លាស់ប្តូរធុរកិច្ចពាក់ព័ន្ធនឹងប្រព័ន្ធផ្សព្វផ្សាយ ទូរគមនាគមន៍និងបច្ចេក វិទ្យាគមនាគមន៍ និងព័ត៌មាន រៀបចំដោយអាជ្ញាធរអភិវឌ្ឍគមនាគមន៍ និងព័ត៌មាន (Infocomm Development Authority-IDA) និងវេទិកាថ្នាក់រដ្ឋមន្រ្តីស្តីពីបច្ចេកវិទ្យាគមនាគមន៍ និងព័ត៌មានដែលត្រូវបានរៀបចំនៅថ្ងៃទី០៣ ខែមិថុនា ឆ្នាំ២០១៥ ដោយក្រសួងគមនាគមន៍ និងព័ត៌មានសិង្ហបុរី។
វេទិកាថ្នាក់រដ្ឋមន្រ្តីឆ្នាំ២០១៥ ត្រូវបានប្រកាសបើកដោយឯកឧត្តមបណ្ឌិត Yaacob IBRAHIM រដ្ឋមន្រ្តីក្រសួងគមនាគមន៍ និងព័ត៌មានសិង្ហបុរី និងមានការអញ្ចើញចូលរួមដោយឯកឧត្តមបណ្ឌិត Houlin ZHAO អគ្គលេខាធិការសហភាពទូរគមនាគមន៍អន្តរជាតិ ព្រមទាំងរដ្ឋមន្រ្តី/តំណាងរដ្ឋមន្រ្តីចំនួន ២០រូប មកពីទ្វីបអាស៊ី អឺរ៉ុបខាងកើត មជ្ឈឹមបូព៌ា និងអាហ្រី្វក និងវាគ្មិនមួយចំនួនមកពីស្ថាប័នសាធារណៈ សាកលវិទ្យាល័យ និងវិស័យឯកជន។ ប្រធានបទនៃវេទិកានេះ គឺ “ប្រជាជាតិឆ្លាតវៃ” ។
វេទិកានេះមានកិច្ចពិភាក្សាចំនួនបីវគ្គ ក្រោមប្រធានបទ៖ (១)-នវានុវត្តន៍សម្រាប់ប្រជាជាតិឆ្លាតវៃ (២)-តួនាទី របស់រដ្ឋាភិបាលនៅក្នុងប្រជាជាតិឆ្លាតវៃ និង(៣)-កិច្ចពិគ្រោះយោបល់ជាន់ខ្ពស់ស្តីពីប្រជាជាតិឆ្លាតវៃ និងត្រូវបានអមដោយកិច្ចពិភាក្សានាពិធីពិសាអាហារថ្ងៃត្រង់មួយ ដែលត្រូវបានរៀបចំដោយវេទិកាសេដ្ឋកិច្ចពិភពលោក (World Economic Forum, WEF)។
វគ្គទី១. កិច្ចប្រជុំបានពិភាក្សាអំពីលក្ខណៈគន្លឹះសំខាន់ៗនៃប្រព័ន្ធអេកូបច្ចេកវិទ្យាដែលជំរុញនវានុវត្តន៍នៅក្នុងការអភិវឌ្ឍប្រជាជាតិ ឬទីក្រុងឆ្លាតវៃ បញ្ហាប្រឈម កត្តាដែលនាំមកនូវភាពជោគជ័យ ជាពិសេសធនធានមនុស្សឆ្លាតវៃ និងការជំរុញឲ្យមានការចូលរួមរបស់ប្រជាពលរដ្ឋ និងតួអង្គដែលពាក់ព័ន្ធ ដើម្បីអភិវឌ្ឍប្រជាជាតិ ឬទីក្រុងឆ្លាតវៃ។
វគ្គទី២. កិច្ចប្រជុំបានពិភាក្សាអំពីតួនាទីរបស់រដ្ឋាភិបាលក្នុងការរៀបចំគោលនយោបាយ និងនិយ័តកម្ម សម្រាប់ការអភិវឌ្ឍប្រជាជាតិ ឬទីក្រុងឆ្លាតវៃ សំដៅលើកកម្ពស់ជីវភាពរស់នៅរបស់ប្រជាពលរដ្ឋ បង្កើតកាលានុវត្តន៍សម្រាប់ធុរកិច្ចតូចធំគ្រប់ប្រភេទ និងការផ្តល់សេវាសាធារណៈជូនប្រជាពលរដ្ឋឲ្យបានល្អប្រសើរ។
នាពិធីពិសារអាហារថ្ងៃត្រង់ កិច្ចប្រជុំត្រូវបានរៀបចំសម្រាប់តួអង្គសាធារណៈ និងឯកជនធ្វើការទំនាក់ទំនងគ្នា និងផ្លាស់ប្តូរយោបល់អំពីបច្ចេកវិទ្យាគមនាគមន៍ និងព័ត៌មាន និងអភិបាលកិច្ចប្រព័ន្ធអ៊ីនធឺណេត។
វគ្គទី៣. កិច្ចប្រជុំរវាងតួអង្គសាធារណៈ និងឯកជន ដើម្បីពិភាក្សាអំពីបញ្ហាប្រឈម និងកាលានុវត្តន៍ក្នុងការអភិវឌ្ឍប្រជាជាតិ ឬទីក្រុងឆ្លាតវៃ ការបង្កើនល្បឿនក្នុងការអភិវឌ្ឍវិស័យបច្ចេកវិទ្យាគមនាគន៍ និងព័ត៌មាន និងកត្តាគន្លឹះ សំខាន់ៗ ដើម្បីជំរុញឲ្យមានភាពជោគជ័យក្នុងកិច្ចសហប្រតិបត្តិការ និងភាពជាដៃគូ រវាងវិស័យសាធារណៈ និងឯកជន។
ឆ្លៀតក្នុងឱកាសវេទិកានេះដែរ ឯកឧត្តមរដ្ឋមន្រ្តីក៏បានជួបពិភាក្សាការងារជាមួយឯកឧត្តមបណ្ឌិត Houlin ZHAO ដើម្បីផ្លាស់ប្តូរទស្សនៈស្តីពីការអភិវឌ្ឍន៍ និងសហប្រតិបត្តិការផ្នែកទូរគមនាគមន៍ ព្រមទាំងការរៀបចំសកម្មភាពមួយចំនួន ដើម្បីអបអរសាទរខួប ១៥០ ឆ្នាំ នៅឆ្នាំនេះរបស់សហភាពទូរគមនាគមន៍អន្តរជាតិ(International Telecommunication Union-ITU)៕