ឯកឧត្តមរដ្ឋមន្ត្រី ត្រាំ អុីវតឹក អញ្ជើញជាអធិបតីក្នុងកិច្ចប្រជុំអន្តរក្រសួងបន្ត ស្តីពីការរៀបចំសេចក្តីព្រាងក្របខ័ណ្ឌគោលនយោបាយរដ្ឋាភិបាលឌីជីថល
រាជធានីភ្នំពេញ៖ រសៀលថ្ងៃពុធ ០៥កើត ខែមាឃ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៩ ខែមករា ឆ្នាំ២០២០ នៅទីស្តីការក្រសួង ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានអញ្ជើញជាអធិបតីក្នុងកិច្ចប្រជុំអន្តរក្រសួងបន្ត ស្តីពីការរៀបចំសេចក្តីព្រាងក្របខ័ណ្ឌគោលនយោបាយរដ្ឋាភិបាលឌីជីថល។ កិច្ចប្រជុំនេះមានការអញ្ជើញចូលរួមពី ឯកឧត្តម លោកជំទាវ លោក លោកស្រី ជាថ្នាក់ដឹកនាំ បណ្តាអន្តរក្រសួង-ស្ថាប័ន ដែលពាក់ព័ន្ធផងដែរ។
កិច្ចប្រជុំនេះបានពិភាក្សាលើរបៀបវារៈដូចខាងក្រោម៖
(១).បង្ហាញអំពីគម្រោងសម្រាប់ក្របខ័ណ្ឌនៃព័ត៌មានជាតិ និងការសម្របសម្រួលនៃរដ្ឋាភិបាលអេឡិកត្រូនិកនៅព្រះរាជាណាចក្រកម្ពុជា
(២).ការពិនិត្យបញ្ជីអាទិភាពនៃប្រព័ន្ធរដ្ឋាភិបាលឌីជីថល (Digital Government) និងពិភាក្សាអំពីស្ថានភាពប្រព័ន្ធរដ្ឋាភិបាលឌីជីថលរបស់ក្រសួង-ស្ថាប័ន។
ឯកឧត្តមរដ្ឋមន្ត្រី ត្រាំ អុីវតឹក បានមានប្រសាសន៍ថា ការជំរុញបង្កើតរដ្ឋាភិបាលឌីជីថល គឺជាការប្រើប្រាស់មធ្យោបាយអេឡិកត្រូនិក ដើម្បីគ្រប់គ្រងប្រព័ន្ធការងារ និងមូលដ្ឋាននៃការផ្តល់សេវាអោយមានតម្លាភាព មានភាពងាយស្រួល លឿន និងផ្សារភ្ជាប់ទំនាក់ទំនងជាមួយប្រជាពលរដ្ឋនិងអាជីវកម្មកាន់តែប្រសើរ ព្រមទាំងបង្កើនប្រសិទ្ធភាពការងាររាជរដ្ឋាភិបាល តាមរយៈការបង្កើតនិងប្រើប្រាស់ហេដ្ឋារចនាសម្ព័ន្ធឌីជីថលរួម វេទិកាឌីជីថលរួម សេវាកម្មឌីជីថលរួម ដោយឈរលើយន្តការ “បង្កើតម្តងប្រើបានគ្រប់កន្លែង” និងកម្មវិធីពង្រឹងសមត្ថភាពដល់គ្រប់ភាគីពាក់ព័ន្ធ។ ឯកឧត្តមរដ្ឋមន្ត្រី បានបន្តទៀតថា កិច្ចប្រជុំនៅថ្ងៃនេះ គឺពិភាក្សាអំពីបញ្ជីអាទិភាពនៃប្រព័ន្ធរដ្ឋាភិបាលឌីជីថលនៅកម្ពុជា ហើយដើម្បីសម្រេចយកនូវ e-System ក្រសួង-ស្ថាប័ន នីមួយៗ ដើម្បីយើងដាក់នៅក្នុងកម្មវិធីនៃការកសាងរដ្ឋាភិបាលឌីជីថល។ ឯកឧត្តមរដ្ឋមន្ត្រី បញ្ជាក់ថា គ្រប់ក្រសួងទាំងអស់ត្រូវមាន គម្រោងគ្រប់គ្រងអេឡិកត្រូនិក សម្រាប់ដំណើរការនៅក្នុងក្រសួង-ស្ថាប័នរបស់ខ្លួន ក្នុងការងាររដ្ឋបាល ការចែករំលែកព័ត៌មាន រឺការផ្តល់សេវាសាធារណៈ។
ឆ្លៀតក្នុងឱកាសនោះ ឯកឧត្តមរដ្ឋមន្ត្រី បានបញ្ជាក់ជូនដល់អង្គប្រជុំ ដើម្បីឱ្យបានយល់ដឹងកាន់តែច្បាស់ថែមទៀត អំពីការរៀបចំការងារដែលពាក់ព័ន្ធនឹងការបង្កើតរដ្ឋាភិបាលឌីជីថល និងចែករំលែកនូវការវិវត្តន៍នៃបច្ចេកវិទ្យាក្នុងឧស្សាហកម្មជំនាន់ទី៤ ផងដែរ៕
