ឯកឧត្តមរដ្ឋមន្ត្រី ត្រាំ អុីវតឹក អញ្ជើញដឹកនាំគណៈប្រតិភូក្រសួង ប.ទ. ចូលរួមក្នុងវេទិកានវានុវត្តន៍បណ្តាញនាពេលអនាគតរបស់បណ្តាប្រទេស BRICS នៅសាធារណរដ្ឋប្រជាមានិតចិន
រាជធានីភ្នំពេញ៖ នារសៀលថ្ងៃចន្ទ ០៥កើត ខែស្រាពណ៌ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៥ ខែសីហា ឆ្នាំ២០១៩ នៅអាកាសយានដ្ឋានអន្តរជាតិភ្នំពេញ ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានអញ្ជើញដឹកនាំគណៈប្រតិភូក្រសួងប្រៃសណីយ៍និងទូរគមនាគមន៍ ចូលរួមវេទិកានវានុវត្តន៍បណ្តាញនាពេលអនាគតរបស់បណ្តាប្រទេស BRICS “BRICS Future Network Innovation Forum” ដែលប្រព្រឹត្តទៅនៅថ្ងៃទី០៦ ដល់ថ្ងៃទី០៧ ខែសីហា ឆ្នាំ២០១៩ នៅសាធារណរដ្ឋប្រជាមានិតចិន ។
គូសបញ្ជាក់ផងដែរថា BRICS គឺជាបណ្តុំនៃប្រទេសចំនួន ៥ គឺ ប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង។ បណ្តុំប្រទេសBRICS គឺជាទីផ្សារសំខាន់ និងជាអ្នកនាំចេញផលិតផល ICT។
វេទិកានេះ រៀបចំឡើងក្នុងគោលបំណងដើម្បីពិភាក្សាអំពីការពង្រឹងកិច្ចសហប្រតិបត្តិការលើវិស័យបច្ចេកវិទ្យាគមនាគមន៍ និងព័ត៌មាន (ICT), ក្នុងនោះក៏មានពិភាក្សាផងដែរ លើប្រធានបទទាក់ទងនឹង5G បញ្ញាសិប្បនិម្មិត និងការគ្រប់គ្រងវិសាលគមន៍ហ្វ្រេកង់ ផងដែរ។វេទិកានេះមានការចូលរួមពីរដ្ឋមន្ត្រីនិងតំណាងថ្នាក់ដឹកនាំក្រសួងពីបណ្តាប្រទេសBRICS ប្រទេសទើបមានសេដ្ឋកិច្ចងើបឡើង ប្រទេសកំពុងអភិវឌ្ឍន៍ តំណាងស្ថាប័នអន្តរជាតិ ស្ថាប័នស្រាវជ្រាវ និងបណ្តាក្រុមហ៊ុនធំៗផងដែរ។
នៅក្នុងដំណើរបេសកកម្មនេះ គណ:ប្រតិភូកម្ពុជាគ្រោងនឹងជួបពិភាក្សាការងារជាមួយឯកឧត្តមអនុរដ្ឋមន្ត្រីក្រសួងឧស្សាហកម្ម និងព័ត៌មានវិទ្យានៃសាធារណរដ្ឋប្រជាមានិតចិន ក៏ដូចជាទស្សនកិច្ចទីស្នាក់ការនៃបណ្តាក្រុមហ៊ុនធំៗ ដើម្បីស្វែងយល់ពីបច្ចេកវិទ្យាថ្មីៗចុងក្រោយរបស់ចិន ផងដែរ៕
