ឯកឧត្តមរដ្ឋមន្ត្រី ត្រាំ អុីវតឹក អញ្ជើញជាអធិបតីដ៏ខ្ពង់ខ្ពស់ ក្នុងមហាសន្និបាតបូកសរុបលទ្ធផលការងារសមាគមបុគ្គលិកប្រៃសណីយ៍ និងទូរគមនាគមន៍កម្ពុជា អាណត្តិទី៩ និងទិសដៅការងារអាណត្តិទី១០
រាជធានីភ្នំពេញ៖ ព្រឹកថ្ងៃពុធ ១១រោច ខែមាឃ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៩ ខែកុម្ភៈ ឆ្នាំ២០២០ នៅទីស្តីការក្រសួង ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ និងជាប្រធានកិត្តិយសសមាគមបុគ្គលិកប្រៃសណីយ៍ និងទូរគមនាគមន៍កម្ពុជា បានអញ្ជើញជាអធិបតីដ៏ខ្ពង់ខ្ពស់ក្នុងមហាសន្និបាតបូកសរុបលទ្ធផលការងារសមាគមបុគ្គលិកប្រៃសណីយ៍ និងទូរគមនាគមន៍កម្ពុជា អាណត្តិទី៩ ទិសដៅការងារអាណត្តិទី១០ ដោយមានការចូលរួមពីសំណាក់ ឯកឧត្ដម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក ទីប្រឹក្សា លោក លោកស្រី មន្ត្រីរាជការក្រោមឱវាទក្រសួង ប.ទ ផងដែរ។
ក្នុងមតិស្វាគមន៍របស់ប្រធានគណៈកម្មាធិការកណ្តាលសមាគមបុគ្គលិកប្រៃសណីយ៍ និងទូរគមនាគមន៍កម្ពុជាអាណត្តិទី៩ បានអានរបាយការណ៍បូកសរុបសកម្មភាពការងាររបស់សមាគមអាណត្តិទី៩ និងទិសដៅការងារអនុវត្តបន្តសម្រាប់អាណត្តិទី១០ និងសូមការអនុម័តពីអង្គមហាសន្និបាត ធ្វើវិសោធនកម្មប្តូររយៈពេលគ្រប់គ្រង ក្នុង១អណត្តិ មានរយៈពេលពី២ឆ្នាំ ទៅ៣ឆ្នាំ ហើយអង្គសន្និបាតក៏បានសម្រេចជាឯកច្ឆន្ទផងដែរ។ ហើយអង្គសន្និបាតក៏បានបោះឆ្នោត ជ្រើសរើសគណៈកម្មាធិការកណ្តាលសមាគមបុគ្គលិកប្រៃសណីយ៍ និងទូរគមនាគមន៍កម្ពុជា ចំនួន១១ រូប ក្នុងចំណោមបេក្ខជន បេក្ខនារីឈរឈ្មោះចំនួន១៨រូប ដេីម្បីដឹកនាំការងារសមាគមសម្រាប់អាណត្តិទី១០ ឆ្នាំ២០២០-២០២៣។ នៅក្នុងឱកាសដ៏វិសេសវិសាលនោះ ឯកឧត្តមរដ្ឋមន្ត្រី ត្រាំ អុីវតឹក បានអបអរសាទរ ចំពោះលទ្ធផលផ្លែផ្កា ដ៏សមស្របដែលមន្ត្រីរាជការបម្រើការងារក្នុងក្រសួងប្រៃសណីយ៍និងទូរគមនាគមន៍ យើងបានរួមគ្នាចូលជាសមាជិកសមាគមបានកាន់តែច្រើនឡើងៗ ក្រោមការដឹកនាំរបស់គណៈកម្មាធិការកណ្តាលសមាគមចាប់តាំងពីអាណត្តិទី១ ជាបន្តបន្ទាប់ដល់អាណត្តិទី៩ ហើយបង្កើតបាននូវថវិកាសំរាប់ជួយឧបត្ថម្ភដល់ក្រុមគ្រួសារ សមាជិក សមាជិកា ដែលជួបវិបត្តិបានមួយកំរិត។
ឆ្លៀតក្នុងឱកាសនោះ ឯកឧត្តមរដ្ឋមន្ត្រី មានជំនឿជឿជាក់ថា ឆ្លងតាមបទពិសោធន៍ការងារ ៩អាណត្តិ កន្លងមកនេះ សមាជិក សមាជិកា នៃអង្គសន្និបាតទាំងមូល អាចប្រមូលផ្តុំបាននូវការយល់ដឹងថ្មី លទ្ធភាពថ្មី និងសកម្មភាពថ្មី ដើម្បីធ្វើឲ្យគោលបំណង សំណូមពររបស់សមាគមបុគ្គលិកប្រៃសណីយ៍ និងទូរគមនាគមន៍កម្ពុជា និងទិសដៅការងារសំរាប់អាណត្តិទី១០របស់ខ្លួន ទទួលបានជោគជ័យជាបន្តបន្ទាប់ទៀត៕
