សិក្ខាសាលាផ្សព្វផ្សាយប្រកាសស្ដីពីការកែសម្រួល និងបំពេញបន្ថែមលេខកូដប្រៃសណីយ៍ឆ្នាំ២០១៧
រាជធានីភ្នំពេញ៖ ព្រឹកថ្ងៃច័ន្ទ ១២រោច ខែមាឃ ឆ្នាំរកា ព.ស.២៥៦១ ត្រូវនឹងថ្ងៃទី១២ ខែកុម្ភៈ ឆ្នាំ២០១៨ នៅទីស្ដីការក្រសួងប្រៃសណីយ៍ និងទូរគមនាគមន៍ មានរៀបចំសិក្ខាសាលាផ្សព្វផ្សាយប្រកាសស្ដីពីការកែសម្រួល និងបំពេញបន្ថែមលេខកូដប្រៃសណីយ៍ឆ្នាំ២០១៧ ក្រោមអធិបតីភាព ឯកឧត្ដម ឯក វណ្ណឌី រដ្ឋលេខាធិការ ក្រសួងប្រៃសណីយ៍ និងទូរគមនាគមន៍ ដោយមានការចូលរួមពីឯកឧត្ដម លោកជំទាវ ថ្នាក់ដឹកនាំ មន្ត្រីរាជការក្រសួងប្រៃសណីយ៏ និងលោក លោកស្រី តំណាងសហគ្រាស ប្រតិបត្តិករប្រៃសណីយ៍ជាច្រើនរូបផងដែរ។
លេខកូដប្រៃសណីយ៍ឆ្នាំ២០១៧ ដែលបានកែសម្រួល និងបំពេញបន្ថែមនាពេលនេះ គឺជាសមិទ្ធផលថ្មីមួយទៀតរបស់ក្រសួងប្រៃសណីយ៍ និងទូរគមនាគមន៍ អនុលោមទៅតាមបច្ចុប្បន្នភាពរចនាសម្ព័ន្ធគ្រប់គ្រងរដ្ឋបាលមានសង្គិនភាពជាមួយបទដ្ឋានអន្តរជាតិ និងឆ្លើយតបទាន់ពេលវេលាទៅនឹងតម្រូវការចំបាច់នៃវិស័យប្រៃសណីយ៍ដែលត្រូវសម្របខ្លួននៅក្នុងយុគសម័យនៃការរីកចម្រើនឥតឈប់ឈរនៃបច្ចេកវិទ្យា ពិសេសការកើនឡើងនូវសេវាតាមប្រព័ន្ធអ៊ីនធឺណិតដែលជាកម្លាំងសន្ទុះថ្មីឆ្ពោះទៅសេដ្ឋកិច្ចឌីជីថល។ កម្មវត្ថុសំខាន់នៃសិក្ខាសាលានេះគឺចង់ផ្សព្វផ្សាយអំពីប្រកាសស្ដីពីការកែសម្រួល និងបំពេញបន្ថែមលេខកូដប្រៃសណីយ៍ឆ្នាំ២០១៧ សម្រាប់កំណត់សម្គាល់អាសយដ្ឋានមួយ ឬបណ្ដុំអាសយដ្ឋានជាក់លាក់ណាមួយ ឬតំបន់ប្រៃសណីយ៍រាជធានី ខេត្ត ក្រុង ស្រុក ខណ្ឌ ឃុំ សង្កាត់ នៅព្រះរាជាណាចក្រកម្ពុជា ដែលនឹងមានប្រសិទិ្ធភាពអនុវត្តចាប់ពីត្រីមាសទី៣ នៃឆ្នាំ២០១៨ នេះតទៅ៕
