ពិធីចុះហត្ថលេខាលើអនុស្សារណៈយោគយល់គ្នាលើកម្មវិធី “អាហារូបករណ៍ SmartEdu” រវាង វិទ្យាស្ថានជាតិ (NIPTICT) ជាមួយក្រុមហ៊ុន (SMART AXIATA)
រាជធានីភ្នំពេញ៖ រសៀលថ្ងៃទី០៤ ខែតុលា ឆ្នាំ២០១៧ នៅទីស្ដីការក្រសួង ឯកឧត្ដម ត្រាំ អុីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ អញ្ជើញជាអធិបតីក្នុងពិធីចុះហត្ថលេខាលើអនុស្សារណៈយោគយល់គ្នាលើកម្មវិធី “អាហារូបករណ៍ SmartEdu” ដើម្បីគាំទ្រដល់យុវជនកម្ពុជាដែលមានទេពកោសល្យក្នុងវិស័យបច្ចេកវិទ្យាគមនាគមន៍ និងព័ត៌មាន (ICT)។ អនុស្សារណៈនេះត្រូវបានចុះហត្ថលេខារួមគ្នាដោយវិទ្យាស្ថានជាតិប្រៃសណីយ៍ ទូរគមនាគមន៍ និងបច្ចេកវិទ្យាគមនាគមន៍និងព័ត៌មាន ជាមួយក្រុមហ៊ុនស្មាតអាស្យាតា ដោយក្រុមហ៊ុនបានសន្យាថានឹងផ្ដល់មូលនិធិផ្គត់ផ្គង់ពេញលេញសម្រាប់ការសិក្សារបស់និស្សិតចំនួន ១០នាក់ ដែលមានបំណងសិក្សាថ្នាក់បរិញ្ញាបត្រលើជំនាញទាក់ទងនឹង ICT នៅវិទ្យាស្ថាន (NIPTICT)។
ក្នុងពិធីនេះ ឯកឧត្ដមរដ្ឋមន្ត្រី ត្រាំ អុីវតឹក បានអបអរសាទរ និងកោតសរសើរដល់ភាពជាដៃគូររវាងក្រុមហ៊ុនស្មាត និងវិទ្យាស្ថាន NIPTICT ដែលបានបង្កើតឲ្យចេញជាសមិទ្ធិផលថ្មីនេះឡើងក្នុងការចូលរួមអភិវឌ្ឍវិស័យអប់រំនៅកម្ពុជា ជាពិសេសការកសាងមូលដ្ឋានគ្រិះនៃសង្គមឌីជីថល។ ឯកឧត្ដមរដ្ឋមន្ត្រី បានស្នើឲ្យក្រុមហ៊ុនស្មាតបន្តជម្រុញ និងបង្កើតឲ្យមានការបណ្ដុះបណ្ដាលនៅក្នុងផ្នែកបច្ចេកវិទ្យាគមនាគមន៍ និងព័ត៌មាននេះបន្តទៅទៀត ដើម្បីជម្រុញធ្វើយ៉ាងណាបង្កើនធនធានមនុស្សនៅក្នុងវិស័យ ICT សម្រាប់ទ្រទ្រង់ និងវិវឌ្ឍន៍សង្គមកម្ពុជាឲ្យទៅជាសង្គមឌីជីថលនាពេលខាងមុខ៕
សម្រាប់ព័ត៌មានសម្អិតទាក់ទងនឹងកម្មវិធីអាហារូបករណ៍ SmartEdu លោកអ្នកអាចស្វែងរកបាននៅលើគេហទំព័ https://www.smart.com.kh/scholarship ។
