ឯកឧត្តមរដ្ឋលេខាធិការ កាន ច័ន្ទមេត្តា ទទួលជួបជាមួយលោកលេខាធិការទី២ នៃស្ថានទូតជប៉ុនប្រចាំនៅព្រះរាជាណាចក្រកម្ពុជា ស្តីពី “កិច្ចពិភាក្សាភាគីពាក់ព័ន្ធវិស័យ ICT កម្ពុជា – ជប៉ុនលើកទី៤”
រាជធានីភ្នំពេញ៖ រសៀលថ្ងៃចន្ទ ១៣រោច ខែអាសាឍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៩ ខែកក្កដា ឆ្នាំ២០១៩ នៅទីស្តីការក្រសួង ឯកឧត្តម កាន ច័ន្ទមេត្តា រដ្ឋលេខាធិការក្រសួងប្រៃសណីយ៍និងទូរគមនាគមន៍ បានទទួលជួបពិភាក្សាការងារជាមួយ លោក Izumi MATSUMOTO លេខាធិការទី២នៃស្ថានទូតជប៉ុនប្រចាំនៅព្រះរាជាណាចក្រកម្ពុជា និងប្រតិភូផ្សេងទៀតមកពីអង្គការនិងក្រុមហ៊ុនមួយចំនួន ដើម្បីពិភាក្សាអំពី
១). កិច្ចសហប្រតិបត្តិការរួមគ្នារវាងកម្ពុជា-ជប៉ុនក្នុងការអភិវឌ្ឍវិស័យ ICT និង
២). ការជំរុញក្នុងការពង្រឹងធនធានមនុស្សក្នុងវិស័យ ICT ។
តាមរយៈកិច្ចប្រជុំនេះ ភាគីទាំងពីរបានឯកភាពស្វែងរកលទ្ធភាពក្នុងការអនុវត្តគម្រោងរួមគ្នាដើម្បីជំរុញធុរកិច្ចក្នុងវិស័យ ICT ។ ទន្ទឹមនឹងនេះ ភាគីជប៉ុននឹងស្វែងរកលទ្ធភាពក្នុងការផ្តល់អាហារូបករណ៍ដល់មន្រ្តីក្រសួង និងសិស្សានុសិស្សកម្ពុជាផងដែរ៕
