ឯកឧត្ដមរដ្ឋមន្ត្រី ត្រាំ អុីវតឹក អញ្ជើញចូលរួមជាសហគណៈអធិបតីក្នុងពិធីបើកពិព័រណ៍ឌីជីថលកម្ពុជាឆ្នាំ២០១៩ នៅសាលពិព័រណ៍កោះពេជ្រ
ព្រឹកថ្ងៃសុក្រ ១០កើត ខែផល្គុន ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៥ ខែមីនា ឆ្នាំ២០១៩ ឯកឧត្ដម ត្រាំ អុីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ អញ្ជើញចូលរួមជាសហគណៈអធិបតីក្នុងពិធីបើកពិព័រណ៍ឌីជីថលកម្ពុជាឆ្នាំ២០១៩ (Digital Cambodia 2019) ក្រោមអធិបតីភាព ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ដែលប្រព្រឹត្តទៅចាប់ពីថ្ងៃទី១៥ ដល់ថ្ងៃទី១៧ ខែមីនា ឆ្នាំ២០១៩ នៅសាលពិព័រណ៍កោះពេជ្រ។
ពិព័រណ៍ឌីជីថលកម្ពុជាឆ្នាំ២០១៩នេះ រៀបចំដោយក្រសួងប្រៃសណីយ៍ និងទូរគមនាគមន៍(MPTC) ដោយមានការគាំទ្រដោយ ក្រសួងសេដ្ឋកិច្ចនិងហិរញ្ញវត្ថុ ក្រសួងអប់រំយុវជននិងកីឡា ក្រសួងឧស្សហកម្មនិងសិប្បកម្ម ក្រសួងពាណិជ្ជកម្ម និងក្រសួងការងារនិងបណ្តុះបណ្តាលវិជ្ជាជីវៈ។ កម្មវិធីនេះមានការអញ្ជើញចូលរួមពីសំណាក់ថ្នាក់ដឹកនាំរាជរដ្ឋាភិបាល រដ្ឋមន្ត្រីបច្ចេកវិទ្យាគមនាគមន៍និងព័ត៌មានមកពីប្រទេសនានាក្នុងតំបន់អាស៊ាន សហគ្រាសIT វិនិយោគិន នាយកប្រតិបត្តិក្រុមហ៊ុន និងវាគ្មិនល្បីៗទាំងក្នុងស្រុក ក្នុងតំបន់ និងជុំវិញពិភពលោកជាច្រើនរូបទៀត។
ពិព័រណ៍ឌីជីថលកម្ពុជាឆ្នាំ២០១៩ (Digital Cambodia 2019) បានឆ្លុះបញ្ចាំងអំពីចក្ខុវិស័យរបស់រាជរដ្ឋាភិបាលនីតិកាលទី៦ ក្នុងការធ្វើកំណែទម្រង់សេដ្ឋកិច្ចជាតិឆ្ពោះទៅកាន់របត់ថ្មីមួយ ដែលហៅថា ”សេដ្ឋកិច្ចឌីជីថល” និងត្រៀមលក្ខណៈដល់កម្ពុជាសម្រាប់បដិវត្តន៍ឧស្សាហកម្មទី៤ នាឆ្នាំ២០២៥។ ក្នុងពិព័រណ៍ឌីជីថលកម្ពុជាឆ្នាំ២០១៩នេះផងដែរ ក៏មានការរៀបចំសន្និសីទថ្នាក់រដ្ឋមន្ត្រី ដែលផ្តោតលើនិន្នាការបច្ចេកវិទ្យាដែលកំពុងរីកចម្រើនខ្លាំង និងតម្រូវការសហប្រតិបត្តិការអន្តររដ្ឋាភិបាល ក្រោមប្រធានបទ “ការត្រៀមខ្លួនសម្រាប់ឧស្សាហកម្មជំនាន់ទី៤” ផងដែរ។
*គួរគូសបញ្ជាក់ផងដែរថា៖ ឌីជីថលកម្ពុជាឆ្នាំ២០១៩ បាននាំមកនូវគំនិតច្នៃប្រឌិតថ្មីបំផុត និងទំនើបបំផុតនៅក្នុងបច្ចេកវិទ្យាឌីជីថលមកកាន់ប្រទេសកម្ពុជាក្នុងរយៈពេល ០៣ថ្ងៃ ដែលពោរពេញទៅដោយគំនិតដឹកនាំ ការយល់ដឹង និងដំណោះស្រាយជាក់ស្តែង។ ថ្នាក់ដឹកនាំដែលមានគំនិតច្នៃប្រឌិត និងចក្ខុវិស័យអន្តរជាតិមកពីផ្នែកអាជីវកម្ម រដ្ឋាភិបាល និងអ្នកសិក្សា បានមកប្រមូលផ្តុំពិភាក្សាគ្នាដើម្បីបង្ហាញពីនិន្នាករ និងការអភិវឌ្ឍន៍ថ្មីៗនៅក្នុងវិស័យបច្ចេកវិទ្យាឌីជីថល ព្រមទាំងផ្តល់គំនិត និងទស្សនវិស័យរបស់ពួកគេចំពោះបញ្ហាប្រឈមនានាដែលកំពុងជួបប្រទះក្នុងវិស័យបច្ចេកវិទ្យាគមនាគមន៍និងព័ត៌មាននៅទូទាំងពិភពលោក៕
