សិក្ខាសាលាពិភាក្សាស្តីពី “ទម្រង់វេបសាយរួម មាតិកាព័ត៌មានវេបសាយសាលារាជធានី- ខេត្ត និងបណ្តុះបណ្តាលអំពីរបៀបប្រើប្រាស់ប្រព័ន្ធវេបសាយ និងអ៊ីម៉ែល”
រាជធានីភ្នំពេញ៖ ព្រឹកថ្ងៃចន្ទ ១៣រោច ខែអាសាឍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៩ ខែកក្កដា ឆ្នាំ២០១៩ នៅទីស្តីការក្រសួង ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍និងទូរគមនាគមន៍ បានអញ្ជើញជាអធិបតីបើកសិក្ខាសាលាពិភាក្សាស្តីពី “ទម្រង់វេបសាយរួម មាតិកាព័ត៌មានវេបសាយសាលារាជធានី- ខេត្ត និងបណ្តុះបណ្តាលអំពីរបៀបប្រើប្រាស់ប្រព័ន្ធវេបសាយ និងអ៊ីម៉ែល” ដែលប្រព្រឹត្តទៅរយៈពេល ០៣ថ្ងៃ ចាប់ពីថ្ងៃទី២៩ ដល់ថ្ងៃទី៣១ ខែកក្កដា ឆ្នាំ២០១៩ ដោយមានសិក្ខាកាមសរុបចំនួន ១៩៥នាក់ អញ្ជើញមកពីតំណាងក្រសួងប្រៃសណីយ៍និងទូរគមនាគមន៍ តំណាងក្រសួងមហាផ្ទៃ សាលារដ្ឋបាលរាជធានី- ខេត្តទាំង២៥ ព្រមទាំងតំណាងមកពីមន្ទីរព័ត៌មាន មន្ទីរទេសចរណ៍ និងមន្ទីរប្រៃសណីយ៍និងទូរគមនាគមន៍ចំនួន ១៣ខេត្ត ។
ឯកឧត្តមរដ្ឋលេខាធិការ សុខ ពុទ្ធិវុធ បានមានប្រសាសន៍ថា កន្លងមក ក្រសួងប្រៃសណីយ៍និងទូរគមនាគមន៍បានខិតខំកសាងគោលនយោបាយនិងលិខិតបទដ្ឋានគតិយុត្ត ដើម្បីអភិវឌ្ឍវិស័យប្រៃសណីយ៍ ទូរគមនាគមន៍ និងបច្ចេកវិទ្យាគមនាគមន៍និងព័ត៌មាន ឱ្យមានការវិវត្តជឿនលឿនជាលំដាប់។ លើសពីនេះទៅទៀត ក្រសួងបាននឹងកំពុងចូលរួមចំណែកក្នុងការអនុវត្តយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា តាមរយៈធ្វើការសិក្សាស្រាវជ្រាវនិងរៀបចំសេចក្ដីព្រាងគោលនយោបាយអ៊ីនធឺណិតល្បឿនលឿន គោលនយោបាយអភិវឌ្ឍវិស័យបច្ចេកវិទ្យាជំនាន់ទី៥(5G) និងគោលនយោបាយរដ្ឋាភិបាលឌីជីថល ដើម្បីចូលរួមក្នុងការត្រៀមខ្លួននៃការមកដល់នៃបដិវត្តឧស្សាហកម្មជំនាន់ទី៤.០ ដែលបច្ចេកវិទ្យាបញ្ញានិម្មិត (Artificial Intelligence) នឹងដើរតួនាទីយ៉ាងសំខាន់។ មិនត្រឹមតែប៉ុណ្ណោះ ការជំរុញការប្រើប្រាស់គេហទំព័រផ្លូវការរបស់ក្រសួង ស្ថាប័នក្នុងការផ្សព្វផ្សាយអំពីសេវានិងព័ត៌មានផ្លូវការ គឺជាមូលដ្ឋាននៃការឆ្ពោះទៅដល់ការផ្ដល់សេវាសាធារណៈនិងការពិគ្រោះយោបល់តាមប្រព័ន្ធឌីជីថលរបស់រាជរដ្ឋាភិបាលកម្ពុជា។
មុននឹងបញ្ចប់ ឯកឧត្តមរដ្ឋលេខាធិការ សង្ឃឹមយ៉ាងមុតមាំថា មន្ត្រីទាំងអស់ដែលអញ្ជើញមកចូលរួមក្នុងសិក្ខាសាលានេះ នឹងខិតខំយកចិត្តទុកដាក់ក្រេបយកចំណេះដឹងដើម្បីក្លាយជាអ្នកបណ្ដុះបណ្ដាលបន្តដល់មន្ត្រីនៅក្នុងស្ថាប័នរបស់ខ្លួន ក៏ដូចជាចែករំលែកនូវបទពិសោធន៍ជាមួយគ្នាឱ្យបានផុសផុលនៅតាមអង្គភាពរបស់ខ្លួនអោយកាន់តែមានប្រសិទ្ធភាពផងដែរ៕
