កិច្ចប្រជុំសិក្សាស្វែងយល់ និងផ្លាស់ប្តូរបទពិសោធន៍លើវិស័យពាណិជ្ជកម្មអេឡិចត្រូនិច (E-Commerce)
រាជធានីភ្នំពេញ៖ នារសៀល ថ្ងៃទី០៦ ខែកក្កដា ឆ្នាំ២០១៧ នៅទីស្តីការក្រសួងប្រៃសណីយ៍ និងទូរគមនាគមន៍កម្ពុជា លោកជំទាវ ជ្រឹង បុទុមរង្សី អនុរដ្ឋលេខាធិការនៃក្រសួងប្រៃសណីយ៍ និងទូរគមនាគមន៍កម្ពុជា បានអញ្ជើញដឹកនាំកិច្ចប្រជុំជាមួយ គណៈប្រតិភូនៃមជ្ឈមណ្ឌល អាស៊ាន-កូរ៉េ ដើម្បីសិក្សាស្វែងយល់ និងផ្លាស់ប្តូរបទពិសោធន៍លើវិស័យពាណិជ្ជកម្មអេឡិចត្រូនិច (E-Commerce)។
នៅក្នុងកិច្ចប្រជុំនេះ មានការចូលរួមពីសាស្ត្រាចារ្យ អ្នកស្រាវជ្រាវ សហគ្រិនជាច្រើនរូប ដែលមកពីសាធារណរដ្ឋកូរ៉េ ដើម្បីចែករំលែកបទពីសោធន៍ និងស្វែងយល់ពីបែបបទ ក៏ដូចជា គោលនយោបាយ ក្នុងការវិនិយោគលើវិស័យ ពាណិជ្ជកម្មអេឡិចត្រូនិច។ ជាងនេះទៅទៀតភាគីកូរ៉េក៏ចង់ស្វែងយល់បន្ថែម នូវឱកាសទីផ្សារការងារ ធនធានមនុស្ស ការដឹកជញ្ជូន និងប្រព័ន្ធសុវត្តិភាព ដែលអាចចូលរួមសហការណ៍ជាមួយកម្ពុជាក្នុងការនាំចេញនាំចូលផលិតផលនៃប្រទេសទាំងពីរ។
ក្នុងនោះដែរ លោកជំទាវ បានរៀបរាប់ នូវគោលការណ៍មួយចំនួនដែលពាក់ព័ន្ធ គោលនយោបាយ ផែនការសកម្មភាព កិច្ចសហប្រតិបត្តិការនៃអន្តរក្រសួង និងប្រព័ន្ធសុវត្តិភាពលើវិស័យអនឡាញ ដែលអាចផ្តល់ភាពងាយស្រួលដល់សហគ្រិនដែលមានបំណងចង់បោះជំហានចូលទីផ្សារពាណិជ្ជកម្ម អេឡិចត្រូនិច នៅកម្ពុជា។
ជាចុងក្រោយលោកជំទាវក៏នឹងសង្ឃឹមថា ភាគីទាំងពីរអាចផ្សារភ្ជាប់ទំនាក់ទំនងដ៏ល្អ ជាមួយគ្នា ទាំងវិស័យរដ្ឋ និងវិស័យឯកជន។
