ឯកឧត្តម ត្រាំ អុីវតឹក បានដឹកនាំប្រតិភូអញ្ជើញចូលរួមកម្មវិធីវេទិកាភាពជាអ្នកដឹកនាំវិស័យបច្ចេកវិទ្យាគមនាគមន៍ និងព័ត៌មាន (ICT) សកលឆ្នាំ២០១៧ នៅទីក្រុងសេអ៊ូល
រាជធានីភ្នំពេញ៖ យប់ថ្ងៃទី០៤ ខែធ្នូ ឆ្នាំ២០១៧ នៅព្រលានយន្តហោះអន្តជាតិភ្នំពេញ ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានដឹកនាំប្រតិភូអញ្ជើញចូលរួមកម្មវិធីវេទិកាភាពជាអ្នកដឹកនាំវិស័យបច្ចេកវិទ្យាគមនាគមន៍ និងព័ត៌មាន (ICT) សកលឆ្នាំ២០១៧ ដែលនឹងប្រព្រឹត្តទៅពីថ្ងៃទី៦-៨ ខែធ្នូ ឆ្នាំ២០១៧ នៅទីក្រុងសេអ៊ូល សាធារណរដ្ឋកូរ៉េ។
វេទិកាភាពជាអ្នកដឹកនាំសកលនេះ (Global ICT Leadership Forum) កន្លងមកបានរៀបចំជារៀងរាល់ឆ្នាំដោយ National Information Society Agency (NIA) របស់កូរ៉េ ដើម្បីជាការឆ្លុះបញ្ចាំងនៃការវិវត្តន៍វិស័យបច្ចេកវិទ្យានៅក្នុងប្រទេស តំបន់ និងពិភពលោក។
នៅក្នុងវេទិកានេះផងដែរ ជារៀងរាល់ឆ្នាំគឺតែងតែស្នើរសុំអោយបណ្តាប្រទេសចូលរួមធ្វើបទបង្ហាញអំពីការវិវត្តន៍ និងការប្រែប្រួលនៃបច្ចេកវិទ្យាទូរគមនាគមន៍នៅក្នុងបណ្តាប្រទេសរបស់ខ្លួន ហើយក៏ចែករំលែកពីបទពិសោធន៍ក្នុងការជម្រុញ និងការរីកចម្រើននៃវិស័យបច្ចេកវិទ្យាគមនាគមន៍របស់កូរ៉េ។
