ឯកឧត្តម ខាយ ឃុនហេង បានអញ្ជើញដឹកនាំកិច្ចប្រជុំជាមួយប្រតិបត្តិករទូរស័ព្ទចល័តចំនួន៥
រាជធានីភ្នំពេញ៖ នាព្រឹកថ្ងៃទី០៧ ខែមេសា ឆ្នាំ២០១៧ នៅទីស្តីការក្រសួង ឯកឧត្តម ខាយ ឃុនហេង រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានអញ្ជើញដឹកនាំកិច្ចប្រជុំជាមួយប្រតិបត្តិករទូរស័ព្ទចល័តចំនួន ៥ រូមមាន ក្រុមហ៊ុនមិត្តហ្វូន ក្រុមហ៊ុនស្មាត ក្រុមហ៊ុនសែលកាត ក្រុមហ៊ុនខែតខុម និងក្រុមហ៊ុនស៊ីតធែល ដើម្បីពិភាក្សាក្នុងការស្នើសុំដល់បណ្តាក្រុមហ៊ុនទាំង ៥ បញ្ជូនសារខ្លីអប់រំផ្សព្វផ្សាយស្តីពីគ្រឿងញៀន និងសុវត្ថិភាពចរាចរណ៍ផ្លូវគោកតាមទូរស័ព្ទដៃ និងចល័តទៅដល់អ្នកប្រើប្រាស់ទាំងអស់។
គោលបំណងនៃកិច្ចប្រជុំនេះ៖ ដើម្បីចូលរួមអនុវត្តសកម្មភាព និងគោលនយោបាយយុទ្ធនាការផ្សព្វផ្សាយប្រយុទ្ធប្រឆាំងនឹងគ្រឿងញៀនខុសច្បាប់លើកទី១ និងសុវត្ថិភាពចរាចរណ៍ផ្លូវគោករបស់រាជរដ្ឋាភិបាល តាមរយៈសារខ្លីអប់រំក្នុងទូរស័ព្ទដៃ និងដើម្បីចូលរួមទប់ស្កាត់ការបង្កគ្រោះថ្នាក់ដល់បរិស្ថានសង្គម និងអាយុជីវិតប្រជារាស្រ្តកម្ពុជាយើង ដែលបង្កដោយការចរាចរណ៍ និងប្រើប្រាស់គ្រឿងញៀនខុសច្បាប់ និងការធ្វើចរាចរណ៍តាមដងផ្លូវផ្ទុយពីច្បាប់ស្តីពីចរាចរណ៍ផ្លូវគោក៕
