ឯកឧត្តមរដ្ឋមន្ត្រី ជា វ៉ាន់ដេត បានអញ្ជើញជួបពិភាក្សាការងារជាមួយរដ្ឋលេខាធិការ និងអនុរដ្ឋលេខាធិការ
![Ministry of Post and Telecommunications](https://asset.cambodia.gov.kh/mptc/2020/05/IelJ058H-mptc-media-4187.jpg)
រាជធានីភ្នំពេញ៖ ចាប់ពីថ្ងៃទី២ ដល់ថ្ងៃទី៧ ខែមេសា ឆ្នាំ២០២០ នៅទីស្តីការក្រសួង ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានដឹកនាំកិច្ចប្រជុំពិភាក្សាការងារដាច់ដោយឡែកជាមួយឯកឧត្តមរដ្ឋលេខាធិការទាំង ៨ រូប អមដោយអនុរដ្ឋលេខាធិការទទួលបន្ទុកការងារក្នុងចង្កោមសកម្មភាពការងាររបស់រដ្ឋលេខាធិការ។ កិច្ចប្រជុំនេះមានគោលដៅស្វែងយល់លម្អិត និងស៊ីជម្រៅពីការងារទទួលបន្ទុកដោយថ្នាក់ដឹកនាំក្រសួងម្នាក់ៗ និងការងារពាក់ព័ន្ធស្តីពីបច្ចុប្បន្នភាពនៃដំណើររបស់អង្គភាពចំណុះឱ្យក្រសួង និង បញ្ហាផ្សេងៗផងដែរ។ ឯកឧត្តមរដ្ឋមន្ត្រី ក៏បានស្នើឱ្យមន្ត្រីក្រោមឱវាទ រៀបចំផែនការបណ្តុះបណ្តាលជំនាញ និងភាសាអង់គ្លេសតាមអង្គភាពរៀងៗខ្លួន ដើម្បីចូលរួមចំណែកពង្រឹងសមត្ថភាពមន្ត្រីក្រសួងប្រៃសណីយ៍និងទូរគមនាគមន៍ ឱ្យបំពេញការងារបានកាន់តែប្រសើរ ក្នុងការផ្តល់សេវាសាធារណៈឱ្យបានឆាប់រហ័ស មានតម្លាភាព ប្រសិទ្ធភាព ផ្តល់ផលប្រយោជន៍កាន់តែច្រើនដល់អ្នកប្រើប្រាស់សេវាក្នុងវិស័យប្រៃសណីយ៍ និងទូរគមនាគមន៍ ជាពិសេសតម្រូវការនៃការរៀបចំការងារអាទិភាពជាច្រើនទៀតដែលត្រូវបន្តអនុវត្ត ដើម្បីរៀបចំសេដ្ឋកិច្ចកម្ពុជាឱ្យឈានចូលក្នុងយុគសម័យបដិវត្តន៍ឧស្សាហកម្មទី៤។
ឯកឧត្ដមរដ្ឋមន្ត្រី បានសំណូមពរឱ្យបងប្អូនមន្ត្រីទាំងអស់រួបរួមសាមគ្គីគ្នាជាធ្លុងមួយនៃមហាគ្រួសារខ្មែរ ដើម្បីចូលរួមចំណែកក្នុងការអភិវឌ្ឍជាតិក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា៕