កិច្ចប្រជុំពិភាក្សាក្រុមការងារគណៈកម្មាធិការរៀបចំជំរុញការអភិវឌ្ឍផ្នែកពាណិជ្ជកម្មអេឡិកត្រូនិកក្នុងវិស័យប្រៃសណីយ៍
រាជធានីភ្នំពេញ៖ នាព្រឹកថ្ងៃទី១៥ ខែធ្នូ ឆ្នាំ២០១៧ នៅទីស្ដីការក្រសួង ឯកឧត្តម ឯក វណ្ណឌី រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានអញ្ជើ់ញដឹកនាំកិច្ចប្រជុំពិភាក្សាក្រុមការងារគណៈកម្មាធិការរៀបចំជំរុញការអភិវឌ្ឍខាងផ្នែកពាណិជ្ជកម្មអេឡិកត្រូនិកក្នុងវិស័យប្រៃសណីយ៍ ដើម្បីពិភាក្សាការងារលើប្រធានបទសំខាន់ៗ ០៣គឺ៖
១.ការពិនិត្យទៅលើគម្រោងថវិកាក្នុងការរៀបចំផែនការយុទ្ធសាស្ត្រក្នុងការអភិវឌ្ឍសេវាប្រៃសណីយ៍ពីបែបបុរាណទៅបែបសម័យដោយផ្សារភ្ជាប់នឹងបច្ចេកវិទ្យាគមនាគមន៍ និងព័ត៌មាន
២.ការពិនិត្យទៅលើការស្នើសុំជួបរបស់អង្គការ JICA ទាក់ទងទៅនឹងការអនុវត្តរបស់វិស័យប្រៃសណីយ៍
៣.ការពិនិត្យមើលទៅលើផែនការក្នុងការរៀបចំបទដ្ឋានគតិយុត្តិ ដើម្បីជំរុញការអភិវឌ្ឍវិស័យប្រៃសណីយ៍បែបទំនើប។
ជាមួយគ្នានេះ ឯកឧត្តម លីវ គឹមហេង អគ្គនាយក នៃអគ្គនាយកដ្ឋានរដ្ឋបាល បានស្នើឲ្យក្រុមការងាររៀបចំគំរោងផែនការផ្សេងៗឲ្យបានរួចរាល់ដើម្បីពន្លឿនការរៀបចំផែនការយុទ្ធសាស្ត្រក្នុងការអភិវឌ្ឍវិស័យប្រៃសណីយ៍បានឆាប់រហ័ស។ ដូចគ្នានេះដែរ ឯកឧត្តមរដ្ឋលេខាធិការ ឯក វណ្ណឌី ក៏បានស្នើឲ្យក្រុមការងាររៀបចំឯកសារ និងព័ត៌មានដែលពាក់ព័ន្ធនឹងវិស័យប្រៃសណីយ៍ និងវិស័យភស្តុភារ ដើម្បីពិភាក្សាចែករំលែកបទពិសោធន៍ និងព័ត៌មានជាមួយអង្គការ JICA នាពេលខាងមុខនេះ។ ជាចុងក្រោយ ឯកឧត្តម ឯក វណ្ណឌី សង្ឃឹមថា កិច្ចការងារជំរុញការអភិវឌ្ឍសេវាពាណិជ្ជកម្មអេឡិកត្រូនិកក្នុងវិស័យប្រៃសណីយ៍ពិតជាទទួលបានជោគជ័យនាពេលឆាប់ៗនេះ៕
