ឯកឧត្តមរដ្ឋមន្ត្រី ជា វ៉ាន់ដេត ដឹកនាំកិច្ចប្រជុំពិភាក្សាស្ដីពីការរៀបចំដាក់ឱ្យប្រើប្រាស់ទិន្នន័យរបស់មជ្ឈមណ្ឌលគ្រប់គ្រងទិន្នន័យ (DMC) សម្រាប់បង្កើនការប្រមូលចំណូល
រាជធានីភ្នំពេញ៖ នាព្រឹកថ្ងៃទី៣០ ខែមេសា ឆ្នាំ២០២០ នៅទីស្តីការក្រសួង ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ ដឹកនាំកិច្ចប្រជុំពិភាក្សាស្ដីពីការរៀបចំដាក់ឱ្យប្រើប្រាស់ទិន្នន័យរបស់មជ្ឈមណ្ឌលគ្រប់គ្រងទិន្នន័យ (DMC) សម្រាប់បង្កើនការប្រមូលចំណូល ដោយមានការអញ្ជើញចូលរួមពីថ្នាក់ដឹកនាំ និងមន្ត្រីបច្ចេកទេសក្រោមឱវាទក្រសួង។
ថ្លែងនៅក្នុងកិច្ចប្រជុំនោះ ឯកឧត្ដមរដ្ឋមន្ត្រី បានចាត់តាំងថ្នាក់ដឹកនាំក្រសួងទទួលបន្ទុកឱ្យដឹកនាំមន្ត្រីក្រោមឱវាទកែសម្រួលនីតិវិធី និងពិភាក្សាជាមួយភាគីពាក់ព័ន្ធដើម្បីរកវិធីបង្កើនល្បឿននៃការចេញរបាយការណ៍ឱ្យបានកាន់តែលឿនជាងមុនតាមដែលអាចធ្វើទៅបាន សំដៅជៀសវាងភាពយឺតយ៉ាវនៃលំហូរទិន្នន័យដែលអាចបណ្ដាលឱ្យយឺតយ៉ាវដល់ការប្រមូលចំណូលប្រចាំខែ ព្រមទាំងបង្កើតកម្មវិធី (App) ដើម្បីបង្ហូរទិន្នន័យដោយស្វ័យប្រវត្តិពី DMC ទៅអង្គភាពប្រមូលចំណូលសារពើពន្ធ និងចំណូលមិនមែនសារពើពន្ធ សំដៅបង្កើនចំណូលជាអតិបរមាជូនរដ្ឋដូចមានចែងក្នុងច្បាប់និងបទប្បញ្ញត្តិជាធរមាន។ ឯកឧត្ដមរដ្ឋមន្ត្រីបានគូសបញ្ជាក់អំពីការពន្លឿននីតិវិធីរដ្ឋបាលផ្ទៃក្នុងក្រសួង សំដៅលើកកម្ពស់ប្រសិទ្ធភាព និងគុណភាពការងារផងដែរ។
