កិច្ចប្រជុំដើម្បីស្វែងរកការគាំទ្រក្នុងការសិក្សាស្រាវជ្រាវអំពីការអភិវឌ្ឍន៍វិស័យប្រៃសណីយ៍នៅកម្ពុជា
រាជធានីភ្នំពេញ៖ ព្រឹកថ្ងៃទី១៧ ខែឧសភា ឆ្នាំ២០១៧ ឯកឧត្តម ឯក វណ្ណឌី រដ្ឋលេខាធិការក្រសួងប្រៃសណីយ៍ និងទូរគមនាគមន៍ អញ្ជើញដឹកនាំកិច្ចប្រជុំជាមួយប្រតិភូក្រុមហ៊ុន LODICS ដើម្បីស្វែងរកការគាំទ្រក្នុងការសិក្សាស្រាវជ្រាវអំពីការអភិវឌ្ឍន៍វិស័យប្រៃសណីយ៍នៅកម្ពុជា។
នៅក្នុងជំនួបនោះ ឯកឧត្តមបានលើកឡើងពីគោលបំណងពីការសិក្សាស្រាវជ្រាវដើម្បីរិះរកវិធីសាស្ត្រក្នុងការជំរុញសេវាប្រៃសណីយ៍អេឡិចត្រូនិច (E-Postal Service) និងពង្រីកទីផ្សារពាណិជ្ជកម្មអេឡិចត្រូនិចឲ្យរីកចំរើនឡើង។ ឯកឧត្ដមបានស្នើឲ្យភាគីកូរ៉េចូលរួមសហការណ៍ជាមួយក្រសួងដើម្បីពិនិត្យ និងរិះរកមធ្យោបាយដើម្បីជួយកែប្រែសេវាប្រៃសណីយ៍កម្ពុជាពីការអនុវត្តន៍តាមបែបបុរាណឲ្យក្លាយទៅជាការផ្តល់សេវាប្រៃសណីយ៍តាមបែបទំនើបវិញ។
ជាការឆ្លើយតប ភាគីកូរ៉េមានភាពសោមនស្សរីករាយក្នុងការត្រៀមខ្លួនសហការណ៍ជាមួយភាគីកម្ពុជា ដើម្បីជំរុញការអភិវឌ្ឍវិស័យប្រៃសណីយ៍តាមរយៈពាណិជ្ជកម្មអេឡិចត្រូនិច (E-Commerce)។ ភាគីកូរ៉េក៏បានសន្យាថានឹងធ្វើកិច្ចសហការណ៍ជាមួយកម្ពុជា ដើម្បីពិនិត្យមើលទៅលើការរៀបចំ បង្កើនសក្តានុភាពរបស់វិស័យប្រៃសណីយ៍កម្ពុជាឲ្យរីកចំរើនឡើង។
