ក្រុមប្រឹក្សាភិបាលទូរគមនាគមន៍កម្ពុជាអាណត្តិទី៤ត្រូវបានប្រកាសចូលកាន់តំណែង
នារសៀលថ្ងៃទី០១ ខែមេសា ឆ្នាំ២០១៤ នៅទីស្នាក់ការធំទូរគមនាគមន៍កម្ពុជា ឯកឧត្តម ប្រាក់ សុខុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានអញ្ជើញជាអធិបតីភាពក្នុងពិធីប្រកាសតែងតាំងក្រុមប្រឹក្សាភិបាលទូរគមនាគមន៍កម្ពុជាអាណត្តិទី៤ និងសំណេះសំណាលជាមួយនិយោជិតដែលមានវត្តមាននៅទីនោះ។
ឯកឧត្តម ឡាយ ម៉ារីវ៉ូ អគ្គនាយកទូរគមនាគមន៍កម្ពុជា បានធ្វើរបាយការណ៍ស្តីពីលទ្ធផលការងាររបស់ក្រុមប្រឹក្សាភិបាលអាណត្តិទី៣ និងលទ្ធផលការងារដែលទូរគមនាគមន៍កម្ពុជាសម្រេចបានក្រោមការខិតខំប្រឹងប្រែងរួមរបស់ថ្នាក់ដឹកនាំ ក្រុមប្រឹក្សាភិបាល អគ្គនាយក និងនិយោជិតទាំងអស់ដែលបានយកអស់កម្លាំងកាយចិត្ត និងប្រាជ្ញាស្មារតីក្នុងការបន្តបំពេញតួនាទី និងកាតព្វកិច្ចដើម្បីបម្រើផលប្រយោជន៍រួមរបស់សហគ្រាសប្រកបដោយស្មារតីទទួលខុសត្រូវខ្ពស់។
ឯកឧត្តម លីវ គឹមហេង អគ្គនាយករដ្ឋបាលនៃក្រសួងប្រៃសណីយ៍និងទូរគមនាគមន៍ បានអានអនុក្រឹត្យរបស់រាជរដ្ឋាភិបាលលេខ៣៥១ អនក្រ.តត ចុះថ្ងៃទី០៣ ខែមីនា ឆ្នាំ២០១៤ ស្តីពីការតែងតាំងក្រុមប្រឹក្សាភិបាលទូរគមនាគមន៍កម្ពុជា ដែលមានឯកឧត្តម មាស ប៉ូ អនុរដ្ឋលេខាធិការក្រសួងប្រៃសណីយ៍និងទូរគមនាគមន៍ ជាប្រធាន, ឯកឧត្តម ជា វុធណា តំណាងក្រសួងសេដ្ឋកិច្ចនិងហិរញ្ញវត្ថុ ជាសមាជិក, ឯកឧត្តម កឹម រ័ត្នវិសិដ្ឋ តំណាងទីស្តីការគណៈរដ្ឋមន្ត្រី ជាសមាជិក, លោក ហាក់ រ័ត្ន តំណាងក្រសួងមហាផ្ទៃ ជាសមាជិក, ឯកឧត្តមឡាយ ម៉ារីវ៉ូ អគ្គនាយកទូរគមនាគមន៍កម្ពុជា ជាសមាជិក, តំណាងនិយោជិតទូរគមនាគមន៍កម្ពុជា ជាសមាជិក, ឯកឧត្តមងួន ម៉េងតិច តំណាងសភាពាណិជ្ជកម្ម ជាសមាជិក។ ក្នុងនោះក៏មានអនុក្រឹត្យមួយផ្សេងទៀត លេខ ៣២១ អនក្រ. តត ចុះថ្ងៃទី២៤ ខែមីនា ឆ្នាំ២០១៤ ស្តីពីការតែងតាំងលោកស្រី ង៉ែត ម៉ូវីឡែន បច្ចុប្បន្នជាប្រធាននាយកដ្ឋានសវនកម្មផ្ទៃក្នុងមូលដ្ឋាននៃអគ្គនាយកដ្ឋានសវនកម្មផ្ទៃក្នុងក្រសួងសេដ្ឋកិច្ចនិងហិរញ្ញវត្ថុ ជាមន្ត្រីត្រួតពិនិត្យរដ្ឋអមទូរគមនាគមន៍កម្ពុជាសម្រាប់អាណត្តិទី៤រយៈពេល០៣ឆ្នាំ ជំនួសលោកសុក វុធ ដែលបានបញ្ចប់អាណត្តិ។
ឯកឧត្តម មាស ប៉ូ ប្រធានក្រុមប្រឹក្សាភិបាលបានកោតសរសើរចំពោះនិយោជិតទូរគមនាគមន៍កម្ពុជាទាំងអស់ដែលបានខិតខំបំពេញការងារប្រកបដោយថាមភាពដើម្បីចូលរួមក្នុងការអភិវឌ្ឍន៍ទូរគមនាគមន៍កម្ពុជា ប្រកបដោយមោទនភាព និងផ្លែផ្កាគួរឲ្យកត់សម្គាល់។ ឯកឧត្តមបានប្តេជ្ញាចិត្តថា នឹងរួមគ្នាជាមួយនិយោជិតគ្រប់លំដាប់ថ្នាក់ធ្វើឲ្យទូរគមនាគមន៍កម្ពុជាឈរនៅលើទីផ្សារទូរគមនាគមន៍មួយដែលមានការប្រកួតប្រជែងខ្ពស់ និងអភិវឌ្ឍបច្ចេកវិទ្យាទំនើបៗបន្ថែមទៀតដើម្បីបម្រើសេចក្តីត្រូវការរបស់អតិថិជនដែលជាអ្នកប្រើប្រាស់។
ឯកឧត្តម ប្រាក់ សុខុន មានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បាននិងកំពុងយកចិត្តទុកដាក់ខ្ពស់ទៅលើវិស័យបច្ចេកវិទ្យាព័ត៌មាន និងគមនាគមន៍ដែលជាវិស័យអាទិភាព និងជាឆ្អឹងខ្នងសម្រាប់ទ្រទ្រង់ការអភិវឌ្ឍន៍សេដ្ឋកិច្ចជាតិ ព្រមទាំងការអភិវឌ្ឍន៍វិស័យដទៃទៀត។ ក្នុងន័យនេះ សហគ្រាសសាធារណៈទូរគមនាគមន៍កម្ពុជា មិនត្រឹមតែមានតួនាទីជាអ្នកផ្តល់សេវាជូនអតិថិជនប៉ុណ្ណោះទេ ប៉ុន្តែថែមទាំងមានតួនាទីជាសេនាធិការឲ្យក្រសួងប្រៃសណីយ៍និងទូរគមនាគមន៍ក្នុងការចូលរួមអភិវឌ្ឍន៍និងពង្រីកបណ្តាញឆ្អឹងខ្នងទូរគមនាគមន៍ជាតិឲ្យដល់តំបន់ជនបទ។
ឯកឧត្តមរដ្ឋមន្ត្រីមានប្រសាសន៍ទៀតថា ក្នុងឋានៈជាអ្នកផ្តល់សេវា ដែលនៅជាប់នឹងអតិថិជន ថ្នាក់ដឹកនាំនិងនិយោជិតទូរគមនាគមន៍កម្ពុជា ត្រូវប្រកាន់ខ្ជាប់នូវជំហរជាអ្នកបម្រើអតិថិជន តាមរយៈការធានាឲ្យបាននូវគុណភាពនៃសេវាគ្រប់ប្រភេទ និងភាពរហ័សរហួនក្នុងការផ្តល់សេវា ជាពិសេសត្រូវទប់ស្កាត់ឲ្យបានទាន់ពេលវេលា នូវរាល់ទង្វើអសកម្មទាំងឡាយដែលនាំឲ្យប៉ះពាល់ដល់អារម្មណ៍អតិថិជន និងកិត្តិយសព្រមទាំងសេចក្តីថ្លៃថ្នូររបស់ទូរគមនាគមន៍កម្ពុជា។
ឯកឧត្តមមានជំនឿថា ថ្នាក់ដឹកនាំ ក្រុមប្រឹក្សាភិបាល អគ្គនាយក និងនិយោជិតទាំងអស់របស់ទូរគមនាគមន៍កម្ពុជា នឹងចូលរួមយ៉ាងផុលផុសក្នុងកិច្ចសហការចែករម្លែកនូវបទពិសោធន៍ទៅវិញទៅមក សម្តៅរកឲ្យឃើញនូវចំណុចខ្លាំង និងចំណុចខ្សោយ ព្រមទាំងបញ្ហាប្រឈមនានា នៅក្នុងដំណើរការអាជីវកម្មរបស់ខ្លួន ហើយនិងអាចស្វែងរកឃើញនូវដំណោះស្រាយប្រកបដោយប្រសិទ្ធភាព មានលក្ខណៈស៊ីជម្រៅ និងវិសាលភាពកាន់តែធំទូលាយដើម្បីធ្វើយ៉ាងណាពង្រឹង នូវគុណភាពសេវាដែលបានផ្តល់ និងមានទំនុកចិត្តខ្ពស់ពីអតិថិជនគ្រប់ប្រភេទ៕
