ថ្នាក់ដឹកនាំក្រសួងប្រៃសណីយ៍និងទូរគមនាគមន៍អញ្ជើញចូលរួមក្នុង កិច្ចប្រជុំថ្នាក់រដ្ឋមន្ត្រីបច្ចេកវិទ្យាព័ត៌មាននិងទូរគមនាគមន៍នៅ ប្រទេសសឹង្ហបុរី
តបតាមការអញ្ជើញរបស់ឯកឧត្តមបណ្ឌិតយ៉ាកូប អ៊ីប្រាហ៊ីម រដ្ឋមន្ត្រីក្រសួងគមនាគមន៍និងព័ត៌មានវិទ្យានៃប្រទេសសឹង្ហបុរី នៅព្រឹកថ្ងៃទី១៣ វិច្ឆិកា ឆ្នាំ២០១៣ គណៈប្រតិភូក្រសួងប្រៃសណីយ៍និងទូរគមនាគមន៍ដឹកនាំដោយឯកឧត្តមប្រាក់ សុខុន រដ្ឋមន្ត្រីក្រសួងប្រៃសណីយ៍និងទូរគមនាគមន៍បានអញ្ជើញចូលរួមក្នុងកិច្ចប្រជុំថ្នាក់រដ្ឋមន្ត្រីទូរគមនាគមន៍និងព័ត៌មានវិទ្យាអាស៊ានលើកទី១៣ ស្តីពីបច្ចេកវិទ្យាព័ត៌មាននិងគមនាគមន៍ ដែលបានប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៥ វិច្ឆកា ឆ្នាំ២០១៣ នៅប្រទេសសឹង្ហបុរី។
អញ្ជើញជូនដំណើរឯកឧត្តមប្រាក់ សុខុន ដល់ចំណតអាកាសយានដ្ឋានអន្តរជាតិភ្នំពេញ រួមមាន ឯកឧត្តម លោកជំទាវ អស់លោក លោកស្រី ជារដ្ឋលេខាធិការ, អនុរដ្ឋលេខាធិការ, អគ្គនាយក, អគ្គនាយករង និង មន្ត្រីអ្នកមុខអ្នកការក្រោមឱវាទក្រសួងប្រៃសណីយ៍និងទូរគមនាគមន៍ជាច្រើនរូបទៀត។
គួរបញ្ជាក់ថា តាមការអញ្ជើញរបស់អង្គការសហភាពទូរគមនាគមន៍អន្តរជាតិ ឯកឧត្តមប្រាក់ សុខុន រដ្ឋមន្ត្រីក្រសួងប្រៃសណីយ៍និងទូរគមនាគមន៍កម្ពុជា ក៏បានអញ្ជើញអមដំណើរឯកឧត្តម គាត ឈន់ ឧបនាយករដ្ឋមន្ត្រីប្រចាំការ ចូលរួមក្នុងកិច្ចប្រជុំកំពូលផ្សារភ្ជាប់តំបន់អាស៊ី ប៉ាស៊ីហ្វិកឆ្នាំ២០១៣និងពិធីតាំងពិព័រណ៍ថ្នាក់ពិភពលោក ស្តីពី ពិភពទូរគមនាគមន៍របស់សហភាពទូរគមនាគមន៍អន្តរជាតិឆ្នាំ២០១៣ ដែលបានប្រព្រឹត្តទៅពីថ្ងៃទី១៨ ដល់ថ្ងៃទី២២ វិច្ឆិកា ឆ្នាំ២០១៣ នៅទីក្រុងបាងកក នៃព្រះរាជាណាចក្រថៃ។ និងតបតាមការអញ្ជើញរបស់ឯកឧត្តមរដ្ឋមន្ត្រីក្រសួងព័ត៌មាននិងទូរគមនាគមន៍នៃសាធារណរដ្ឋសង្គមនិយមវៀតណាម គណៈប្រតិភូក្រសួងប្រៃសណីយ៍និងទូរគមនាគមន៍កម្ពុជា ដឹកនាំដោយឯកឧត្តមរដ្ឋមន្ត្រីប្រាក់ សុខុន ក៏បានអញ្ជើញចូលរួមពិព័រណ៍ថ្នាក់អន្តរជាតិលើកទី១៥ ស្តីពីបច្ចេកវិទ្យាទូរគមនាគមន៍ និងព័ត៌មាន ដែលបានប្រព្រឹត្តទៅពីថ្ងៃទី២០ ដល់ថ្ងៃទី២៣ វិច្ឆិកា ឆ្នាំ២០១៣ នៅទីក្រុងហូជីមិញ នៃប្រទេសវៀតណាម សម្តៅជម្រុញការចែករម្លែកចក្ខុវិស័យនិងយុទ្ធសាស្ត្របច្ចេកទេសលើវិស័យព័ត៌មាននិងទូរគមនាគមន៍និងជួយពង្រឹងភាពជាដៃគូរវាងបណ្តាប្រទេសនានាក្នុងតំបន់៕
