ឯកឧត្តម លឹម វុទ្ធី អគ្គនាយកនៃអគ្គនាយកដ្ឋានគ្រប់គ្រងធនធានវិសាលគមន៍ហ្វ្រេកង់ស៍វិទ្យុ បានដឹកនាំប្រតិភូទស្សនកិច្ចសិក្សាទាក់ទងនឹងគោលនយោបាយវិសាលគមន៍ នៅប្រទេសម៉ាឡេស៊ី
គួឡាឡាំពួរ៖ ឯកឧត្តម លឹម វុទ្ធី អគ្គនាយកនៃអគ្គនាយកដ្ឋានគ្រប់គ្រងធនធានវិសាលគមន៍ហ្វ្រេកង់ស៍វិទ្យុ បានដឹកនាំប្រតិភូ ទៅទស្សនកិច្ចសិក្សា នៅទីក្រុងកូឡាឡាំពួរ ប្រទេស ម៉ាឡេស៊ី ពីថ្ងៃទី០៦-០៧ ខែកុម្ភ: ឆ្នាំ២០២០ ដើម្បី ស្វែងយល់ពីការរៀបចំគោលនយោបាយសម្រាប់ការគ្រប់គ្រងធនធានវិសាលគមន៍ហ្វ្រេកង់ស៍វិទ្យុ។
គូសបញ្ជាក់ផងដែរថា អគ្គនាយកដ្ឋានគ្រប់គ្រងធនធានវិសាលគមន៍ហ្វ្រេកង់ស៍វិទ្យុ គឺជាអគ្គនាយកដ្ឋានថ្មីមួយដែល ទើបនឹងបង្កើតឡើង តាមរយ:អនុក្រឹត្យលេខ ៦៤ អនក្រ. បក ចុះថ្ងៃទី ១០ ខែ ឧសភា ឆ្នាំ២០១៩ របស់រាជរដ្ឋាភិបាល ដែលអគ្គនាយកដ្ឋាននេះ ទទួលខុសត្រូវលើការកសាងបទដ្ឋានគតិយុត្ត និងគោលនយោបាយនានា ទាក់ទងនឹងការ គ្រប់គ្រងធនធានវិសាលគមន៍ហ្វ្រេកង់ស៍វិទ្យុរបស់ជាតិ។
ក្នុងអំឡុងដំណើរទស្សនកិច្ចនេះ ឯកឧត្តម លឹម វុទ្ធី និងប្រតិភូ បានជួបពិភាក្សាការងារជាមួយ៖
▪️ គណ:កម្មាធិការគមនាគមន៍ និងពហុប្រព័ន្ធផ្សព្វផ្សាយម៉ាឡេស៊ី (Malaysian Communication and Multimedia Commission-MCMC) ដើម្បី ស្វែងយល់ចំពោះការគ្រប់គ្រងធនធានវិសាលគមន៍ហ្វ្រេកង់ស៍វិទ្យុ ការរៀបចំផែនការវិសាលគមន៍ហ្វ្រេកង់ស៍វិទ្យុ ការរៀបចំបទប្បញ្ញត្តិពាក់ព័ន្ធនានាសម្រាប់ពង្រឹងការគ្រប់គ្រង ការបង្កើតមជ្ឈមណ្ឌល ស្ថានីយអចល័ត ចល័តគ្រប់ប្រភេទ ដើមី្បត្រួតពិនិត្យការប្រើប្រាស់ហ្រេ្វកង់ស៍វិទ្យុ ក្នុងប្រទេស ម៉ាឡេស៊ី។
▪️ អ្នកជំនាញការអំពីគោលនយោបាយនិងបច្ចេកទេសវិសាលគមន៍ហ្រេ្វកង់ស៍វិទ្យុមកពីសមាគមន៍ GSMA និងបណ្តាក្រុមហ៊ុនពិគ្រោះយោបល់អំពីការរៀបចំគោលនយោបាយវិសាលគមន៍ហ្រេ្វកង់ស៍វិទ្យុ ផែនការ វិសាលគមន៍ហ្វ្រេកង់ស៍វិទ្យុ វិធីសាស្ត្រក្នុងការរៀបចំឯកសារលក្ខខណ្ឌនិងនីតិវិធីទាក់ទងនឹងការគ្រប់គ្រង ការបែងចែកហ្វេ្រកង់ស៍វិទ្យុ ការដេញថ្លៃហ្វេ្រកង់ស៍វិទ្យុ ការសម្របសម្រួល និងការត្រួតពិនិត្យការប្រើប្រាស់ ហ្វេ្រកង់ស៍វិទ្យុ។
ក្នុងឱកាសនោះ គណប្រតិភូបានខិតខំស្វែងយល់អំពីបច្ចេកវិទ្យាទូរសព្ទចល័តជំនាន់ទី៥ (5G) របស់ប្រទេស ម៉ាឡេស៊ី ដែលបាននឹងកំពុងរៀបចំផែនការសម្រាប់ដាក់ដំណើរការក្នុងពេលឆាប់ៗខាង មុខ នេះ ហើយក៍បានស្វែង យល់អំពីវឌ្ឍនភាព នៃ បច្ចេកវិទ្យា 5G របស់ប្រទេស ក្នុងតំបន់អាស៊ានដែលបានការចែករំលែកដោយសមាគមន៍ GSMA និងបណ្តាក្រុមហ៊ុនពិគ្រោះយោបល់ ផងដែរ៕
