ឯកឧត្តមរដ្ឋមន្ត្រី ត្រាំ អុីវតឹក បានដឹកនាំកិច្ចប្រជុំស្តីពីការបែងចែកក្របខ័ណ្ឌ និងមន្ត្រីជាប់កិច្ចសន្យាសម្រាប់ផែនការឆ្នាំ២០២០
![Ministry of Post and Telecommunications](https://asset.cambodia.gov.kh/mptc/2020/05/63GBd4AC-mptc-media-4104.jpg)
រាជធានីភ្នំពេញ៖ ព្រឹកថ្ងៃអង្គារ ០៤កើត ខែមាឃ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៨ ខែមករា ឆ្នាំ២០២០ នៅទីស្តីការក្រសួង ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានអញ្ជើញដឹកនាំកិច្ចប្រជុំស្តីពីការបែងចែកក្របខ័ណ្ឌ និងមន្ត្រីជាប់កិច្ចសន្យាសម្រាប់ផែនការឆ្នាំ២០២០ ដោយមានការអញ្ជើញចូលរួមពី ថ្នាក់ដឹកនាំ និងអង្គភាពក្រោមឱវាទក្រសួងប្រៃសណីយ៍និងទូរគមនាគមន៍។
ឯកឧត្តមរដ្ឋមន្ត្រី បានមានប្រសាសន៍ថា សម្រាប់ផែនការឆ្នាំ២០២០ រាជរដ្ឋាភិបាលបានយល់ព្រមផ្តល់ជាគោលការណ៍ជ្រើសរើសមន្ត្រីរាជការស៊ីវិលក្របខ័ណ្ឌថ្មីដល់ក្រសួងប្រៃសណីយ៍និងទូរគមនាគមន៍ សរុបចំនួន ៣៩កន្លែង និងមន្ត្រីជាប់កិច្ចសន្យា សរុបចំនួន ១២៦កន្លែង ដើម្បីផ្តល់ជូនក្រសួង សម្រាប់បំពេញតម្រូវការពិតប្រាកដនៅអង្គភាពថ្នាក់ជាតិ ថ្នាក់ក្រោមជាតិ និងមន្ទីរអង្គភាពជំនាញរាជធានី ខេត្ត។ ឯកឧត្តមរដ្ឋមន្ត្រី បានបន្តទៀតថា ដើម្បីអនុវត្តនូវគោលការណ៍របស់រាជរដ្ឋាភិបាល និងវិធានការចំពោះការជ្រើសរើសនិងការប្រើប្រាស់ធនធានមនុស្សឆ្នាំ២០២០ ក្រសួង ត្រូវធ្វើការប្រកាសជ្រើសរើសចេញពីការប្រឡងប្រជែងក្នុងចំណោម សិស្ស និស្សិត និងមន្ត្រីរាជការស៊ីវិល ក្នុងពេលតែមួយ និងត្រូវប្រកាសលទ្ធផលប្រឡងជាប់ស្ថាពរយ៉ាងយូរត្រឹមដំណាច់ខែមិថុនា ឆ្នាំ២០២០។
ឯកឧត្តមរដ្ឋមន្ត្រី បានសំណូមពរដល់អង្គភាពទាំងអស់ត្រូវរៀបចំវគ្គបណ្តុះបណ្តាលជំនាញបន្ថែមដល់មន្ត្រី ដើម្បីបង្កើនសមត្ថភាពសម្រាប់អោយវិស័យរបស់យើងមានការរីកចម្រើនបន្ថែមទៀត៕