ឯកឧត្តមរដ្ឋមន្ត្រី ត្រាំ អុីវតឹក បានអនុញ្ញាតឱ្យប្រតិភូតំណាងក្រុមហ៊ុន Accutor ចូលជួបសម្តែងការគួរសម និងពិភាក្សាការងារ នៅទីស្តីការក្រសួង
រាជធានីភ្នំពេញ៖ រសៀលថ្ងៃសុក្រ ០៩កើត ខែស្រាពណ៌ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៩ ខែសីហា ឆ្នាំ២០១៩ នៅទីស្តីការក្រសួង ឯកឧត្ដម ត្រាំ អុីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានអនុញ្ញាតអោយលោក Musawir Idrees តំណាងក្រុមហ៊ុន Accutor ដែលមានស្នាក់ការនៅប្រទេសស្វីស ចូលជួបសម្តែងការគួរសម និងពិភាក្សាការងារអំពីវិស័យ ICT នៅកម្ពុជា ពិសេសពាក់ព័ន្ធនឹងការអភិវឌ្ឍរដ្ឋាភិបាលអេឡិកត្រូនិក និងវិស័យបច្ចេកវិទ្យាព័ត៌មាននៅកម្ពុជា តាមយន្តការភាពជាដៃគូរវាងរដ្ឋ និងឯកជន (Public Private Partnership – PPP)។
នៅក្នុងឱកាសនោះ ឯកឧត្តមរដ្ឋមន្ត្រី បានជម្រាបជូនតំណាងក្រុមហ៊ុន Accutor នូវផែនការមេអភិវឌ្ឍន៍វិស័យ ICT ក៏ដូចជាផែនការសកម្មភាពក្នុងការអភិវឌ្ឍរដ្ឋាភិបាលឌីជីថល ដែលក្រសួងកំពុងរៀបចំ និងកត្តាអាទិភាពមួយចំនួនដែលនឹងត្រូវការការវិនិយោគនាពេលខាងមុខ ដែលរួមមានការបំពាក់ហេដ្ឋារចនាសម្ព័ន្ធទ្រទ្រង់ ការកសាងពលរដ្ឋឌីជីថលតាមរយ:ការអភិវឌ្ឍធនធានមនុស្ស និងបណ្តុះបណ្តាលជំនាញICT ជាដើម។
លោក Musawir Idrees ក៏បានជម្រាបជូន ឯកឧត្តមរដ្ឋមន្ត្រីថា សម្រាប់គំនិតផ្តួចផ្តើមគម្រោងសម្រាប់ប្រទេសកម្ពុជា ក្រុមហ៊ុន Accutor បានសិក្សាផែនការមេបច្ចេកវិទ្យាគមនាគមន៍ព័ត៌មានវិទ្យាឆ្នាំ២០២០ របស់កម្ពុជាដែលបានគូសបញ្ជាក់ពីចក្ខុវិស័យក្នុងការផ្លាស់ប្តូរប្រទេសកម្ពុជាអោយក្លាយទៅជាប្រទេសឆ្លាតវៃ (Smart Nation) ជាមួយប្រជាពលរដ្ឋឌីជីថល សង្គម និងរដ្ឋាភិបាលឌីជីថល។ ការបំពាក់ប្រព័ន្ធ ICT គឺត្រូវបានជឿជាក់ថាអាចជួយអោយកម្ពុជាសម្រេចគោលដៅទាំងនេះបាន។
កិច្ចប្រជុំបានបញ្ចប់ក្នុងបរិយាកាសរីករាយ ដោយក្រុមហ៊ុនប្តេជ្ញាចិត្តថានឹងសិក្សាលើកាលានុវត្តភាពលើការវិនិយោគ ក្នុងដំណាក់កាលនីមួយៗនៃការអភិវឌ្ឍរដ្ឋាភិបាលឌីជីថលនៅកម្ពុជា៕
