ពិធីចុះហត្ថលេខាលើអនុស្សរណៈយោគយល់គ្នារបស់ដៃគូវិនិយោគឯកជន និងសាធារណៈ រវាង ទូរគមនាគមន៍កម្ពុជា ជាមួយ ក្រុមហ៊ុន Viettel
រាជធានីភ្នំពេញ៖ ព្រឹកថ្ងៃព្រហស្បតិ៍ ០៣កើត ខែអាសាឍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៤ ខែកក្កដា ឆ្នាំ២០១៩ នៅទីស្តីការក្រសួង ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានអញ្ជើញជាអធិបតីក្នុងពិធីចុះហត្ថលេខាលើអនុស្សរណៈយោគយល់គ្នារបស់ដៃគូវិនិយោគឯកជន និងសាធារណៈ រវាងទូរគមនាគមន៍កម្ពុជា ជាមួយ ក្រុមហ៊ុន Viettel ស្តីពីកិច្ចសហប្រតិបត្តិការលើការអភិវឌ្ឍវិស័យទូរគមនាគមន៍។ ពិធីនេះមានការអញ្ជើញចូលរួមពីសំណាក់ ឯកឧត្តម លោកជំទាវ ជាថ្នាក់ដឹកនាំ មន្ត្រីរាជការ និងភ្ញៀវកិត្តិយសសរុបប្រមាណ ១០០នាក់។
ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍
ក្នុងឱកាសនោះ ឯកឧត្តមរដ្ឋមន្ត្រី ត្រាំ អុីវតឹក មានប្រសាសន៍ថា ពិធីចុះហត្ថលេខានៅថ្ងៃនេះ បានបញ្ជាក់អំពីការបោះជំហានមួយទៅមុខទៀតរបស់ក្រសួង ក្នុងការជំរុញអនុវត្តកម្មវិធីនយោបាយយុទ្ធសាស្ត្រចតុកោណរបស់រាជរដ្ឋាភិបាលអាណត្តិទី៦ ក្នុងការលើកកម្ពស់ និងអភិវឌ្ឍន៍វិស័យទូរគមនាគមន៍ឆ្ពោះទៅរករដ្ឋាភិបាលអេឡិកត្រូនិក និងសេដ្ឋកិច្ចឌីជីថល នាពេលអនាគត។ ទន្ទឹមនឹងនេះវានឹងបើកឱកាសឲ្យភាគីដែលចូលរួមទាំងវិស័យឯកជន និងសាធារណៈ ពង្រីកសក្តានុពលភាពការវិនិយោគរបស់ខ្លួន ដែលអាចប្រើប្រាស់នូវហេដ្ឋារចនាសម្ព័ន្ធទូរគមនាគមន៍របស់ជាតិ និងឯកជនប្រកបដោយសក្តានុពល និងមានប្រសិទ្ធភាព ពិសេសឈានទៅបង្កើតគម្រោងថ្មីៗជាច្រើនទៀត។
មុននឹងបញ្ចប់ ឯកឧត្តមរដ្ឋមន្ត្រី បានថ្លែងនូវការកោតសរសើរដល់អ្នកពាក់ព័ន្ធទាំងអស់ដែលបានសហការគ្នាយ៉ាងជិតស្និទ្ធក្នុងការរិះរកគំនិតផ្តួចផ្តើមគម្រោងនេះ។ ឯកឧត្តមរដ្ឋមន្ត្រី សង្ឃឹមជឿជាក់ថា ទូរគមនាគមន៍កម្ពុជា និងក្រុមហ៊ុន Viettel ពិតជាបន្តសហការធ្វើការរួមគ្នា បង្កើតជាគម្រោងលេចជារូបរាងពិតប្រាកដ និងទទួលបានជោគជ័យជាស្ថាពរ ហើយដើម្បីលើកកម្ពស់វិស័យបច្ចេកវិទ្យាគមនាគមន៍ និងព័ត៌មាន ឲ្យមានសន្ទុះខ្លាំងក្លា និងដើរទាន់ការរីកចម្រើននៃបច្ចេកវិទ្យារបស់បណ្តាប្រទេសនៅក្នុងតំបន់៕
ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍និងទូរគមនាគមន៍ និងជាប្រធានក្រុមប្រឹក្សាភិបាលទូរគមនាគមន៍កម្ពុជា
លោក Nhong Din Thon តំណាងក្រុមហ៊ុន Viettel (Cambodia) Pte., Ltd.
