ឯកឧត្តមរដ្ឋលេខាធិការ ជា មានិត ដឹកនាំប្រតិភូក្រសួងចូលរួមកិច្ចប្រជុំ GSMA Mobile 360- Digital Societies នៅទីក្រុងកូឡាឡាំពួរ ប្រទេសម៉ាឡេស៊ី
ប្រទេសម៉ាឡេស៊ី៖ ថ្ងៃអង្គារ ១១រោច ខែភទ្របទ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៤ ខែកញ្ញា ឆ្នាំ២០១៩ ឯកឧត្តមរដ្ឋលេខាធិការ ជា មានិត តំណាងដ៏ខ្ពង់ខ្ពស់ ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានដឹកនាំប្រតិភូក្រសួងចូលរួមកិច្ចប្រជុំ GSMA Mobile 360- Digital Societies ដែលប្រព្រឹត្តទៅពីថ្ងៃទី២៤-២៦ ខែកញ្ញា ឆ្នាំ២០១៩ នៅទីក្រុងកូឡាឡាំពួរ ប្រទេសម៉ាឡេស៊ី។
គោលបំណងនៃកិច្ចប្រជុំនេះ គឺដើម្បីសិក្សាស្វែងយល់ពីធាតុផ្សំនានានាក្នុងការបង្កើតសង្គមឌីជីថលដោយជោគជ័យ និងធ្វើការវិភាគទៅលើសកម្មភាពដែលត្រូវធ្វើ ដើម្បីធ្វើអោយសេដ្ឋកិច្ចវិវត្តទៅតាមគោលដៅនៃសង្គមឌីជីថល។
ព្រឹត្តិការណ៍នេះផ្តោតលើរង្វាស់សំខាន់ៗនៃសង្គមឌីជីថល ក្នុងនោះរួមមាន ពលរដ្ឋឌីជីថល ពាណិជ្ជកម្មឌីជីថល អត្តសញ្ញាណឌីជីថល បែបផែនជីវិតនិងការតភ្ជាប់ឌីជីថល និងអំពីយន្តការដែលការអភិវឌ្ឍនៃវិស័យទាំងនោះ អាចនាំអត្ថប្រយោជន៍មកដល់សង្គមទាំងមូល។ នៅក្នុងព្រឹត្តិការណ៍នេះ មានការចូលរួមពីវាគ្មិន និងអ្នកជំនាញ ពីខាងក្រសួងស្ថាប័ន វិស័យឯកជន និងភាគីពាក់ព័ន្ធនានា ក្នុងការធ្វើការពិភាក្សាវែកញែកលើបញ្ហាប្រឈមនានា និងស្វែងរកលើដំណោះស្រាយគន្លឹះ ដើម្បីពន្លឿនការផ្លាស់ប្តូរឌីជីថលនៅក្នុងតំបន់៕
