ពិធីចុះហត្ថលេខាលើអនុស្សរណៈយោគយល់គ្នា ស្តីពីភាពជាដៃគូ ក្នុងការរួមគ្នាអភិវឌ្ឍន៍ និងដាក់ឱ្យប្រើប្រាស់បច្ចេកវិទ្យាទូរគមនាគមន៍ជំនាន់ទី៥(5G)មុនគេ រវាងទូរគមនាគមន៍កម្ពុជា(ទ.ក.) និងក្រុមហ៊ុន Huawei Technologies (Cambodia) Co.,Ltd នៅរដ្ឋធានីប៉េកាំង សាធារណរដ្ឋប្រជាមានិតចិន
![Ministry of Post and Telecommunications](https://asset.cambodia.gov.kh/mptc/2020/05/qRfGQDPh-mptc-media-3828.jpg)
ព្រឹកថ្ងៃអាទិត្យ ៩រោច ខែចេត្រ ឆ្នាំកុរ ឯកស័ក ព.ស.២៥៦២ ត្រូវនឹងថ្ងៃទី២៨ ខែមេសា ឆ្នាំ២០១៩ នៅរដ្ឋធានីប៉េកាំង សាធារណរដ្ឋប្រជាមានិតចិន ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍និងទូរគមនាគមន៍ និងជាប្រធានក្រុមប្រឹក្សាភិបាលទូរគមនាគមន៍កម្ពុជា បានចុះហត្ថលេខាលើអនុស្សរណៈយោគយល់គ្នារវាងទូរគមនាគមន៍កម្ពុជា(ទ.ក.) និងក្រុមហ៊ុន Huawei Technologies (Cambodia) Co.,Ltd ស្តីពីភាពជាដៃគូក្នុងការអភិវឌ្ឍ និងការដាក់ឱ្យប្រើប្រាស់មុនគេរួមគ្នានូវបច្ចេកវិទ្យាទូរគមនាគមន៍ជំនាន់ទី៥(5G) ដោយមានការអញ្ជើញចូលរួមជាសក្ខីភាពដ៏ខ្ពង់ខ្ពស់ ពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងលោក Li Jinge អនុប្រធានក្រុមហ៊ុន Huawei ។
ក្នុងកិច្ចសហប្រតិបត្តិការនេះ ប្រទេសកម្ពុជានឹងក្លាយជាអ្នកត្រួសត្រាយផ្លូវ និងប្រើប្រាស់បច្ចេកវិទ្យានេះមុនគេនៅក្នុងតំបន់អាស៊ាន។ ដើម្បីអនុវត្តតាមយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល ក្រសួងប្រៃសណីយ៍និងទូរគមនាគមន៍បានតម្រង់ទិសឱ្យទូរគមនាគមន៍កម្ពុជាដែលជាក្រុមហ៊ុនរដ្ឋ ឱ្យមានសមត្ថភាពខ្ពស់លើការងារដឹកនាំ និងគ្រប់គ្រងទៅលើវិស័យទូរគមនាគមន៍និងបច្ចេកវិទ្យាគមនាគមន៍និងព័ត៌មាន ក្នុងការត្រៀមខ្លួនសម្រាប់សេដ្ឋកិច្ចឌីជីថល និងបដិវត្ដន៍ឧស្សាហកម្មជំនាន់ទី៤.០។
សម្ដេចតេជោនាយករដ្ឋមន្ត្រី បានមានប្រសាសន៍ថា ការអភិវឌ្ឍអុីនធឺណិតល្បឿនលឿនពិតជាមានសារ:សំខាន់ហើយសម្តេចតេជោ ចង់ឃើញអ៊ីនធឺណិតល្បឿនលឿន គ្របដណ្តប់ទៅដល់ជនបទ។ ព្រះរាជាណាចក្រកម្ពុជាត្រូវការនូវបច្ចេកវិទ្យាថ្មីៗ ទំនើបៗសម្រាប់អភិវឌ្ឍវិស័យនេះ។ លោកអនុប្រធានក្រុមហ៊ុន Huawei បានជម្រាបជូនសម្តេចតេជោនាយករដ្ឋមន្ត្រីថា ប្រទេសកម្ពុជាជាប្រទេសទីមួយនៅក្នុងតំបន់អាស៊ានដែលបានចុះហត្ថលេខាលើកិច្ចព្រមព្រៀងអភិវឌ្ឍន៍ទៅលើបច្ចេកវិទ្យាថ្មី5G ជាមួយក្រុមហ៊ុន ហើយលោកសូមគាំទ្រ និងប្តេជ្ញាចិត្តរួមគ្នាក្នុងសម្រេចនូវសមិទ្ធផលនានា សំដៅចូលរួមសម្រេចនូវទស្សនវិស័យនៃរាជរដ្ឋាភិបាលកម្ពុជា៕