ឯកឧត្ដមរដ្ឋមន្ត្រី ត្រាំ អុីវតឹក អញ្ជើញជាអធិបតីបើកការដ្ឋានសាងសង់ហេដ្ឋារចនាសម្ព័ន្ធទូរស័ព្ទចល័ត ក្រោមក្របខ័ណ្ឌមូលនិធិកាតព្វកិច្ចសេវាសកលទូរគមនាគមន៍
កំពង់ឆ្នាំង៖ ព្រឹកថ្ងៃសៅរ៍ ៩កើត ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២១ ខែកក្កដា ឆ្នាំ២០១៨ ឯកឧត្តម ត្រាំ អុីវតឹក រដ្ឋមន្រ្តីក្រសួងប្រៃសណីយ៍ និងទូរគមនាគមន៍ និងជាប្រធានក្រុមប្រឹក្សាភិបាលមូលនិធិកាតព្វកិច្ចសេវាសកលវិស័យទូរគមនាគមន៍ (ក.ម.ក.ស.ទ) បានអញ្ជើញជាអធិបតីបើកការដ្ឋានសាងសង់ហេដ្ឋារចនាសម្ព័ន្ធទូរស័ព្ទចល័ត របស់ក្រុមហ៊ុនស្មាតអាស្សាតា (Smart Axiata) ក្រោមក្របខ័ណ្ឌមូលនិធិកាតព្វកិច្ចសេវាសកលវិស័យទូរគមនាគមន៍ (USO) ស្ថិតនៅឃុំតាំងក្រសាំង ស្រុកទឹកផុស ខេត្តកំពង់ឆ្នាំង។
មានប្រសាសន៍ក្នុងឳកាសនោះ ឯកឧត្ដមរដ្ឋមន្ត្រី បានលើកឡើងថា ក្នុងនាមជារដ្ឋសមាជិកនៃមូលនិធិកាតព្វកិច្ចសេវាសកលវិស័យទូរគមនាគមន៍ រដ្ឋាភិបាលកម្ពុជាបានបំពេញកាតព្វកិច្ចនេះយ៉ាងសកម្ម ដោយបានខិតខំស្វែងរកទុនវិនិយោគទាំងរដ្ឋ និងឯកជនដើម្បីជម្រុញការកសាងហេដ្ឋារចនាសម្ព័ន្ធតភ្ជាប់វិស័យទូរគមនាគមន៍ទាំងចល័ត និងអចល័ត ព្រមទាំងខិតខំធ្វើទំនើបកម្មប្រព័ន្ធទូរគមនាគមន៍ ពិសេសទូរស័ព្ទចល័ត និងអ៊ីនធឺណិតដោយបំពាក់នូវបច្ចេកវិទ្យាទំនើបចុងក្រោយដូចជាប្រព័ន្ធ 3G 4G និង 4.5G ដែលអាចឲ្យអ្នកប្រើប្រាស់ទូរស័ព្ទប្រភេទ Smart Phone អាចប្រើកម្មវិធីបណ្ដាញទំនាក់ទំនងសង្គមនានា និងមើលវីដេអូ បានយ៉ាងទូលំទូលាយ។ ឯកឧត្ដមរដ្ឋមន្ត្រី បានបន្តទៀតថា សេវាថ្មីៗជាច្រើនត្រូវបានជ្រាបចូលទៅក្នុងជីវភាពប្រចាំថ្ងៃ របស់ប្រជាពលរដ្ឋទាំងការងាររដ្ឋបាល ការងារទំនាក់ទំនង ការប្រកបអាជីវកម្ម ការកំសាន្ត ការទូទាត់ប្រាក់ និងការផ្ទេរប្រាក់ជាដើម។ ម្យ៉ាងទៀត ស្របនឹងនិន្នាការរីកចម្រើនឥតឈប់ឈរនៃបច្ចេកវិទ្យា ប្រជាពលរដ្ឋយើងមួយចំនួនបានចាប់ផ្តើមទទួលបាននូវផលប្រយោជន៍ ដោយការបង្កើតមុខរបរថ្មី ឬពង្រីកមុខរបររបស់ខ្លួនតាមរយៈការលក់ដូរទំនិញ ឬសេវាកម្មតាមបណ្តាញសង្គម Facebook ឬប្រព័ន្ធអ៊ីនធឺណិត ដែលស្គាល់ជាទូទៅថាជាពាណិជ្ជកម្មអេឡិកត្រូនិក (E-Commerce)។ ក្រៅពីនេះសេវាទាំងនេះក៏បានផ្តល់ឱកាសដល់សិស្សានុសិស្ស និងនិស្សិតអាចរៀនសូត្រពីចម្ងាយ (Distance Learning) និងការស្រាវជ្រាវស្វែងរកព័ត៌មាន និងឯកសារល្អៗ ជាជំនួយស្មារតីដល់ការសិក្សារបស់ខ្លួន។
ឯកឧត្ដមរដ្ឋមន្ត្រី បានថ្លែងនូវអំណរគុណដល់ប្រតិបត្តិករទូរគមនាគមន៍ទាំងអស់ ដែលបានចូលរួមបំពេញកាតព្វកិច្ចបង់ថវិកាចូលមូលនិធិកាតព្វកិច្ចសេវាសកលទូរគមនាគមន៍ ដើម្បីជាការរួមចំណែកក្នុងការបន្តនូវអាទិភាពរបស់រាជរដ្ឋាភិបាលក្នុងការពង្រឹកវិសាលភាព និងប្រសិទ្ធភាពនៃហេដ្ឋារចនាសម្ព័ន្ធឱ្យបានដល់តំបន់ជនបទ និងតំបន់ដាច់ស្រយាល។ ជាពិសេសអរគុណចំពោះ ក្រុមហ៊ុនស្មាត អាស្សាតា ដែលបានអនុវត្តទៅតាមគោលនយោបាយ និងបទប្បញ្ញត្តិរបស់រាជរដ្ឋាភិបាល ដោយចូលរួមជាមួយក្រសួងប្រៃសណីយ៍ និងទូរគមនាគមន៍ ក្នុងការពង្រីកវិសាលភាពសេវាទូរស័ព្ទចល័តរបស់ខ្លួនមកដល់តំបន់នេះ។ ទន្ទឹមនឹងនេះ ឯកឧត្ដមរដ្ឋមន្ត្រី បានលើកទឹកចិត្តឱ្យប្រតិបត្តិករដទៃទៀតបន្តចូលរួមការអនុវត្តកាតព្វកិច្ចសេវាសកលទូរគមនាគមន៍នេះ ដើម្បីជាការចូលរួមចំណែកជាមួយរាជរដ្ឋាភិបាលកម្ពុជាក្នុងការអភិវឌ្ឍន៍វិស័យទូរគមនាគមន៍នៅទីជនបទប្រកបដោយនិរន្តរភាព៕
