សេចក្តីប្រកាសព័ត៌មាន ស្តីពី ពិធីសម្ពោធដាក់ដំណើរការមជ្ឈមណ្ឌលបច្ចេកវិទ្យាសហគមន៍ នៅវិទ្យាល័យ ហ៊ុន សែន ១ មិថុនា ក្នុងឃុំពារាម ស្រុកបាទី ខេត្តតាកែវ
![](https://asset.cambodia.gov.kh/mptc/2024/06/photo_2024-06-26_11-24-08.jpg)
នាព្រឹក ថ្ងៃទី២៤ ខែមិថុនា ឆ្នាំ២០២៤ នៅក្នុងឃុំពារាម ស្រុកបាទី ខេត្តតាកែវ ឯកឧត្ដម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ (ក.ប.ទ.) បានអញ្ជើញជាអធិបតីក្នុង “ពិធីសម្ពោធដាក់ដំណើរការមជ្ឈមណ្ឌលបច្ចេកវិទ្យាសហគមន៍ នៅវិទ្យាល័យ ហ៊ុន សែន ១ មិថុនា” ដោយមានការចូលរួមជាអធិបពី ឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំព្រះរាជាណាចក្រកម្ពុជា និង ឯកឧត្តម សាន វឌ្ឍនារដ្ឋលេខាធិការក្រសួងអប់រំ យុវជន និងកីឡា (ក.អ.យ.ក.) ទទួលបន្ទុកការងារមជ្ឈមណ្ឌលបច្ចេកវិទ្យាសហគមន៍។ ក្នុងឱកាសនេះ ក៏មានការអញ្ជើញចូលរួមពីឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក និងមន្ត្រីរាជការនៃក.ប.ទ. ព្រមទាំងតំណាងអង្គការមិនមែនរដ្ឋាភិបាល សហគ្រាសឯកជន និងដៃគូអភិវឌ្ឍន៍នានា គណៈអភិបាលស្រុកបាទី តំណាងមន្ទីរ ប.ទ. និង អ.យ.ក. ខេត្តតាកែវ សមាជិក-សមាជិកាក្រុមប្រឹក្សាទាំង ១៥ឃុំ នៃស្រុកបាទី នាយក នាយករង លោកគ្រូ អ្នកគ្រូ សិស្សានុសិស្ស និងប្រជាពលរដ្ឋមូលដ្ឋាន សរុបប្រមាណ ១៨០០ នាក់។
មជ្ឈមណ្ឌលបច្ចេកវិទ្យាសហគមន៍ (ម.ប.ស.) នៅវិទ្យាល័យ ហ៊ុន សែន ១ មិថុនា អាចលេចរូបរាងឡើងបាននាពេលនេះ គឺជាលទ្ធផលផ្លែផ្កានៃកិច្ចសហប្រតិបត្តិការរវាងកម្ពុជា-ជប៉ុន តាមរយៈមូលនិធិ ស.អ. របស់ ក.ប.ទ. និងជំនួយឥតសំណងគូសាណូណិ របស់រាជរដ្ឋាភិបាល និងប្រជាជនជប៉ុន ដើម្បីរួមចំណែកគាំទ្រដំណើរការអភិវឌ្ឍមូលធនមនុស្សឌីជីថល លើកកម្ពស់អក្ខរកម្មឌីជីថល និងកាត់បន្ថយគម្លាតឌីជីថលក្នុងសហគមន៍។
ថ្លែងក្នុងឱកាសនេះ លោកជំទាវ ហ៊ាន ប៉ូលីណេ អនុរដ្ឋលេខាធិការ ក.ប.ទ. បានបញ្ជាក់ជូនថា ម.ប.ស. នៅវិទ្យាល័យ ហ៊ុន សែន ១ មិថុនា មានមុខងារចម្បងចំនួន ៤ គឺ៖ (១) ផ្តល់បន្ទប់កុំព្យូទ័រ (Computer Lab) សម្រាប់បណ្តុះបណ្តាលជំនាញបច្ចេកវិទ្យាឌីជីថល ផ្តល់ការអប់រំតាមប្រព័ន្ធបង្រៀនពីចម្ងាយដល់សិស្សវិទ្យាល័យសាធារណៈ និងជាសាលប្រជុំ ព្រមទាំងជាសាលបណ្តុះបណ្តាលគ្រូបង្រៀនតាមប្រព័ន្ធបង្រៀនពីចម្ងាយ (២) ផ្តល់បន្ទប់បណ្តុះបណ្តាល (Training Room) សម្រាប់បណ្តុះបណ្តាលជំនាញបច្ចេកវិទ្យាឌីជីថលដល់អាជ្ញាធរមូលដ្ឋាន និងប្រជាពលរដ្ឋក្នុងសហគមន៍ ដែលមានបំណងចង់ប្រើប្រាស់ប្រព័ន្ធបច្ចេកវិទ្យាក្នុងគោលដៅផ្សេងៗ (៣) ផ្តល់ទីតាំងជាប៉ុស្តិ៍ប្រៃសណីយ៍ (Post Office) សម្រាប់ផ្តល់សេវាទទួល និងផ្ញើកញ្ចប់ឥវ៉ាន់ ព្រមទាំងផ្តល់សេវាផ្សេងៗដល់ពាណិជ្ជករ អាជីវករ និងប្រជាជននៅសហគមន៍ និង (៤) ផ្តល់បន្ទប់អ៊ីនធឺណិតកាហ្វេ (Internet Café) សម្រាប់ប្រជាជននៅសហគមន៍អាចចូលប្រើប្រាស់ដើម្បីស្វែងរកព័ត៌មានពាក់ព័ន្ធនឹងកសិកម្ម អាជីវកម្ម និងព័ត៌មានផ្សេងទៀតពាក់ព័ន្ធនឹងតម្រូវការជាក់ស្តែងរបស់ប្រជាជននៅតាមសហគមន៍នីមួយៗ។
ឯកឧត្តម សាន វឌ្ឍនា រដ្ឋលេខាធិការក្រសួងអប់រំ យុវជន និងកីឡា គូសបញ្ជាក់ពីសារសំខាន់ក្នុងនាមជាដៃគូសហប្រតិបត្តិការលើបេសកកម្មប្រទាក់ក្រឡាគ្នារវាង ក.អ.យ.ក. និង ក.ប.ទ. ដើម្បីអាចសម្រេចបានគោលដៅរួមនៃការបង្កើត ម.ប.ស. នៅតាមវិទ្យាល័យសាធារណៈ ស្របតាមចក្ខុវិស័យរបស់រាជរដ្ឋាភិបាលកម្ពុជា ក្នុងការរៀបចំឱ្យមានប្រព័ន្ធអេកូឡូស៊ីឌីជីថលមួយ ដែលរឹងមាំ និងមានអំណោយផលដល់ការធ្វើបរិវត្តកម្មឌីជីថលលើគ្រប់វិស័យទូទាំងប្រទេស។
បន្ថែមពីលើនេះ ឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំព្រះរាជាណាចក្រកម្ពុជា បានសាទរចំពោះសមិទ្ធផលថ្មីគួរជាទីមោទនៈ នាថ្ងៃនេះ ដែលឆ្លុះបញ្ចាំងពីលទ្ធផលផ្លែផ្កានៃកិច្ចសហប្រតិបតិ្តការរវាងកម្ពុជា-ជប៉ុន និងការគាំទ្រដល់របស់ជប៉ុនចំពោះដំណើរការអភិវឌ្ឍមូលធនមនុស្សឌីជីថលនៅកម្ពុជា តាមរយៈគម្រោងបដិភាគហិរញ្ញប្បទានរបស់មូលនិធិ ស.អ. នៃ ក.ប.ទ. និងជំនួយឥតសំណងគូសាណូណិ របស់រាជរដ្ឋាភិបាល និងប្រជាជនជប៉ុន។
ថ្លែងក្នុងពិធីនេះ ឯកឧត្តម ជា វ៉ាន់ដេត រដ្ឋមន្រ្តី ក.ប.ទ. បានមានប្រសាសន៍ថា តម្រូវការចាំបាច់ក្នុងការបង្កើត ម.ប.ស. នៅតាមវិទ្យាល័យសាធារណៈ គឺសបញ្ជាក់ពីចក្ខុវិស័យវែងឆ្ងាយក្នុងដែនសមត្ថកិច្ចរបស់ ក.ប.ទ. លើវិស័យបច្ចេកវិទ្យាគមនាគមន៍និងព័ត៌មាន ដើម្បីបំពេញបេសកកម្មលើកិច្ចការបរិវត្តកម្មឌីជីថលបម្រើដល់ការអប់រំ ដែលនឹងរួមចំណែកដល់ការអភិវឌ្ឍមូលធនមនុស្សឌីជីថល ទាំងក្នុងវិស័យសាធារណៈ និងឯកជនក្នុងការរៀបចំឱ្យមានប្រព័ន្ធអេកូឡូស៊ីឌីជីថលមួយ ដែលរឹងមាំ និងអំណោយផលដល់ការធ្វើបរិវត្តកម្មឌីជីថលលើគ្រប់វិស័យទូទាំងប្រទេស។
ឯកឧត្តមរដ្ឋមន្រ្តី មានសង្ឃឹមជឿជាក់ប្រកបដោយសុទិដ្ឋិនិយមថា នៅពេលដំណើរការបានពេញលេញ ម.ប.ស. នឹងក្លាយជាសមិទ្ធផលថ្មីមួយដ៏មានសារៈសំខាន់ ទាន់ពេល និងចំគោលដៅ ដែលគាំទ្រដល់ដំណើរអភិវឌ្ឍន៍ការអប់រំឌីជីថលប្រកបដោយស្មារតីបុរេសកម្ម និងគំនិតបើកទូលាយក្នុងការបំពេញបេសកកម្មលើកិច្ចការបរិវត្តកម្មរដ្ឋាភិបាលឌីជីថល សំដៅរួមចំណែកដល់ការអនុវត្តប្រកបដោយប្រសិទ្ធភាព ចំពោះគោលដៅយុទ្ធសាស្ត្រដែលកំណត់ក្នុងគោលនយោបាយរដ្ឋាភិបាលឌីជីថលកម្ពុជា ២០២២-២០៣៥ និងមុំមួយនៃយុទ្ធសាស្រ្តបញ្ចកោណ-ដំណាក់កាលទី១ របស់រាជរដ្ឋាភិបាល ដើម្បីឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០ ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
សូមបញ្ជាក់ជូនថា ម.ប.ស. នៅវិទ្យាល័យ ហ៊ុន សែន ១ មិថុនា គឺជាសមិទ្ធផលដែលសម្រេចបានដំបូងគេបង្អស់ក្នុងចំណោមគម្រោងនៃការបង្កើត ម.ប.ស. នៅតាមវិទ្យាល័យសាធារណៈក្នុងព្រះរាជាណាចក្រកម្ពុជា ដែលផ្ដើមចេញពីខេត្តតាកែវ ជាគម្រោងក្នុងដំណាក់កាលទី១ ហើយក្រុមការងារទទួលបន្ទុកគ្រោងនឹងចុះសិក្សាកំណត់យកទីតាំងអាទិភាព ជាបន្ដបន្ទាប់ដើម្បីសាងសង់ ម.ប.ស. នៅតាមវិទ្យាល័យសាធារណៈ ក្នុងខេត្តផ្សេងៗបន្ថែមទៀត នាពេលខាងមុខ។
អាស្រ័យហេតុនេះ សូមសាធារណជនទាំងអស់ជ្រាបជាព័ត៌មាន៕
![](https://asset.cambodia.gov.kh/mptc/2024/06/photo_2024-06-26_11-23-43-1024x682.jpg)
![](https://asset.cambodia.gov.kh/mptc/2024/06/photo_2024-06-26_11-23-50-1024x682.jpg)
![](https://asset.cambodia.gov.kh/mptc/2024/06/photo_2024-06-26_11-23-52-1024x682.jpg)
![](https://asset.cambodia.gov.kh/mptc/2024/06/photo_2024-06-26_11-23-54-1024x682.jpg)
![](https://asset.cambodia.gov.kh/mptc/2024/06/photo_2024-06-26_11-23-57-1024x682.jpg)
![](https://asset.cambodia.gov.kh/mptc/2024/06/photo_2024-06-26_11-23-59-1024x682.jpg)
![](https://asset.cambodia.gov.kh/mptc/2024/06/photo_2024-06-26_11-24-01-1024x682.jpg)
![](https://asset.cambodia.gov.kh/mptc/2024/06/photo_2024-06-26_11-24-03-1024x682.jpg)
![](https://asset.cambodia.gov.kh/mptc/2024/06/photo_2024-06-26_11-24-06-1024x646.jpg)
![](https://asset.cambodia.gov.kh/mptc/2024/06/photo_2024-06-26_11-24-08-1024x682.jpg)