ឯកឧត្តមរដ្ឋលេខាធិការ សុខ ពុទ្ធិវុធ អញ្ជើញចុះពិនិត្យដំណេីរការរៀបចំបន្ទប់ប្រឡង និងធ្វេីតេស្តសាកល្បងប្រព័ន្ធគ្រប់គ្រងដំណេីរការប្រឡង នៅទីស្តីការក្រសួង
![Ministry of Post and Telecommunications](https://asset.cambodia.gov.kh/mptc/2020/05/dkX2bUYH-mptc-media-4074.jpg)
រាជធានីភ្នំពេញ: រសៀលថ្ងៃសៅរ៍ ១០រោច ខែមិគសិរ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២១ ខែធ្នូ ឆ្នាំ២០១៩ នៅទីស្តីការក្រសួង ឯកឧត្តម សុខ ពុទ្ធិវុធ រដ្ឋលេខាធិការនិងជាប្រធានគណៈកម្មការរៀបចំការប្រឡងប្រជែងជ្រេីសរេីសនិស្សិតនិងមន្ត្រីរាជការស៉ីវិលឱ្យចូលបម្រេីការងារក្នុងក្របខ័ណ្ឌក្រសួងប្រៃសណីយ៍និងទូរគមនាគមន៍សម្រាប់ឆ្នាំ២០១៩ បានអញ្ជើញចុះពិនិត្យដំណេីរការរៀបចំបន្ទប់ប្រឡង និងធ្វេីតេស្តសាកល្បងប្រព័ន្ធគ្រប់គ្រងដំណេីរការប្រឡង របស់បេក្ខជន ទាំង៥១៦នាក់ សម្រាប់កាលបរិច្ឆេទប្រឡងនៅថ្ងៃទី២២ ខែឆ្នូ ឆ្នាំ២០១៩ ស្អែកនេះ។ ដេីម្បីប្រសិទ្ធិភាព តម្លាភាព និងសុវត្ថិភាពនៃដំណេីរការប្រឡងខាងមុខនេះ ឯកឧត្តមប្រធានគណៈកម្មការ រួមជាមួយ អនុគណៈកម្មការ ព្រមទាំងក្រុមការងារ បានធ្វេីការពិនិត្យនិងធ្វេីតេស្តសាកល្បងប្រព័ន្ធគ្រប់គ្រងការប្រឡងជាច្រេីនដង និងទទួលបានលទ្ធផលល្អ។ ឯកឧត្តម មានប្រសាសន៍ថាក្រសួងបានខិតខំជំរុញវិស័យបច្ចេកវិទ្យា គមនាគមន៍ និង ព័ត៌មាន(ICT) អោយទូលំទូលាយ ហេីយក៏សង្ឃឹមថា ដំណេីរការនៃការប្រឡងនៅថ្ងៃស្អែកនេះ បេក្ខជនទាំងអស់និងសប្បាយចិត្ត ហេីយទទួលអារម្មណ៍ខុសប្លែកពីការប្រឡងដែលរៀបចំឡេីងកាលពីឆ្នាំមុនៗ។
*គូសបញ្ជាក់ផងដែរថា ឆ្នាំ២០១៩នេះ ក្រសួងបានផ្លាស់ប្តូរការប្រឡងមកជាការប្រឡងតាមប្រព័ន្ធកុំព្យូទ័រ រួមទាំងនីតិវិធីនៃការចុះឈ្មោះប្រឡង ក៏ក្រសួងរៀបចំតាមប្រព័ន្ធអនឡាញផងដែរ៕