ឯកឧត្តមរដ្ឋមន្ត្រី ប្រាក់ សុខុន ទទួលជួបពិភាក្សាការងារ និងចុះអនុស្សរណៈស្តីពីការយោគយល់គ្នា
តបតាមការអញ្ជើញរបស់ ឯកឧត្តម ប្រាក់ សុខុន រដ្ឋមន្ត្រីក្រសួងប្រៃសណីយ៍និងទូរគមនាគន៍ ឯកឧត្តម SHANG Bing អនុរដ្ឋមន្ត្រីនៃ ក្រសួងឧស្សាហកម្ម និងបច្ចេកវិទ្យាព័ត៌មាននៃសាធារណរដ្ឋប្រជាមានិតចិនបានដឹកនាំគណៈប្រតិភូមកទស្សនកិច្ចផ្លូវការនៅកម្ពុជា ពីថ្ងៃទី២៤ ដល់២៧ ខែមករា ឆ្នាំ២០១៥ ក្នុងគោលបំណងពង្រឹងកិច្ចសហប្រតិបត្តិការលើវិស័យ ICT រវាងក្រសួងទាំងពីរ។ ក្នុងឱកាសបំពេញទស្សនកិច្ចនេះ ឯកឧត្តម រដ្ឋមន្ត្រី ប្រាក់ សុខុន បានទទួលជួបនិងពិភាក្សាការងារទ្វេភាគីជាមួយឯកឧត្តម អនុរដ្ឋមន្ត្រី SHANG Bing នៅវេលាម៉ោង ១០:៣០ នាទីព្រឹក ថ្ងៃទី២៦ ខែមករា ឆ្នាំ២០១៥ នាទីស្តីការក្រសួងប្រៃសណីយ៍ និងទូរគមនាគមន៍។ ជាលទ្ធផលនៃកិច្ចពិភាក្សាគឺ ភាគីចិនបានស្វាគមន៍ចំពោះសំណើរបស់ឯកឧត្តមរដ្ឋមន្ត្រី ប្រាក់ សុខុន ក្នុងការជួយអភិវឌ្ឍធនធានមនុស្ស, ហេដ្ឋារចនាសម្ព័ន្ធ, ការស្រាវជ្រាវ និងអភិវឌ្ឍ, នវានុវត្តន៍, សន្តិសុខព័ត៌មាន, និងការលើកកំពស់ផ្នែកធុរៈកិច្ច ដល់ក្រុមហ៊ុនឯកជនក្នុងវិស័យបច្ចេកវិទ្យាគមនាគមន៍ និងព័ត៌មានដល់ភាគីកម្ពុជា ។
បន្ទាប់មកឯកឧត្តមរដ្ឋមន្ត្រី ប្រាក់ សុខុន និងឯកឧត្តម SHANG Bing បានអញ្ជើញចុះហត្ថលេខាលើអនុស្សរណៈស្តីពីការយោគយល់គ្នា រវាងក្រសួងក្រសួងប្រៃសណីយ៍ និងទូរគមនាគមន៍កម្ពុជា និងក្រសួងឧស្សាហកម្ម និងបច្ចេកវិទ្យាព៌ត័មាននៃសាធារណរដ្ឋប្រជាមានិតចិន សម្រាប់កិច្ចសហប្រតិបត្តិការលើវិស័យបច្ចេកវិទ្យាគមនាគមន៍ និងព័ត៌មាន ព្រមទាំងផ្តល់កិត្តិយសធ្វើជាសាក្សីដ៏ខ្ពង់ខ្ពស់ក្នុងពិធីចុះហត្ថលេខាលើឯកសារចំនួន២ច្បាប់ទៀតគឺ៖
ទី១. អនុស្សរណៈស្តីពីការយោគយល់គ្នារវាងអគ្គនាយកដ្ឋានបច្ចេកវិទ្យាគមនាគមន៍ និងព័ត៌មាន នៃក្រសួងប្រៃសណីយ៍ និងទូរគមនាគមន៍ ជាមួយ មជ្ឈមណ្ឌលសម្របសម្រួលក្រុមការងារបច្ចេកទេសឆ្លើយតបបញ្ហាបន្ទាន់នៃបណ្តាញកុំព្យូទ័រជាតិរបស់ចិន សម្រាប់កិច្ចសហប្រតិបត្តិការក្នុងវិស័យសន្តិសុខព័ត៌មាន ដែលត្រូវចុះហត្ថលេខាដោយឯកឧត្តម ជា មានិត អគ្គនាយកនៃអគ្គនាយកដ្ឋានបច្ចេកវិទ្យាគមនាគមន៍ និងព័ត៌មាន នៃក្រសួងប្រៃសណីយ និងទូរគមនាគមន៍កម្ពុជា និងឯកឧត្តម Huang Chengqing អគ្គនាយកនៃមជ្ឈមណ្ឌលសម្របសម្រួលក្រុមការងារបច្ចេកទេសឆ្លើយតបបញ្ហាបន្ទាន់នៃបណ្តាញកុំព្យូទ័រជាតិរបស់ចិន។
ទី២. កិច្ចសន្យានៃគម្រោងជំនួយសប្បុរសធម៌នៃប្រព័ន្ធកុំព្យូរទ័រ FusionCloud Desktop របស់ក្រុមហ៊ុន Huawei សម្រាប់ក្រសួង ប្រៃសណីយ៍ និងទូរគមនាគមន៍កម្ពុជាដែលត្រូវបានចុះហត្ថលេខាដោយឯកឧត្តម ជា មានិត អគ្គនាយកនៃអគ្គនាយកដ្ឋានបច្ចេកវិទ្យាគមនាគមន៍ និងព័ត៌មាន នៃក្រសួងប្រៃសណីយ៍ និងទូរគមនាគមន៍កម្ពុជា និងលោក Yang Feng នាយកប្រតិបត្តិនៃក្រុមហ៊ុន Huawei Technologies (Cambodia) Co., Ltd៕
