កិច្ចប្រជុំ ស្តីពីវឌ្ឍនភាពនៃការរៀបចំគោលនយោបាយអភិវឌ្ឍន៍វិស័យប្រៃសណីយ៍ និងការបង្កើតសេវាសន្សំសំចៃ
រាជធានីភ្នំពេញ៖ ព្រឹកថ្ងៃពុធ ០២កើត ខែចេត្រ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៥ ខែមីនា ឆ្នាំ២០២០ នៅទីស្តីការក្រសួង ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានអញ្ជើញជាអធិបតីដឹកនាំកិច្ចប្រជុំ ស្តីពីវឌ្ឍនភាពនៃការរៀបចំគោលនយោបាយអភិវឌ្ឍន៍វិស័យប្រៃសណីយ៍ និងការបង្កើតសេវាសន្សំសំចៃ ដោយមានការអញ្ជើញចូលរួមពីថ្នាក់ដឹកនាំក្រសួង ព្រមទាំងមន្ត្រីរាជការដែលទទួលបន្ទុកលើវិស័យប្រៃសណីយ៍។
ឯកឧត្តមរដ្ឋមន្ត្រី បានមានប្រសាសន៍លើកឡើងថា វិស័យប្រៃសណីយ៍ ត្រូវបន្តរៀបចំប្រព័ន្ធអោយមានលក្ខណៈទំនើប ទាន់សម័យប្រកបដោយគុណភាពខ្ពស់ មានស្តង់ដារអន្តរជាតិ បង្ករលក្ខណៈងាយស្រួលនឹងផ្តល់ភាពជឿជាក់ទំនុកចិត្តលើការប្រើប្រាស់សេវា ព្រមជាមួយការពង្រីកសេវាប្រៃសណីយ៍ អោយដល់គ្រប់មូលដ្ឋានភូមិ-ឃុំ លើកកម្ពស់ការធ្វើប្រតិបត្តិការបណ្តាញប្រៃសណីយ៍អន្តរជាតិ និងបន្តបង្កើតសេវាកម្មថ្មីៗបន្ថែមទៀត តាមតម្រូវការទីផ្សារបច្ចុប្បន្ន និងតាមបច្ចេកវិទ្យាគមនាគមន៍និងព័ត៌មាន ប្រកបដោយគុណភាព។ ឯកឧត្តមរដ្ឋមន្ត្រី បានបញ្ជាក់ថា កិច្ចប្រជុំនៅថ្ងៃនេះ រៀបចំឡើងក្នុងគោលបំណង សំដៅជំរុញការរៀបចំគោលនយោបាយអភិវឌ្ឍន៍វិស័យប្រៃសណីយ៍ អោយបានឆាប់រហ័ស ដើម្បីមានមូលដ្ឋានសម្រាប់អនុវត្តន៍ការងារបន្តប្រកបដោយប្រសិទ្ធភាព ព្រមទាំងពិនិត្យការងារដែលបានធ្វើកន្លងមក ក្នុងការបង្កើតសេវាសន្សំសំចៃ នៅតាមការិយាល័យប្រៃសណីយ៍កម្ពុជា ផងដែរ៕
