វេទិកាស្ដីពី «កិច្ចសហប្រតិបត្តិការវិស័យបចេ្ចកវិទ្យាគមនាគមន៍ និងព័ត៌មាន កម្ពុជា-វៀតណាម ឆ្នាំ២០១៧»
រាជធានីភ្នំពេញ៖ នាព្រឹកថ្ងៃច័ន្ទ ១កើត ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១៨ ខែធ្នូ ឆ្នាំ២០១៧ នៅសណ្ឋាគារកាំបូឌីយ៉ាណា ក្រសួងប្រៃសណីយ៍ និងទូរគមនាគមន៍នៃព្រះរាជាណាចក្រកម្ពុជា សហការជាមួយក្រសួងព័ត៌មាន និងគមនាគមន៍ នៃសាធារណរដ្ឋសង្គមនិយមវៀតណាម បានរៀបចំ “វេទិកាសហប្រតិបត្តិការវិស័យបចេ្ចកវិទ្យាគមនាគមន៍ និងព័ត៌មាន កម្ពុជា-វៀតណាម ឆ្នាំ២០១៧” ដើម្បីពង្រឹងកិច្ចសហប្រតិបត្តិការក្នុងវិស័យបចេ្ចកវិទ្យាគមនាគមន៍ និងព័ត៌មាន និងការអបអរសាទរនូវខួប៥០ឆ្នាំនៃទំនាក់ទំនងទ្វេរភាគីរវាងព្រះរាជាណាចក្រកម្ពុជានិងសាធារណរដ្ឋសង្គមនិយមវៀតណាម ក្រោមអធិបតីភាព ឯកឧត្តមបណ្ឌិត កាន ច័ន្ទមេត្តា រដ្ឋលេខាធិការ និងជាតំណាងដ៏ខ្ពង់ខ្ពស់ ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍នៃព្រះរាជាណាចក្រកម្ពុជា និងឯកឧត្តមបណ្ឌិត Hoang Vinh Bao អនុរដ្ឋមន្ត្រីក្រសួងព័ត៌មាន និងគមនាគមន៍ នៃសាធារណរដ្ឋសង្គមនិយមវៀតណាម ដោយមានការចូលរួមពីវាគ្មិនមកពីស្ថាប័នរដ្ឋនិងឯកជនពីប្រទេសទាំងពីរ។
ក្នុងសន្ទរកថាបើក ឯកឧត្តមបណ្ឌិត កាន ច័ន្ទមេត្តា រដ្ឋលេខាធិការក្រសួងប្រៃសណីយ៍ និងទូរគមនាគមន៍កម្ពុជា បានស្វាគមន៍ និងថ្លែងអំណរគុណដល់ ឯកឧត្តមបណ្ឌិត អនុរដ្ឋមន្ត្រីក្រសួងព័ត៌មាន និងគមនាគមន៍វៀតណាម ដែលបានអញ្ជើញមកទស្សនកិច្ច និងបានចូលរួមជាអធិបតីភាពក្នុងវេទិការនេះ ហើយឯកឧត្តមបណ្ឌិត បានជូនជាយោបល់សម្រាប់វាគ្មិនក្នុងវេទិកាដើម្បីពិភាក្សារួមមាន៖
១) រដ្ឋាភិបាលតាមប្រព័ន្ធអេឡិចត្រូនិច (e-Government) ២) សន្តិសុខព័ត៌មានវិទ្យា (Cybersecurity) និង ៣)កិច្ចសហការគាំពារលើសហគ្រាសខ្នាត មីក្រូ តូច និងមធ្យម (Micro, Small, & Medium Enterprises “MSME”) ជាពិសេសក្រុមហ៊ុនដែលបង្កើតថ្មី (Start-up)។
ក្នុងសន្ទរកថាឆ្លើយតប ឯកឧត្តមបណ្ឌិត Hoang Vinh Bao អនុរដ្ឋមន្ត្រីក្រសួងព័ត៌មាន និងគមនាគមន៍វៀតណាម បានថ្លែងអំណរគុណដល់ ឯកឧត្តមបណ្ឌិត កាន ច័ន្ទមេត្តា រដ្ឋលេខាធិការ និងមន្ត្រីក្រសួងប្រៃសណីយ៍ និងទូរគមនាគមន៍កម្ពុជា ចំពោះកិច្ចស្វាគមន៍យ៉ាងកក់ក្តៅចំពោះដំណើរទស្សនកិច្ចរបស់ឯកឧត្តម និងការរៀបចំវេទិកានេះ ព្រមទាំងបានរំលឹកពីកិច្ចសហប្រតិបត្តិការរវាងកម្ពុជា និងវៀតណាមលើវិស័យនេះ ហើយស្វាគមន៍ និងវាយតម្លៃខ្ពស់ចំពោះប្រធានបទដែលបានលើកឡើងដោយឯកឧត្តមបណ្ឌិតរដ្ឋលេខាធិការ និងចាត់ទុកវេទិការនេះជាចំនុចចាប់ផ្តើមមួយដ៏សំខាន់នៃកិច្ចសហប្រតិបត្តិការវិស័យបចេ្ចកវិទ្យាគមនាគមន៍ និងព័ត៌មានរវាងកម្ពុជា និងវៀតណាម៕
