សារសំខាន់ក្នុងការស្នើសុំអាហារូបករណ៍ទៅសិក្សានៅប្រទេសជប៉ុន
នារសៀលថ្ងៃទី១០ តុលា ឆ្នាំ២០១៣ នៅទីស្តីការក្រសួងប្រៃសណីយ៍និងទូរគមនាគមន៍មានរៀបចំពិធីធ្វើបទបង្ហាញស្តីពីសារសំខាន់និងរបៀបដាក់ពាក្យស្នើសុំអាហារូបករណ៍ទៅសិក្សានៅតាមសាកលវិទ្យាល័យជំនាញនានាក្នុងប្រទេសជប៉ុនសម្រាប់ឆ្នាំ២០១៤ក្រោមកិច្ចដឹកនាំប្រជុំដោយឯកឧត្តមអនុរដ្ឋលេខាធិការ កុយ ពុំ តំណាងដ៏ខ្ពង់ខ្ពស់ឯកឧត្តម ប្រាក់ សុខុន រដ្ឋមន្ត្រីក្រសួងប្រៃសណីយ៍និងទូរគមនាគមន៍។
ថ្លែងក្នុងពិធីនោះ ឯកឧត្តម កុយ ពុំ មានប្រសាសន៍ថា ជប៉ុនជាប្រទេសមួយដែលបានជួយដល់ព្រះរាជាណាចក្រកម្ពុជានូវរាល់ហេដ្ឋាចនាសម្ព័ន្ធនិងជួយទ្រទ្រង់វិស័យផ្សេងៗទៀតជាច្រើន ក្នុងនោះការបណ្តុះបណ្តាលធនធានមនុស្សនិងអភិវឌ្ឍជំនាញក៏ជាគោលដៅសំខាន់របស់ប្រទេសនេះផងដែរ។ ជាក់ស្តែងថ្ងៃនេះ រាជរដ្ឋាភិបាលជប៉ុនបានចាត់គ្រូឧទ្ទេសនាមឲ្យមកពន្យល់អំពីសារសំខាន់និងបង្ហាញពីរបៀបនិងលក្ខខណ្ឌនៃការដាក់ពាក្យស្នើសុំអាហារូបករណ៍ទៅសិក្សានៅប្រទេសជប៉ុនក្នុងន័យជួយបណ្តុះបណ្តាលដល់មន្ត្រីរាជការក្រសួងប្រៃសណីយ៍និងទូរគមនាគមន៍ឲ្យមានការអភិវឌ្ឍន៍ចំណេះដឹងនិងចំណេះធ្វើបន្ថែមទៀត។
ឯកឧត្តមអនុរដ្ឋលេខាធិការ កុយ ពុំ បានបន្តទៀតថា រាជរដ្ឋាផិបាលដែលដឹកនាំដោយសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីបានដាក់ចេញនូវយុទ្ធសាស្ត្រចតុកោណដំណាក់កាលទី៣ គឺបន្តពង្រឹងនិងអភិវឌ្ឍសមត្ថភាពមន្ត្រីរាជការ ជាពិសេសដោយមានការចង្អុលបង្ហាញពីឯកឧត្តម ប្រាក់ សុខុន រដ្ឋមន្ត្រីក្រសួងប្រៃសណីយ៍និងទូរគមនាគមន៍ ទើបនៅពេលនេះក្រសួងបានណែនាំដល់មន្ត្រីរាជការដែលមានសមត្ថភាពអាចដាក់ពាក្យស្នើសុំអាហារូបករណ៍ទៅសិក្សានៅប្រទេសជប៉ុនដើម្បីក្រេបយកមុខជំនាញបច្ចេកទេសមកបម្រើប្រទេសជាតិ មាតុភូមិរបស់យើងឲ្យសម្បូរណ៍ថ្កុំថ្កើង ហើយឯកឧត្តមសង្ឃឹមថា អ្នកចូលរួមទាំងអស់នឹងយកចិត្តទុកដាក់ត្រងត្រាប់ស្តាប់គ្រូឧទ្ទេសនាមដើម្បីឲ្យបានយល់ដឹងកាន់តែច្បាស់ឡើងថែមទៀតនូវគុណប្រយោជន៍និងសារសំខាន់នៃការសិក្សាមុខជំនាញឯកទេសនៅតាមសាកលវិទ្យាល័យជំនាញនានានៅក្នុងប្រទេសជប៉ុន៕
