ឯកឧត្តមរដ្ឋមន្ត្រី ត្រាំ អុីវតឹក អញ្ជើញដឹកនាំកិច្ចប្រជុំពិភាក្សាស្ដីពីការដាក់ដំណើរការសាកល្បង Telemedicine នៅឃុំជៀប ស្រុកទឹកផុស ខេត្តកំពង់ឆ្នាំង
ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍
រាជធានីភ្នំពេញ៖ ព្រឹកថ្ងៃពុធ ០១កើត ខែផល្គុន ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៦ ខែមីនា ឆ្នាំ២០១៩ នៅទីស្តីការក្រសួង ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានអញ្ជើញដឹកនាំកិច្ចប្រជុំពិភាក្សាស្ដីពីការដាក់ដំណើរការសាកល្បង Telemedicine នៅឃុំជៀប ស្រុកទឹកផុស ខេត្តកំពង់ឆ្នាំង។ កិច្ចប្រជុំនេះមានការចូលរួមធ្វើបទបង្ហាញដោយក្រុមអ្នកជំនាញបច្ចេកទេសមកពីអគ្គនាយកដ្ឋានបច្ចេកវិទ្យាគមនាគមន៍និងព័ត៌មាន ដោយបានបង្ហាញពីគម្រោងនៃការដាក់ដំណើរការសាកល្បងនេះផងដែរ។
*Telemedicine គឺជាដំណើរការនៃការធ្វើរោគវិនិច្ឆ័យ និងការព្យាបាលអ្នកជំងឺពីចម្ងាយ តាមរយៈការប្រើប្រាស់បច្ចេកវិទ្យាព័ត៌មាន ដោយមិនចាំបាច់មើលឃើញដោយផ្ទាល់។ វេជ្ជបណ្ឌិតអាចប្រើប្រាស់ការផ្សាយបន្តផ្ទាល់ ដូចជា វីដេអូ (Video Conference), សម្លេង (Audio), ឬផ្ញើសារបន្ទាន់ (Message) ដើម្បីដោះស្រាយការព្រួយបារម្ភរបស់អ្នកជំងឺ និងធ្វើរោគវិនិច្ឆ័យពីស្ថានភាពរបស់អ្នកជំងឺពីចម្ងាយ។ ក្នុងន័យនេះ ការដាក់ដំណើរការសាកល្បង Telemedicine ក្នុងឃុំជៀប ស្រុកទឹកផុស ខេត្តកំពង់ឆ្នាំង មានគោលបំណងសំខាន់គឺ៖
-ផ្តល់ការគាំទ្រសុខភាពនៅជនបទដោយប្រើប្រាស់បច្ចេកវិទ្យាព័ត៌មាន
-ផ្តល់ភាពងាយស្រួល និងឆាប់រហ័សដល់វេជ្ជបណ្ឌិតក្នុងតំបន់ សុំជំនួយពីវេជ្ជបណ្ឌិតឯកទេសនៅមន្ទីរពេទ្យជាតិក្នុងការធ្វើរោគវិនិច្ឆ័យពីចំងាយតាមរយៈប្រព័ន្ធ Video Conference
-ធ្វើអោយប្រសើរឡើងក្នុងការរក្សាទុកទិន្នន័យអ្នកជំងឺប្រភេទជំងឺ រោគវិនិច្ឆ័យ វិធីព្យាបាល និងប្រភេទឱសថដែលបានប្រើប្រាស់ទៅក្នុងប្រព័ន្ធទិន្នន័យរួមមួយដែលអាចចែករំលែកទៅកាន់មន្ទីរពេទ្យផ្សេងៗបាន៕
