ឯកឧត្តមរដ្ឋមន្ត្រី ជា វ៉ាន់ដេត អនុញ្ញាតឱ្យប្រធានក្រុមប្រឹក្សាភិបាល របស់ក្រុមហ៊ុន HyalRoute Group ចូលជួបសម្ដែងការគួរសម និងពិភាក្សាការងារ នៅទីស្តីការក្រសួង
រាជធានីភ្នំពេញ៖ នាព្រឹកថ្ងៃច័ន្ទ ១៤កើត ខែចេត្រ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៦ ខែមេសា ឆ្នាំ២០២០ នៅទីស្តីការក្រសួង ឯកឧត្ដម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានអនុញ្ញាតឱ្យលោក Huang Xinglong ប្រធានក្រុមប្រឹក្សាភិបាលក្រុមហ៊ុន HyalRoute Group ជាក្រុមហ៊ុនមេរបស់ក្រុមហ៊ុន Cambodia Fiber Optic Communication Network Co., Ltd (CFOCN) ចូលជួបសំដែងការគួរសម និងពិភាក្សាការងារ អំពីកិច្ចសហប្រតិបត្តិការលើវិស័យសេដ្ឋកិច្ចឌីជីថល វិស័យទូរគមនាគមន៍ និងបច្ចេកវិទ្យាគមនាគមន៍និងព័ត៌មាន នៅក្នុងព្រះរាជាណាចក្រកម្ពុជា។
ប្រធានក្រុមហ៊ុន CFOCN បានរាយការណ៍អំពីសកម្មភាពការងាររបស់ខ្លួននៅកម្ពុជា។ ក្នុងជំនួបនេះ ឯកឧត្តមរដ្ឋមន្រ្តី បានសំណូមពរឲ្យក្រុមហ៊ុនផ្តល់កិច្ចសហការជាមួយក្រុមហ៊ុនទូរគមនាគមន៍កម្ពុជា (Telecom Cambodia – TC ) ក្នុងការអនុញ្ញាតឲ្យក្រុមហ៊ុន TC អាចប្រើប្រាស់នូវបណ្តាញខ្សែកាប្លិ៍អុបទិករបស់ក្រុមហ៊ុន CFOCN ដើម្បីកុំឲ្យមានការរំខានដល់អ្នកប្រើប្រាស់ ដោយសារតែការពង្រីក និងសាងសង់ផ្លូវជាតិលេខ 2,3,4 និង5 បានធ្វេីឱ្យខូចខាតបណ្តាញខ្សែកាប្លិ៍របស់ TC ។ ឯកឧត្តមរដ្ឋមន្រ្តី បានសង្កត់ធ្ងន់ថា ការចូលរួមចំណែករបស់ក្រុមហ៊ុន CFOCN នៅកម្ពុជា គឺជាការគាំទ្រដល់ដំណាក់កាលថ្មីនៃការអភិវឌ្ឍបែបសេដ្ឋកិច្ចឌីជីថល និងរដ្ឋាបាលឌីជីថល ដើម្បីបម្រើដល់បដិវត្តន៍ឧស្សាហកម្មទី៤ ហើយហេដ្ឋារចនាសម្ព័ន្ធរបស់ក្រុមហ៊ុន CFOCN ដែលបានវិនិយោគនៅកម្ពុជា អស់ជាង១០ឆ្នាំកន្លងមក នឹងរួមចំណែកជួយជំរុញដល់សេដ្ឋកិច្ចកម្ពុជាបន្ថែមទៀត។
ក្រសួងប្រៃសណីយ៍និងទូរគមនាគមន៍ នឹងសហការជាមួយក្រសួងស្ថាប័នផ្សេងៗទៀត ដើម្បីត្រៀមខ្លួនទទួលយកនូវបច្ចេកវិទ្យាថ្មីឲ្យបានទូលំទូលាយ នៅតាមគ្រឹះស្ថានអប់រំ សាលារៀន ក្រុមហ៊ុនធុរកិច្ច អង្គការសង្គមស៊ីវិល អង្គការមិនមែនរដ្ឋាភិបាល និងឈានទៅដល់ក្រសួង ស្ថាប័នរដ្ឋ។ លើសពីនេះទៀត ក្រសួងនឹងជំរុញឲ្យមានអភិបាលកិច្ចល្អ តាមរយៈការរៀបចំនូវក្របខណ្ឌច្បាប់ លិខិតបទដ្ឋានគតិយុត្ត គោលនយោបាយ និង Road Map ដើម្បីគាំទ្រដល់សេដ្ឋកិច្ចឌីជីថល និងរដ្ឋបាលឌីជីថល ព្រមទាំងធ្វើការកែទម្រង់របៀបរបបធ្វើការរបស់មន្ត្រី ដើម្បីបម្រើដល់ប្រយោជន៍ជាតិ និងធ្វើឲ្យក្រុមហ៊ុនធុរកិច្ចនានាសប្បាយចិត្ត និងបង្កើនការវិនិយោគក្នុងប្រទេសកម្ពុជា៕
