សិក្ខាសាលាពិភាក្សា ស្តីពី "កិច្ចសហប្រតិបត្តិការរដ្ឋាភិបាលអេឡិកត្រូនិកកម្ពុជា-កូរ៉េ" ក្រោមអធិបតីភាព ឯកឧត្ដមអនុរដ្ឋលេខាធិការ អេ សុភា
រសៀលថ្ងៃសុក្រ ១៥រោច ខែកត្តិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៧ ខែធ្នូ ឆ្នាំ២០១៨ នៅទីស្តីការក្រសួងប្រៃសណីយ៍ និងទូរគមនាគមន៍ ឯកឧត្ដម អេ សុភា អនុរដ្ឋលេខាធិការ ក្រសួងប្រៃសណីយ៍និងទូរគមនាគមន៍ បានអញ្ជើញជាអធិបតីក្នុងសិក្ខាសាលាពិភាក្សាស្តីពី “កិច្ចសហប្រតិបត្តិការរដ្ឋាភិបាលអេឡិកត្រូនិកកម្ពុជា-កូរ៉េ” ដោយមានការអញ្ជើញចូលរួមពីតំណាងភាគីកូរ៉េ ព្រមទាំងមន្ត្រីជំនាញរបស់ក្រសួងប្រៃសណីយ៍និងទូរគមនាគមន៍ និងអគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ។
សិក្ខាសាលានេះ ត្រូវបានរៀបចំឡើងក្រោមកិច្ចសហប្រតិបត្តិការរវាងនាយកដ្ឋានរដ្ឋាភិបាលអេឡិកត្រូនិកសកលរបស់ក្រសួងមហាផ្ទៃ នៃសាធារណរដ្ឋកូរ៉េ ជាមួយនាយកដ្ឋានរដ្ឋាភិបាលអេឡិកត្រូនិក នៃក្រសួងប្រៃសណីយ៍និងទូរគមនាគមន៍កម្ពុជា ក្នុងគោលបំណងសំខាន់ដើម្បីចែករំលែកចំណេះដឹងអំពីមូលដ្ឋានគ្រឹះរបស់រដ្ឋាភិបាលអេឡិកត្រូនិកកូរ៉េ ការធ្វើបទបង្ហាញអំពីរបាយការណ៍លទ្ធផលនៃការស្រាវជ្រាវ និងផែនការពង្រឹងកិច្ចសហប្រតិបត្តិការជាមួយប្រទេសកូរ៉េក្នុងការអភិវឌ្ឍន៍រដ្ឋាភិបាលអេឡិកត្រូនិកកម្ពុជា៕
