កិច្ចប្រជុំក្រុមការងារគណៈកម្មាធិការរៀបចំជំរុញការអភិវឌ្ឍវិស័យ Postal E-Services
រាជធានីភ្នំពេញ៖ នាព្រឹកថ្ងៃពុធ ០៩រោច ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១០ ខែមករា ឆ្នាំ២០១៨ នៅទីស្តីការក្រសួងប្រៃសណីយ៍ និងទូរគមនាគមន៍ លោកជំទាវ ជ្រឹង បុទុមរង្សី អនុរដ្ឋលេខាធិការ បានអញ្ជើញដឹកនាំកិច្ចប្រជុំក្រុមការងារគណៈកម្មាធិការរៀបចំជំរុញការអភិវឌ្ឍវិស័យ Postal E-Services ដើម្បីត្រួតពិនិត្យលើបទដ្ឋានគតិយុត្តិមួយចំនួនដែលអាចជួយជំរុញការអភវិឌ្ឍវិស័យប្រៃសណីយ៍ ឲ្យដើរទាន់ភាពជឿនលឿនរបស់បច្ចេកវិទ្យាគមនាគមន៍ និងព័ត៌មាន ។
នៅក្នុងកិច្ចប្រជុំនេះបានផ្តោតសំខាន់ទៅលើការជំរុញការអភិវឌ្ឍវិស័យប្រៃសណីយ៍សកលឲ្យផ្សារភ្ជាប់ជាមួយវិស័យប្រៃសណីយ៍តាមបែបអេឡិកត្រូនិក។ មួយវិញទៀត គោលនយោបាយជាតិថ្មីនេះក៏បានកំណត់គោលដៅក្នុងការពង្រីកសេវាប្រៃសណីយ៍នៅកម្ពុជាឲ្យបានទូលំទូលាយ និងពង្រឹងគុណភាពសេវាឲ្យបានល្អ ដែលប្រជាជនគ្រប់តំបន់អាចប្រើប្រាស់បានទាំងសេវាប្រៃសណីយ៍សកល និងសេវាប្រៃសណីយ៍តាមបែបអេឡិកត្រូនិក។
បន្ថែមពីនេះក្រសួងប្រៃសណីយ៍ និងទូរគមនាគមន៍បានពិនិត្យបន្ថែមទៅលើការវិវឌ្ឍរបស់វិស័យប្រៃសណីយ៍ដែលអាចជួយជំរុញប្រតិបត្តិករវិវឌ្ឍន៍សេវារបស់ខ្លួនឲ្យឆ្លើយតបទៅនឹងតំរូវការប្រជាជាជនក្នុងការផ្លាស់ប្តូរការរស់នៅ យោងតាមភាពទំនើបជឿនលឿននៃបច្ចេកវិទ្យាអេឡិកត្រូនិក។
