ឯកឧត្ដមរដ្ឋមន្ត្រី ត្រាំ អុីវតឹក អនុញ្ញាតឱ្យគណៈប្រតិភូក្រុមប្រឹក្សាធុរកិច្ចសហរដ្ឋអាមេរិក-អាស៊ាន (US-ASEAN BUSINESS COUNCIL, INC.) ចូលជួបសម្តែងការគួរសម និងពិភាក្សាការងារ
រាជធានីភ្នំពេញ៖ រសៀលថ្ងៃចន្ទ ០៧កើត ខែអាសាឍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៨ ខែកក្កដា ឆ្នាំ២០១៩ ឯកឧត្ដម ត្រាំ អុីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានអនុញ្ញាតឱ្យលោក Alexander Feldman ប្រធាន និងជានាយកប្រតិបត្តិនៃក្រុមប្រឹក្សាធុរកិច្ចសហរដ្ឋអាមេរិក-អាស៊ាន (US-ASEAN BUSINESS COUNCIL, US-ABC) និងតំណាងក្រុមហ៊ុនធំៗរបស់សហរដ្ឋអាមេរិក មានដូចជា Google, Facebook, AWS, Oracle, Cisco ជាដើម ចូលជួបសម្តែងការគួរសម និងពិភាក្សាការងារ នៅទីស្តីការក្រសួង។ កិច្ចពិភាក្សានេះមានគោលបំណងដើម្បីពង្រីកកិច្ចសហការធុរកិច្ចរបស់សហរដ្ឋអាមេរិកជាមួយវិស័យឯកជន និងសាធារណៈនៅព្រះរាជាណាចក្រកម្ពុជា ក្នុងការជួយគាំទ្រដល់ការអភិវឌ្ឍសេដ្ឋកិច្ចនៅកម្ពុជា។
ក្នុងឱកាសនោះ ឯកឧត្តមរដ្ឋមន្ត្រី ត្រាំ អុីវតឹក បានជម្រាបជូនភ្ញៀវអំពីកិច្ចការដែលក្រសួងបានបំពេញ និងការប្រឈមនានា ដើម្បីឆ្ពោះកាន់សេដ្ឋកិច្ចឌីជីថល ដែលនេះអាចក្លាយជាកាលានុវត្តភាពសម្រាប់ការវិនិយោគ។ ឯកឧត្តមរដ្ឋមន្ត្រី បានបញ្ជាក់អំពីការរៀបចំរដ្ឋាភិបាលឌីជីថល មជ្ឈមណ្ឌលទិន្នន័យ សន្តិសុខព័ត៌មានវិទ្យា ហត្ថលេខាឌីជីថល សុវត្ថិភាពអនឡាញ ភូមិឌីជីថល ក៏ដូចជាហិរញ្ញវត្ថុឌីជីថល ដែលនេះត្រូវការភាពជាដៃគូនៃវិស័យឯកជនក្នុងការវិនិយោគផងដែរ។
លោក Alexander Feldman ប្រធាននិងជានាយកប្រតិបត្តិនៃក្រុមប្រឹក្សា US-ABC បានវាយតម្លៃខ្ពស់ចំពោះជំនួបពិភាក្សាការងារនេះ និងបានលើកឡើងអំពីលទ្ធភាពដែលក្រុមហ៊ុនអាមេរិកអាចផ្តល់ជូនដំណោះស្រាយបច្ចេកវិទ្យា ដើម្បីឆ្លើយតបនឹងការប្រឈមនានា ដើម្បីឈានឆ្ពោះទៅកាន់សេដ្ឋកិច្ចឌីជីថលនៅពលខាងមុខ៕
