ក្រសួងប្រៃសណីយ៍និងទូរគមនាគមន៍រៀបចំសិក្ខាសាលាពិគ្រោះយោបល់លើកទី ០២ ស្តីពីវិធីសាស្រ្តនិងយន្តការអនុវត្តវេបសាយជាតិសម្រាប់កម្ពុជា (Cambodia National Portal)
រាជធានីភ្នំពេញ៖ ថ្ងៃ អង្គារ ០៤រោច ខែចេត្រ ឆ្នាំកុរ ឯកស័ក ព.ស.២៥៦២ ត្រូវនឹងថ្ងៃទី២៣ ខែមេសា ឆ្នាំ២០១៩ នៅទីស្តីការក្រសួងប្រៃសណីយ៍និងទូរគមនាគមន៍ បានរៀបចំសិក្ខាសាលាពិគ្រោះ យោបល់លើកទី ០២ ស្តីពីវិធីសាស្រ្តនិងយន្តការអនុវត្តវេបសាយជាតិសម្រាប់កម្ពុជា (Cambodia National Portal) ក្រោមការដឹកនាំសម្របសម្រួលដោយលោក ម៉ុក ខេមរា ប្រធាននាយដ្ឋានរដ្ឋាភិបាលអេឡិកត្រូនិក នៃអគ្គនាយកដ្ឋានបច្ចេកវិទ្យាគមនាគមន៍ និងព័ត៌មាន ដោយប្រព្រឹត្តទៅរយៈពេល ០៤ ថ្ងៃ ចាប់ពីថ្ងៃទី ២៣ ដល់ថ្ងៃទី២៦ ខែមេសា ឆ្នាំ២០១៩ ដែលមានសិក្ខាកាមចូលរួមសរុបចំនួន ៤៥នាក់។ សិក្ខាសាលានេះមានគោលបំណងពិគ្រោះយោបល់លើឯកសារព្រាងផែនការគម្រោងអភិវឌ្ឍវេបសាយជាតិកម្ពុជា (Draft of Cambodia National Portal Project Plan) ដែលកំពុងសិក្សារៀបចំដោយក្រុមការងារនៃក្រសួងប្រៃសណីយ៍និងទូរគមនាគមន៍និងទីប្រឹក្សាសិង្ហបូរី ព្រមទាំងផ្សព្វផ្សាយអំពីខ្លឹមសារនៃឯកសារព្រាងនេះ និងបណ្តុះបណ្តាលជំនាញអំពីវិធីសាស្រ្តកែលម្អដំណើរការសេវា (Business Process Improvement) ជូនដល់សិក្ខាកាមតំណាងមកពីបណ្តាក្រសួង-ស្ថាប័នចំនួន ២៩។
សិក្ខាសាលាពិគ្រោះយោបល់នេះនឹងត្រូវអនុវត្តចំនួន ០២ ដងទៀត ហើយគ្រោងបញ្ចប់នៅអំឡុងខែមិថុនា ឆ្នាំ២០១៩ ដែលរំពឹងថានឹងទទួលបានឯកសារព្រាងអំពីផែនការគម្រោងអភិវឌ្ឍវេបសាយជាតិកម្ពុជាដ៏គ្រប់ជ្រុងជ្រោយមួយសំរាប់រាជរដ្ឋាភិបាល ព្រមទាំងបណ្តុះបណ្តាលជំនាញនិងវិធីសាស្រ្តសំខាន់ៗក្នុងការអនុវត្តវេបសាយជាតិ។
សិក្ខាសាលានេះ ជាផ្នែកមួយនៃការអនុវត្តកម្មវិធីកសាងសមត្ថភាពលើវិស័យបច្ចេកវិទ្យាគមនាគមន៍ និងព័ត៌មានដំណាក់កាលទី២ នៃកិច្ចសហប្រតិបត្តិការរវាងអគ្គនាយកដ្ឋានបច្ចេកវិទ្យាគមនាគមន៍និងព័ត៌មាន និងភាគីសិង្ហបូរី Singapore Cooperation Enterprise (SCE) ដោយផ្តោតលើគម្រោងអាទិភាពចំនួន ០២ គឺគម្រោងកសាងសមត្ថភាពក្នុងការអនុវត្តវេបសាយជាតិ និងគម្រោងកសាងសមត្ថភាពក្នុងការរៀបចំនិម្មាបនកម្មរដ្ឋាភិបាល (Government Enterprise Architecture)៕
