នារាត្រីថ្ងៃទី២៥ ខែវិច្ឆិកា ឆ្នាំ២០១៦ នៅទីក្រុង Bandar Seri Begawan, ប្រទេសប្រ៊ុយណេដារូស្សាឡាម ឯកឧត្តម ត្រាំ អុីវតឹក រដ្ឋមន្រ្តីក្រសួងប្រៃសណីយ៍ និងទូរគមនាគមន៍ និងគណប្រតិភូក្រសួង បានចូលរួមពិធីប្រគល់ពានរង្វាន់ ICT អាស៊ានឆ្នាំ២០១៦ នៅក្នុងពិធីជប់លៀង (Gala Dinner) សម្រាប់កិច្ចប្រជុំរដ្ឋមន្ត្រីទូរគមនាគមន៍ និងព័ត៌មានវិទ្យាអាស៊ាន (TELMIN-16)។
ការប្រកាសពានរង្វាន់បច្ចេកវិទ្យាគមនាគមន៍ និងព័ត៌មាន អាស៊ានឆ្នាំ២០១៦ ជូនដល់ម្ចាស់ជ័យលាភីក្នុងវិញ្ញាសាប្រកួតប្រជែងចំនួន៦ រួមមាន: វិញ្ញាសាវិស័យសាធារណៈ, វិស័យឯកជន, ការសហការទទួលខុសត្រូវសង្គម(CSR), មាតិកាឌីជីថល, ការបង្កើតធុរកិច្ចថ្មី និងការស្រាវជ្រាវ និងអភិវឌ្ឍន៍។ ឆ្នាំ២០១៦នេះ កម្ពុជាដណ្តើមបានមេដាយចំនួន២គ្រឿង គឺមេដាយប្រាក់ ០១គ្រឿង ដែលអង្គការ ACTION IEC បាននាំយកផលិតផលឈ្មោះថា តោះFUND ទៅចូលរួមប្រកួតក្នុងវិញ្ញាសា«សហការទទួលខុសត្រូវសង្គម(CSR)» និងមេដាយសំរិទ្ធ ០១គ្រឿង បានទៅលើក្រុមហ៊ុន SEA VENTURES CO., LTD. ក្នុងវិញ្ញាសាការបង្កើតធុរកិច្ចថ្មី ដែលបាននាំយកផលិតផលឈ្មោះ CAMBOTICKET ទៅប្រកួតប្រជែង។ ឆ្នាំ២០១៤ កម្ពុជាធ្លាប់ដណ្តើមបានមេដាយមាស០១ គ្រឿងលើវិញ្ញាសាការបង្កើតធុរកិច្ចថ្មី និង២០១៥ កម្ពុជាក៏ដណ្តើមបានមេដាយមាស០១គ្រឿងដែរលើវិញ្ញាសាសហការទទួលខុសត្រូវសង្គម(CSR) ។