ពិធីប្រកាសតែងតាំងថ្នាក់ដឹកនាំក្រសួងប្រៃសណីយ៍និងទូរគមនាគមន៍
ពិធីប្រកាសតែងតាំងថ្នាក់ដឹកនាំក្រសួងប្រៃសណីយ៍និងទូរគមនាគមន៍ បានប្រព្រឹត្តទៅកាលពីព្រឹកថ្ងៃទី១២ វិច្ឆិកា ឆ្នាំ២០១៣ នៅទីស្តីការក្រសួងក្រោមអធិបតីភាពឯកឧត្តមប្រាក់ សុខុន រដ្ឋមន្ត្រីក្រសួងប្រៃសណីយ៍និងទូរគមនាគមន៍។
ឯកឧត្តម លីវ គឹមហេង អគ្គនាយករដ្ឋបាលនៃក្រសួងប្រៃសណីយ៍និងទូរគមនាគមន៍ បានអានព្រះរាជក្រឹត្យរបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងអនុក្រឹត្យរបស់រាជរដ្ឋាភិបាលកម្ពុជា ស្តីពីការត្រាស់បង្គាប់និងតែងតាំងឯកឧត្តម សេក សុជាតិ ជាអនុរដ្ឋលេខាធិការក្រសួងប្រៃសណីយ៍និងទូរគមនាគមន៍, ឯកឧត្តម ផាន់ ភិន ជាទីប្រឹក្សាក្រសួងប្រៃសណីយ៍និងទូរគមនាគមន៍ មានឋានៈស្មើរដ្ឋលេខាធិការ, ឯកឧត្តមគួច គី ជាទីប្រឹក្សាក្រសួងប្រៃសណីយ៍និងទូរគមនាគមន៍មានឋានៈស្មើរដ្ឋលេខាធិការ, ឯកឧត្តមចែម សង្វារ ជាទីប្រឹក្សារាជរដ្ឋាភិបាលមានឋានៈស្មើអនុរដ្ឋលេខាធិការ, ឯកឧត្តម អ៊ូ បូរ៉ាត ជាអគ្គាធិការនៃអគ្គាធិការដ្ឋានក្រសួងប្រៃសណីយ៍និងទូរគមនាគមន៍, ឯកឧត្តម ញាន ស្រស់ ជាទីប្រឹក្សាក្រសួងប្រៃសណីយ៍និងទូរគមនាគមន៍មានឋានៈស្មើអនុរដ្ឋលេខាធិការ, លោកជំទាវ លឹប លឿង ជាទីប្រឹក្សាក្រសួងប្រៃសណីយ៍និងទូរគមនាគមន៍ មានឋានៈស្មើអនុរដ្ឋលេខាធិការ, ឯកឧត្តម លី កាយឫទ្ធិ ជាទីប្រឹក្សាក្រសួងប្រៃសណីយ៍និងទូរគមនាគមន៍ មានឋានៈស្មើអគ្គនាយក និងតែងតាំងលោកទេព ប៊ុន្ថា ជាប្រធានក្រុមប្រឹក្សាភិបាលប្រៃសណីយ៍កម្ពុជា សម្រាប់អាណត្តិទី២ ជំនួសឯកឧត្តម កែវ វុឌ្ឍិន ដែលត្រូវទទួលភារកិច្ចថ្មី។ ព្រមជាមួយគ្នានោះ ក៏មានអនុក្រឹត្យមួយផ្សេងទៀត តែងតាំងជំនួយការឯកឧត្តមរដ្ឋមន្ត្រីមួយចំនួនដែលមានឋានៈស្មើអគ្គនាយករងរហូតដល់ប្រធាននាយកដ្ឋានផងដែរ។
ឯកឧត្តម ប្រាក់ សុខុន បានកោតសរសើរដ៏ស្មោះសរចំពោះថ្នាក់ដឹកនាំនិងមន្ត្រីរាជការនៃក្រសួងប្រៃសណីយ៍និងទូរគមនាគមន៍ដែលត្រូវបានព្រះមហាក្សត្រនៃព្រះរាជាណាចក្រកម្ពុជា និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ត្រាស់បង្គាប់ និងតែងតាំងឲ្យបំពេញភារកិច្ចតាមមុខនាទីរៀងៗខ្លួនដើម្បីរួមគ្នាធ្វើការឈានទៅសម្រេចគោលដៅអភិវឌ្ឍន៍វិស័យប្រៃសណីយ៍និងទូរគមនាគមន៍ប្រកបដោយគុណភាព ប្រសិទ្ធភាព ទំនើប និងការប្រកួតប្រជែង។ ឯកឧត្តមរដ្ឋមន្ត្រីក៏បានសម្តែងនូវសុទិដ្ឋិនិយមថា ដើម្បីចូលរួមក្នុងការអនុវត្តន៍កម្មវិធីនយោបាយនិងយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាលនីតិកាលទី៥ នៃរដ្ឋសភាឲ្យមានប្រសិទ្ធភាព យើងទាំងអស់គ្នា ត្រូវបន្តអភិវឌ្ឍប្រព័ន្ធប្រៃសណីយ៍និងទូរគមនាគមន៍ បន្តលើកទឹកចិត្តការវិនិយោគឯកជនដោយធ្វើទំនើបកម្មបច្ចេកវិទ្យាព័ត៌មាននិងគមនាគមន៍ និងបន្តអភិវឌ្ឍប្រព័ន្ធរដ្ឋបាលគ្រប់គ្រងអេឡិកត្រូនិកទាំងថ្នាក់ជាតិ និងថ្នាក់ក្រោមជាតិ៕
