ឯកឧត្តមរដ្ឋលេខាធិការ ជា មានិត បានដឹកនាំក្រុមការងារថ្នាក់ជាតិចុះពិនិត្យទីតាំង គម្រោងស្នើសុំរបស់ប្រជាពលរដ្ឋដែលបានលើកឡើងក្នុងវេទិកាសាធារណៈថ្នាក់ជាតិ កន្លងមក ក្នុងស្រុកទឹកផុស ខេត្តកំពង់ឆ្នាំង
ខេត្តកំពង់ឆ្នាំង៖ ព្រឹកថ្ងៃច័ន្ទ ១២រោច ខែមិគសិរ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៣ ខែធ្នូ ឆ្នាំ២០១៩ ឯកឧត្តម ជា មានិត រដ្ឋលេខាធិការនិងជាអនុប្រធានក្រុមការងារថ្នាក់ជាតិចុះមូលដ្ឋានស្រុកទឹកផុស តំណាងដ៏ខ្ពង់ខ្ពស់ ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ និងជាប្រធានក្រុមការងារថ្នាក់ជាតិចុះមូលដ្ឋានស្រុកទឹកផុស និងស្រុកកំពង់លែង ខេត្តកំពង់ឆ្នាំង បានដឹកនាំក្រុមការងារថ្នាក់ជាតិចុះមូលដ្ឋានស្រុកទឹកផុស ក្រុមការងារបច្ចេកទេស ចុះពិនិត្យទីតាំង សិក្សាគម្រោងស្នើសុំរបស់ប្រជាពលរដ្ឋនៅឃុំចំនួន៤ (ឃុំទួលខ្ពស់ ឃុំខ្លុងពពក ឃុំចោងម៉ោង និងឃុំអភិវឌ្ឍន៍) ដោះស្រាយនូវបញ្ហានៅក្នុងវេទិកាសាធារណៈថ្នាក់ជាតិលើកទី៣ កាលពីថ្ងៃទី០៥ ខែធ្នូ ឆ្នាំ២០១៩ នៅបរិវេណសាលាស្រុកទឹកផុស ខេត្តកំពង់ឆ្នាំង ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី ៤ របស់រាជរដ្ឋាភិបាលកម្ពុជា សម្រាប់នីតិកាលទី៦ នៃរដ្ឋសភា ជាពិសេសសម្រាប់អនុវត្តន៍គោលនយោបាយក្នុងការអភិវឌ្ឍភូមិ-ឃុំ ។
នៅក្នុងបេសកកម្មនេះ ឯកឧត្តមរដ្ឋលេខាធិការ បានមានប្រសាសន៍ថា ការជួបជុំគ្នានាថ្ងៃនេះ គឺក្នុងគោលបំណង ដើម្បីដោះស្រាយនូវសំណូមពរដែលនៅសេសសល់ នាពេលកន្លងមករបស់បងប្អូនប្រជាពលរដ្ឋដែលបានស្នើឲ្យអង្គវេទិកាសាធារណៈ ក៏ដូចជារាជរដ្ឋាភិបាលជួយដោះស្រាយនូវកង្វល់ ការលំបាក និងតម្រូវការចាំបាច់នានា របស់បងប្អូនប្រជាពលរដ្ឋ ដែលកំពុងជួបប្រទះ បានទាន់ពេលវេលា។ ឯកឧត្តមរដ្ឋលេខាធិការ បានបញ្ជាក់ថា ក្រុមការងារត្រូវដឹកនាំជំរុញ ដល់រដ្ឋបាលថ្នាក់ក្រោមជាតិ មន្ទីរ អង្គភាពជំនាញនានា ឲ្យលើកកម្ពស់ក្នុងការបំពេញការងារស្របតាមតួនាទី ភារកិច្ច និងការទទួលខុសត្រូវដែលបានកំណត់។
ក្នុងបេសកកម្មនេះ ឯកឧត្តមរដ្ឋលេខាធិការ និងក្រុមការងារ បានចុះពិនិត្យ សិក្សាគម្រោងស្នើសុំរបស់ប្រជាពលរដ្ឋ ស្ថិតនៅឃុំទួលខ្ពស់ ឃុំខ្លុងពពក ឃុំចោងម៉ោង និងឃុំអភិវឌ្ឍន៍ មានដូចខាងក្រោម៖
(១).ចុះពិនិត្យសំណើរសុំថវិកាសម្រាប់ធ្វើផ្លូវបេតុង ក្នុងបរិវេណវិទ្យាល័យ ហ៊ុន សែន ទួលខ្ពស់ ស្ថិតនៅភូមិរកាទង ឃុំទួលខ្ពស់ ។
(២).ចុះពិនិត្យសំណើរស្នើសុំផ្លូវក្រាលក្រួសក្រហម១ខ្សែ ប្រវែង៣០០ម៉ែត្រ និងលូប្រអប់១កន្លែង ស្ថិតនៅក្នុងភូមិយោត ឃុំខ្លុងពពក។
(៣).ចុះពិនិត្យសំណើរសុំស៊ីម៉ង់ត៍ ចំនួន១០តោន និងក្បឿងចំនួន១៦០០សន្លឹកប្រក់ដំបូល ដើម្បីបន្តកសាងសាលាបុណ្យភូមិក្រោយវត្ត ស្ថិតនៅក្នុងឃុំខ្លុងពពក ។
(៤).ចុះពិនិត្យសំណើរសុំជួសជុលទំនប់ទឹកស្វាយចេក ស្ថិតនៅក្នុងភូមិស្វាយចេក ឃុំចោងម៉ោង។
(៥).ចុះពិនិត្យសំណើរសុំផ្លូវលំក្រាលគ្រួសក្រហមប្រវែង២៣០០ម៉ែត្រ នៅភូមិដូនម៉ៅ ឃុំចោងម៉ោង។
(៦).ចុះពិនិត្យសំណើរសុំជួសជុលទំនប់ទឹកតាអុក និងស្តារប្រឡាយឆ្លងកាត់ផ្លូវរថភ្លើង ស្ថិតនៅក្នុងភូមិពារាំង ឃុំចោងម៉ោង។
(៧). ចុះពិនិត្យសំណើរសាងសង់ផ្លូវចាក់កៅស៊ូប្រវែង៤៥០០ម៉ែត្រ ពីភូមិស្រែតាជៃ ទៅភូមិស្រែពិច និងសំណើរសុំផ្លូវចាក់កៅស៊ូប្រវែង៥០០០ម៉ែត្រ ពីភូមិស្រែព្រិច ទៅភូមិរពាក់ ឃុំអភិវឌ្ឍន៍។
និង(៨). ចុះពិនិត្យសំណើរសុំ ជួសជុលទ្វារទឹកអន្លង់តាទែន ប្រវែង២៥០ម៉ែត្រ នៅភូមិរពាក់ ឃុំអភិវឌ្ឍន៍។
នៅក្នុងឱកាសនោះ ឯកឧត្តមរដ្ឋលេខាធិការ បាននាំយកថវិកា របស់ ឯកឧត្តមរដ្ឋមន្ត្រី ត្រាំ អុីវតឹក ចំនួន ១0លានរៀលគត់ ដល់លោកអភិបាលស្រុកទឹកផុសស្តីទី និងគណ:គ្រប់គ្រងសាលាបឋមសិក្សាសាន់បារ៉ាយ ស្ថិតនៅឃុំអភិវឌ្ឍន៍ ដើម្បីជួសជុលអគារសិក្សាធ្វើអំពីឈើប្រក់ហ្វីប្រូដែលទ្រុឌទ្រោមខ្លាំង ដែលសិស្សកំពុងសិក្សា។
*គូសបញ្ជាក់ផងដែរថា រាល់សំណូមពររបស់ប្រជាពលរដ្ឋ ឯកឧត្តមអនុប្រធាន បានស្នើក្រុមការងារបច្ចេកទេសចុះពិនិត្យសិក្សា និងរៀបចំរបាយការណ៍លម្អិតជូន ឯកឧត្តមប្រធាន សម្រាប់ដាក់ជូនថ្នាក់លើ ដើម្បីពិនិត្យ និងសម្រេច។
ឆ្លៀតក្នុងឱកាសនោះ ឯកឧត្តម ជា មានិត បានអញ្ជើញចុះជួបសាកសួរសុខទុក្ខ និងនាំយកថវិកាមួយចំនួន របស់ ឯកឧត្តមរដ្ឋមន្ត្រី ត្រាំ អុីវតឹក ជូនដល់លោក ឈួង ឃឿន ប្រធានក្រុមប្រឹក្សាស្រុកទឹកផុស ដែលកំពុងសម្រាកព្យាបាលជំងឺ នៅគេហដ្ឋានផ្ទាល់ផងដែរ៕
