ផែនការមេបច្ចេកវិទ្យាព័ត៌មាន និងគមនាគមន៍អាស៊ានឆ្នាំ ២០១៥
សិក្ខាសាលាស្តីពីផែនការមេបច្ចេកវិទ្យាព័ត៌មាន និងគមនាគមន៍អាស៊ានឆ្នាំ ២០១៥បានប្រារព្ធឡើងកាលពីថ្ងៃទី២៦ វិច្ចិកាឆ្នាំ២០១៣ នៅសណ្ឋាគារភ្នំពេញ ក្រោមអធិបតីភាពឯកឧត្តម ប្រាក់ សុខុន រដ្ឋមន្រ្តីក្រសួងប្រៃសណីយ៍ និងទូរគមនាគមន៍។
ថ្លែងនៅក្នុងឱកាសបើកអង្គសិខាសាលា ឯកឧត្តមរដ្ឋមន្រ្តី ប្រាក់ សុខុន មានប្រសាសន៍ថា កាលពីថ្ងៃទី ១៤ និង១៥ ខែវិច្ឆិកា ឆ្នាំ២០១៣ កន្លងមកនេះរដ្ឋមន្រ្តីទូរគមនាគមន៍ និងព័ត៌មានវិទ្យាអាស៊ានបានជួនជុំគ្នាជាលើកទី១៣នៅប្រទេសសឹង្ហបុរីដើម្បីពិនិត្យអំពីលទ្ធផលពាក់កណ្តាលអាណត្តិ នៃការអនុវត្តន៍ផែនការមេបច្ចេកវិទ្យាព័ត៌មាន និងគមនាគមន៍អាស៊ានឆ្នាំ២០១៥។ ជាលទ្ធផល ក្នុងរយៈពេល៣ឆ្នាំនេះគម្រោងចំនួន៦០ត្រូវបានស្នើដោយរដ្ឋជាសមាជិក។ វិធានការណ៍ចំនួន៦២ភាគរយ នៃផែនការមេត្រូវបានអនុវត្ត និងសម្រេចដោយរដ្ឋជាសមាជិក។
ឯកឧត្តមមានប្រសាសន៍ទៀតថា សិក្ខាសាលានាពេលនេះមិនត្រឹមតែផ្តល់ឱកាសឱ្យយើងទាំងអស់គ្នាអាចបូកសរុបការអនុវត្តន៍ការងារក្នុងពេលកន្លងមកប៉ុណ្ណោះទេ ប៉ុន្តែថែមទាំងផ្តល់ឱកាសឱ្យយើងអាចរិះរកដំណោះស្រាយក្នុងទិសដៅធានាការសម្រេចបានផែនការមេអាស៊ានឆ្នាំ២០១៥នេះ ឯកឧត្តមសូមរំលេចនូវអាទិភាពមួយចំនួនសម្រាប់ការយកចិត្តទុកដាក់របស់យើងទាំងអស់គ្នា រួមមានការរក្សាសន្តិភាព និងសន្តិសុខតំបន់ គឺពិតជាមានសារសំខាន់ខ្លាំងណាស់សម្រាប់វិបុលភាព និងកំណើននៅក្នុងអាស៊ានទាំងមូល។ ក្នុងចំណោមគម្រោងទាំង ៦០ ដែលត្រូវបានសម្រេចកន្លងមកនៅក្នុងការអនុវត្តន៍ផែនការមេបច្ចេកវិទ្យាព័ត៌មាន និងគមនាគមន៍អាស៊ានកម្ពុជាពុំបានចូលរួមលើក និងអនុវត្តគម្រោងណាមួយនោះទេ។
