ឯកឧត្តមរដ្ឋមន្ត្រី ត្រាំ អុីវតឹក បានអញ្ជើញជាអធិបតីដឹកនាំកិច្ចប្រជុំអន្តរក្រសួងស្តីពីការសិក្សាលទ្ធភាពបង្កើតច្រកទ្វាអុីនធឺណិតតែមួយ និងការចាត់វិធានការលើគណនី/ផេកនៃបណ្តាញទំនាក់ទំនងសង្គម និងគេហទំព័រ ដែលបង្ហោះមាតិកាអនឡាញធ្វើឱ្យប៉ះពាល់ដល់សីលធម៌និងសេចក្តីថ្លៃថ្នូរបស់ស្រ្តីខ្មែរ
រាជធានីភ្នំពេញ៖ ព្រឹកថ្ងៃសុក្រ ១៣រោច ខែមាឃ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២១ ខែកុម្ភៈ ឆ្នាំ២០២០ នៅទីស្តីការក្រសួង ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានអញ្ជើញជាអធិបតីក្នុងកិច្ចប្រជុំអន្តរក្រសួង ស្តីពីការពិភាក្សាលើការសិក្សាលទ្ធភាពបង្កើតច្រកទ្វាអុីនធឺណិតតែមួយ និងការចាត់វិធានការលើគណនី/ផេកនៃបណ្តាញទំនាក់ទំនងសង្គម និងគេហទំព័រ ដែលបង្ហោះមាតិកាអនឡាញធ្វើឱ្យប៉ះពាល់ដល់សីលធម៌និងសេចក្តីថ្លៃថ្នូរបស់ស្រ្តីខ្មែរ។ កិច្ចប្រជុំនេះ មានសមាសភាពចូលរួមពីថ្នាក់ដឹកនាំក្រសួងប្រៃសណីយ៍និងទូរគមនាគមន៍ និងមន្ត្រីជាន់ខ្ពស់តំណាងក្រសួង ស្ថាប័ន ពាក់ព័ន្ធផងដែរ។
នៅក្នុងឱកាសនោះ ឯកឧត្តមរដ្ឋមន្ត្រី ត្រាំ អុីវតឹក បានលើកឡើងថា៖ ពេលនេះមានបញ្ហាសំខាន់ និងបន្ទាន់បំផុតមួយ ដែលជាអនុសាសន៍ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក្នុងពិធីប្រជុំបូកសរុបការងារឆ្នាំ២០១៩ និងទិសដៅឆ្នាំ២០២០ របស់ក្រុមប្រឹក្សាជាតិដើម្បីស្រ្តី នៅថ្ងៃទី១៧ ខែកុម្ភៈ ឆ្នាំ២០២០ បានបញ្ជាឱ្យក្រសួងមហាផ្ទៃ និងក្រសួងប្រៃសណីយ៍និងទូរគមនាគមន៍ ចាត់វិធានការលើផ្លូវច្បាប់ និងតាមលក្ខណៈបច្ចេកទេសបិទរាល់គណនី/ផេកនៃបណ្តាញសង្គម និងគេហទំព័រទាំងឡាយណា ដែលបានបង្ហោះមាតិកាអនឡាញ ឬវីដេអូផ្សាយបន្តផ្ទាល់បញ្ចេញសាច់និងកេរិ៍តខ្មាស់ហួសហេតុ ដែលធ្វើឱ្យប៉ះពាល់ធ្ងន់ធ្ងរដល់សីលធម៌និងសេចក្តីថ្លៃថ្នូរបស់ស្រ្តីខ្មែរ។ បន្ថែមពីលើនេះ ឯកឧត្តមរដ្ឋមន្រ្តី បានបន្តទៀតថា ពាក់ព័ន្ធនឹងការចាត់វិធានការនេះ យើងមានកិច្ចការបីដែលត្រូវការសហការគ្នា គឺ ១) ការគ្រប់គ្រងហេដ្ឋារចនាសម្ព័ន្ធទូរគមនាគមន៍ ២) ការគ្រប់គ្រងមាតិកាបង្ហោះអនឡាញ និង ៣) ការចាត់វិធានផ្លូវច្បាប់។
ជាលទ្ធផលនៃកិច្ចប្រជុំ ឯកឧត្តមរដ្ឋមន្ត្រី បញ្ជាក់ថា៖
ទី១) ដើម្បីជាយន្តការក្នុងការអនុវត្តយូរអង្វែងលើការងារគ្រប់គ្រងការធ្វើអាជីវកម្មសេវាអនឡាញត្រូវអនុវត្តតាមខ្លឹមសារដែលកំណត់ដោយច្បាប់ស្តីពីពាណិជ្ជកម្មអេឡិកត្រូនិក ដោយត្រូវមានការសហការគ្នារវាងក្រសួងពាណិជ្ជកម្ម ក្រសួងប្រៃសណីយ៍និងទូរគមនាគមន៍ ក្រសួងសេដ្ឋកិច្ចនិងហិរញ្ញវត្ថុ និងក្រសួងស្ថាប័នពាក់ព័ន្ធ ដើម្បីរៀបចំលិខិតបទដ្ឋានគតិយុត្ត ស្តីពីការគ្រប់គ្រង និងការចុះបញ្ជីធ្វើអាជីវកម្មសេវាអនឡាញ។
ទី២) ដើម្បីទប់ស្កាត់និងចាត់វិធានការលើបណ្តាគណនី/ផេកនៃបណ្តាញទំនាក់ទំនងសង្គម និងបណ្តាគេហទំព័រទាំងឡាយណា ដែលធ្វើការបង្ហោះមាតិការអនឡាញ ឬវីឌីអូឡាយបន្តផ្ទាល់លក់ផលិតផលនានាបញ្ចេញសាច់/កេរ្តិ៍ខ្មាស់ និងសកម្មភាពអាសអាភាស ធ្វើឱ្យប៉ះពាល់សីលធម៌សង្គមនិងសេចក្តីថ្លៃថ្នូរបស់ស្រ្តីខ្មែរ ត្រូវអនុវត្តតាមយន្តការការងារដែលមានស្រាប់ ស្របតាមប្រកាសរួមលេខ ១៧០ ប្រក.អន្តរក្រ ចុះថ្ងៃទី២៨ ខែឧសភា ឆ្នាំ២០១៨ ស្តីពីការគ្រប់គ្រងការផ្សព្វផ្សាយតាមគេហទំព័រ និងបណ្តាញទំនាក់ទំនសង្គម ដែលដំណើរការតាមប្រព័ន្ធអុីនធឺណិត នៅព្រះរាជាណាចក្រកម្ពុជា រវាងក្រសួងមហាផ្ទៃ ក្រសួងព័ត៌មាន និងក្រសួងប្រៃសណីយ៍និងទូរគមនាគមន៍។
ហើយក្នុងករណីចាំបាច់ និងមានវិធានការផ្លូវច្បាប់ត្រឹមត្រូវ ក្រសួងប្រៃសណីយ៍និងទូរគមនាគមន៍ នឹងពិនិត្យមើលលក្ខណៈបច្ចេកទេសនិងសហការជាមួយបណ្តាប្រតិបត្តិករទូរគមនាគមន៍ក្នុងស្រុក និងប្រតិបត្តិករគ្រប់គ្រងបណ្តាញទំនាក់ទំនងសង្គមពាក់ព័ន្ធ និង/ឬម្ចាស់គ្រប់គ្រងគេហទំព័រ(ក្រៅពីគេហទំព័រ .kh ដែលនិយ័តករទូរគមនាគមន៍កម្ពុជាគ្រប់គ្រង) ដើម្បីចាត់វិធានការបិទគណនី/ផេក និងគេហទំព័រទាំងនោះ៕
