ឯកឧត្តមរដ្ឋមន្ត្រី ត្រាំ អុីវតឹក អញ្ជើញចូលរួមសន្និសីទអាស៊ានស្តីពី “5G” នៅទីក្រុងហាណូយ ប្រទេសវៀតណាម
ប្រទេសវៀតណាម៖ ថ្ងៃព្រហស្បតិ៍ ០១រោច ខែផល្គុន ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២១ ខែមីនា ឆ្នាំ២០១៩ ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានអញ្ជើញដឹកនាំគណៈប្រតិភូក្រសួង ចូលរួមសន្និសីទអាស៊ានស្តីពី “5G” ដែលនឹងប្រព្រឹត្តទៅនៅថ្ងៃទី២១ ដល់ថ្ងៃទី២២ ខែមីនា ឆ្នាំ២០១៩ នៅទីក្រុងហាណូយ ប្រទេសវៀតណាម។ សន្និសីទស្ដីពី “5G” នេះមានការចូលរួមពីបណ្តាប្រទេសសមាជិកអាស៊ានទាំង១០ ព្រមទាំងប្រទេសជាដៃគូសន្ទនារួមមាន ប្រទេសចិន ជប៉ុន កូរ៉េ ឥណ្ឌា តំណាងសហភាពទូរគមនាគមន៍អន្តរជាតិITU តំណាងGSMA ប្រតិបត្តិករ និងភាគីពាក់ព័ន្ធជាច្រើនរូប។
នៅក្នុងសន្និសីទនេះដែរ មានការធ្វើបទបង្ហាញចែករំលែកព័ត៌មានពីបណ្តាប្រទេសនិងស្ថាប័នដែលចូលរួម លើកិច្ចការដែលរៀបចំដើម្បីត្រៀមសម្រាប់ 5G ក្នុងនោះរួមមាន៖ ការរៀបចំគោលនយោបាយជាតិ បណ្តាញការកសាងហេដ្ឋារចនាសម្ព័ន្ធ សន្តិសុខ ព័ត៌មានវិទ្យា ការគ្រប់គ្រងវិសាលគមន៍ ការវិនិយោគ និងកិច្ចសហប្រតិបត្តិការ ក្នុងក្របខណ្ឌអាស៊ានជាដើម។
នៅក្នុងឱកាសចូលរួមសន្និសីទនេះ ឯកឧត្តមរដ្ឋមន្ត្រី និងគណៈប្រតិភូក្រសួង បានជួបពិភាក្សាការងារជាមួយអាជ្ញាធរសន្តិសុខព័ត៌មានរបស់ក្រសួងព័ត៌មាន និង គមនាគមន៍វៀតណាម(MIC) ស្តីពីផែនការរៀបចំមជ្ឈមណ្ឌលសន្តិសុខព័ត៌មាននៅក្រសួងប្រៃសណីយ៍និងទូរគមនាគមន៍អោយអោយរួចរាល់ត្រឹមខែតុលាឆ្នាំ២០១៩ ស្របតាមស្មារតីនៃជំនួបពិភាក្សាការងាររវាងសម្តេចតេជោនាយករដ្ឋន្ត្រី ជាមួយឯកឧត្តមរដ្ឋមន្ត្រី MIC នាថ្ងៃទី១៤ ខែមីនា ឆ្នាំ២០១៩ ក្នុងដំណើរទស្សនកិច្ចនៅកម្ពុជា នាពេលថ្មីៗនេះ ក្នុងការជួយរៀបចំបង្កើតមជ្ឈមណ្ឌលសន្តិសុខពត៌មានវិទ្យានៅក្នុងក្រសួងប្រៃសណីយ៍ និងទូរគនាគមន៍។
ជាមួយគ្នានេះ គណៈប្រតិភូកម្ពុជាបានអញ្ជើញ ទៅទស្សនកិច្ចនៅទីស្នាក់ការកណ្តាល ក្រុមហ៊ុនViettel និងជួបពិភាក្សាការងារជាមួយអគ្គនាយកក្រុមហ៊ុនViettel Group ផងដែរ៕
