ឯកឧត្តមរដ្ឋលេខាធិការ កាន ច័ន្ទមេត្តា អនុញ្ញាតឲ្យលោក Miguel Eduardo Sanchez Martin និងលោក Michael Ehst ជួបពិភាក្សាការងារ
រាជធានីភ្នំពេញ៖ ព្រឹកថ្ងៃទី០៨ ខែធ្នូ ឆ្នាំ២០១៧ នៅទីស្ដីការក្រសួង ឯកឧត្តមបណ្ឌិត កាន ច័ន្ទមេត្តា រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានអនុញ្ញាតឲ្យលោក Miguel Eduardo Sanchez Martin សេដ្ឋកិច្ចវិទូជាន់ខ្ពស់ជំនាញសាកលគ្រប់គ្រងផ្នែកម៉ាក្រូសេដ្ឋកិច្ចនិងសារពើពន្ធ និងលោក Michael Ehst អ្នកឯកទេសលើវិស័យឯកជននៃ Innovation and Entrepreneurship Unit តំណាងជាន់ខ្ពស់របស់ធនាគារពិភពលោក ជួបពិភាក្សាការងារលើប្រធានបទ៖ Digital Entrepreneurship, Startup, and Innovation ដើម្បីត្រៀមប្រែក្លាយកម្ពុជាឆ្ពោះទៅសេដ្ឋកិច្ចឌីជីថលនៅឆ្នាំ២០២៣។ បច្ចុប្បន្ននេះ ក្រសួងប្រៃសណីយ៍ និងទូរគមនាគមន៍ កំពុងបន្តរៀបចំយុទ្ធសាស្ត្រស្តីពី Startup Digital Entrepreneurship សម្រាប់ឆ្នាំ២០១៨ ទៅឆ្នាំ២០២៣។
កិច្ចប្រជុំនេះត្រូវបានរៀបចំឡើងបន្ទាប់ពី ឯកឧត្តមបណ្ឌិត កាន ច័ន្ទមេត្តា និងឯកឧត្តម សេង សុភាព ប្រធានវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន បានជួបគណៈប្រតិភូធនាគារពិភពលោកនៅទីក្រុងតាលីន ប្រទេសអេស្តូនី កាលពីថ្ងៃទី២១ ខែវិច្ឆិកា ឆ្នាំ២០១៧ នាអំឡុងពេលកិច្ចប្រជុំកំពូលស្តីពី Startup Nation នៅទីក្រុងតាលីន ប្រទេសអេស្តូនី ពីថ្ងៃទី២០ ដល់ថ្ងៃទី២២ ខែវិច្ឆិកា ឆ្នាំ២០១៧៕
