ក្រសួងប្រៃសណីយ៍និងទូរគមនាគមន៍រៀបចំកម្មវិធីពង្រឹងសមត្ថភាពមន្រ្តីតំណាងមកពីគ្រប់ក្រសួង-ស្ថាប័នក្នុងការរៀបចំវេទិកាវេបសាយជាតិសម្រាប់កម្ពុជា (Cambodia National Portal)
ឯកឧត្តម ជុន វ៉ាត អគ្គនាយកនៃអគ្គនាយកដ្ឋានបច្ចេកវិទ្យាគមនាគមន៍ និងព័ត៌មាន
រាជធានីភ្នំពេញ៖ ព្រឹកថ្ងៃច័ន្ទ ១៣រោច ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៤ ខែមីនា ឆ្នាំ២០១៩ នៅទីស្តីការក្រសួង ឯកឧត្តម ជុន វ៉ាត អគ្គនាយកនៃអគ្គនាយកដ្ឋានបច្ចេកវិទ្យាគមនាគមន៍និងព័ត៌មាននៃក្រសួងប្រៃសណីយ៍ និងទូរគមនាគមន៍ បានអញ្ជើញបើកសិក្ខាសាលាពិគ្រោះយោបល់ស្តីពី “វិធីសាស្ត្រ និងយន្តការអនុវត្តវេបសាយជាតិ” ដោយមានការចូលរួមពី មន្រ្តីរាជការមកពីគ្រប់ក្រសួង-ស្ថាប័នរាជរដ្ឋាភិបាល និងអង្គភាពពាក់ព័ន្ធ សរុបប្រមាណ ៧៥នាក់។ សិក្ខាសាលានេះ ជាផ្នែកមួយនៃការអនុវត្តកម្មវិធីកសាងសមត្ថភាពលើវិស័យបច្ចេកវិទ្យាគមនាគមន៍ និងព័ត៌មានដំណាក់កាលទី២ នៃកិច្ចសហប្រតិបត្តការរវាងអគ្គនាយកដ្ឋាន បច្ចេកវិទ្យាគមនាគមន៍និងព័ត៌មាន និងភាគីសិង្ហបូរី Singapore Cooperation Enterprise (SCE) ដែលផ្តោតលើគម្រោងអាទិភាពចំនួន ០២ គឺ៖ គម្រោងកសាងសមត្ថភាពក្នុងការរៀបចំវេទិកាវេបសាយជាតិ(National Web Portal) និងគម្រោងកសាងសមត្ថភាពក្នុងការរៀបចំស្ថាបត្យកម្មសហគ្រាសរដ្ឋាភិបាល (Government Enterprise Architecture – GEA)។
គម្រោងកសាងសមត្ថភាពក្នុងការរៀបចំវេទិកាវេបសាយជាតិ(National Web Portal) ផ្តោតលើការពង្រឹងជំនាញដល់មន្រ្តីបង្គោលតំណាងពីគ្រប់ក្រសួង-ស្ថាប័នអំពី៖
– ទិដ្ឋភាពទូទៅនៃវេទិកាវេបសាយជាតិ និងគំរូជោគជ័យរបស់អន្តរជាតិ
– ពិគ្រោះយោបល់អំពីវិធីសាស្ត្រ យន្តការ និងការរៀបចំផែនការអនុវត្តវេបសាយជាតិ
– សិក្ខាកាមដែលបានឆ្លងកាត់វគ្គបណ្តុះបណ្តាលតំណាងមកពីបណ្តាក្រសួង-ស្ថាប័ន នឹងក្លាយជាមន្រ្តីជំនាញ ក្នុងការចូលរួមអនុវត្តរៀបចំវេបសាយជាតិសំរាប់កម្ពុជារួមគ្នា។
មានប្រសាសន៍នាឱកាសនោះ ឯកឧត្តម ជុន វ៉ាត ថ្លែងថា កម្មវិធីកសាងសមត្ថភាពនេះ នឹងផ្តល់នូវឱកាសដល់មន្រ្តីបង្គោលក្នុងការស្វែងយល់ ផ្លាស់ប្តូរបទពិសោធន៍អំពីគំរូអនុវត្តជោគជ័យរបស់អន្តរជាតិ និងផ្តល់នូវចំនេះដឹងថ្មីៗបន្ថែមទៀតអំពីវិធីសាស្រ្តនិងយន្តការរៀបចំផែនការ អនុវត្តវេបសាយជាតិ ដែលនឹងក្លាយជាធនធានដ៏សំខាន់របស់រាជរដ្ឋាភិបាល ដើម្បីនឹងសហការរួមគ្នារៀបចំវេបសាយជាតិកម្ពុជា៕
