ព្រឹកថ្ងៃទី៣១ ខែមករា ឆ្នាំ២០១៧ នៅមន្ទីរប្រៃសណីយ៍ និងទូរគមនាគមន៍ ខេត្តពោធិ៍សាត់ មានរៀបចំពិធីសម្ពោធដាក់ឳ្យដំណើរការជាផ្លូវការអគាររដ្ឋបាលថ្មីមន្ទីរប្រៃសណីយ៍ និងទូរគមនាគមន៍ ខេត្តពោធិ៍សាត់ មានទីតាំងនៅភូមិពាលញែក២ សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ ក្រោមអធិបតីភាពដ៏ខ្ពង់ខ្ពស់ឯកឧត្ដម ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍។
លោក អ៊ូ ឆៃ ប្រធានមន្ទីរប្រៃសណីយ៍ និងទូរគមនាគមន៍ ខេត្តពោធិ៍សាត់ បានធ្វើរបាយការណ៍សង្ខេបថា អគាររដ្ឋបាលថ្មីនេះបានចាប់ផ្តើមដំណើការសាងសង់នៅថ្ងៃទី២០ ខែតុលា ឆ្នាំ២០១៥ និងបានបញ្ចប់នៅថ្ងៃទី១៧ ខែមីនា ឆ្នាំ២០១៦។ អគារនេះសាងសង់ពីបេតុងមានកំពស់ពីរជាន់ តំបូលប្រក់ក្បឿង បណ្តោយប្រវែង ២១ម៉ែត្រ និងទទឹង ០៩ម៉ែត្រ ដែលបែងចែកចេញជា ១០បន្ទប់៖ បន្ទប់ប្រធានមន្ទីរ ០១បន្ទប់, បន្ទប់អនុប្រធានមន្ទីរ ០២បន្ទប់, បន្ទប់ការិយាល័យរដ្ឋបាល បុគ្គលិក និងហិរញ្ញវត្ថុ ០១បន្ទប់, បន្ទប់ការិយាល័យទូរគមនាគមន៍ ០១បន្ទប់, បន្ទប់ទទួលភ្ញៀវ ០១បន្ទប់, បន្ទប់ប្រជុំ ០១បន្ទប់, និងបន្ទប់ទឹកចំនួន ០៣។ ក្រៅពីនេះមន្ទីរក៏បានសាងសង់បន្ថែមនូវរបង ក្លោងទ្វារ ដងទង់ជាតិ កន្លែងដាក់តាំងព្រះឆាយាលក្ខណ៍ ចាក់សាបក្រាលការ៉ូឡា ជម្រករថយន្ត និងធ្វើសួនច្បារ។
ថ្លែងទៅកាន់អង្គពិធីនាពេលនោះ ឯកឧត្ដម ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានមានប្រសាសន៍ថា ពេលនេះយើងមានអគាររដ្ឋបាលថ្មីសម្រាប់បម្រើការងារជូនប្រទេសជាតិបានសមរម្យ ដូចច្នេះមន្ត្រីរាជការទាំងអស់នៃមន្ទីរ ប.ទ ខេត្តពោធិ៍សាត់ត្រូវខិតខំស្វែងរកប្រភពអាជីវកម្ម សេវាកម្មផ្សេងៗ ស្របតាមមុខជំនាញដូចជា សេវាបម្រើទាំងក្នុង និងក្រៅប្រទេស សេវាទូរស័ព្ទចល័ត អចល័ត និងសេវាអ៊ីនធឺណិតសម្តៅឆ្លើយតបទៅនឹងតម្រូវការទំនាក់ទំនងនាពេលបច្ចុប្បន្នរបស់ប្រជាពលរដ្ឋយើង។
នៅក្នុងឳកាសនេះដែរ ឯកឧត្ដមរដ្ឋមន្ត្រីបានចែកជូនវត្ថុអនុស្សាវរីយ៍ដល់សិស្សានុសិស្សចំនួន ២០០នាក់ ដោយក្នុងម្នាក់ៗទទួលបានសៀវភៅ ២ក្បាល ប៊ិច ២ដើម ថវិការ ៥០០០៛, លោកគ្រូអ្នកគ្រូ ១០នាក់ ម្នាក់ៗទទួលបានសារុងមួយថវិកា ២០០០០៛, យាយជីតាជី ២០នាក់ ម្នាក់ៗទទួលបានក្រណាត់សមួយដុំថវិការ ២០០០០៛, និវត្តន៍ជន ១៦នាក់ ម្នាក់ៗទទួលបានសារុងមួយថវិការ ៤០០០០៛, មន្ត្រីរាជការនិយោជិត ៣៤នាក់ ម្នាក់ៗទទួលបានសារុងមួយថវិកា ២០០០០៛, ប្រជាពលរដ្ឋ ២៥០នាក់ ម្នាក់ៗទទួលបានសារុងមួយ, កងកម្លាំងរក្សាសន្តិសុខ ២៥នាក់ ម្នាក់ៗទទួលបានសារុងមួយ និងថវិកា ២០០០០៛៕