ឯកឧត្តមរដ្ឋមន្ត្រី ត្រាំ អុីវតឹក បានអញ្ជើញចូលរួមក្នុងសន្និសីទវិទ្យុគមនាគមន៍ពិភពលោក២០១៩ នៅប្រទេសអេហ្ស៊ីប
ប្រទេសអេហ្ស៊ីប៖ នាថ្ងៃសុក្រ ១១រោច ខែកត្តិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២២ ខែវិច្ឆិកា ឆ្នាំ២០១៩ ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានអញ្ជើញដឹកនាំគណៈប្រតិភូក្រសួងប្រៃសណីយ៍និងទូរគមនាគមន៍ ចូលរួមក្នុងសន្និសីទវិទ្យុគមនាគមន៍ពិភពលោក២០១៩ “ World Radiocommunication Conference 2019 ឬ WRC-19” នៅទីក្រុង Sharm EI Sheikh ប្រទេសអេហ្ស៊ីប។
សន្និសីទនេះរៀបចំឡើងរៀងរាល់៤ឆ្នាំម្តង ដោយមានការចូលរួមពីប្រតិភូតំណាងរដ្ឋជាសមាជិកទាំង១៩៣ អ្នកសង្កេតការណ៍ពីវិស័យឯកជន អង្គការអន្តរជាតិ និងភាគីពាក់ព័ន្ធដទៃទៀត ក្នុងគោលបំណងសំខាន់ៗដូចជា៖
(១).រៀបចំគោលនយោបាយរួមសម្រាប់អាណត្តិបួនឆ្នាំបន្តទៀត
(២).កែសម្រួលបទប្បញ្ញត្តិវិទ្យុ និងផែនការរៀបចំបែងចែកហ្វ្រេកង់ស៍
(៣).ដោះស្រាយបញ្ហាផ្សេងៗ ស្តីពីវិទ្យុគមនាគមន៍ទូទាំងពិភពលោក
(៤).ពិភាក្សាជាមួយក្រុមប្រឹក្សាភិបាលស្តីពីបទប្បញ្ញត្តិវិទ្យុគមនាគមន៍ និងពិនិត្យមើលសកម្មភាពផ្សេងទៀតរបស់ការិយាល័យវិទ្យុគមនាគមន៍
និង(៥).ពិនិត្យ និងពិភាក្សាលើលទ្ធផលនៃក្រុមប្រជុំត្រៀមទាំង៦តំបន់របស់ WRC-19 និងផែនការសកម្មភាពសម្រាប់អនុវត្តន៍នាពេលអនាគត។
នាឱកាសនោះដែរ គណ:ប្រតិភូក្រសួងបានជួបពិភាក្សាការងារជាមួយលោកHoulin ZHAO អគ្គលេខាធិការនៃសហភាពទូរគមនាគមន៍អន្តរជាតិ និងតំណាងសមាគមន៍GSMA ដើម្បីពង្រឹងកិច្ចសហប្រតិបត្តិការគ្នាផងដែរ៕
